ବରପାଲି, ୨୨।୪: (ଡି.ଏନ.ଏ.) ବରଗଡ଼ ଜିଲା ବିଜେପୁର ନିର୍ବାଚନ ମଣ୍ଡଳୀର ବରପାଲି ଓ ବିଜେପୁର ବ୍ଲକର କେତେକ ଗ୍ରାମର ଚାଷଚଜମି ଜଳସେଚିତ କରିବା ଉଦ୍ଦେଶ୍ୟରେ ଗଙ୍ଗାଧର ମେଗା ଜଳପ୍ରକଳ୍ପ ଯୋଜନା କରାଯାଇଛି। ମାତ୍ର ଏହି ପ୍ରକଳ୍ପରୁ ବରପାଲି ବ୍ଲକର ଗୋପାଇପାଲି, ବନ୍ଧପାଲି ଓ ବିଜେପୁର ବ୍ଲକର ସୂରୁବାଲି ଗ୍ରାମପଞ୍ଚାୟତ ଅଞ୍ଚଳକୁ ପାଣି ଯୋଗାଇ ଦିଆଯିବ ନାହିଁ ବୋଲି ଜଣାପଡିଛି। ଉକ୍ତ ତିନି ପଞ୍ଚାୟତକୁ ପାଣି ଯୋଗାଇ ଦେବା ପାଇଁ ପୂର୍ବରୁ ଯୋଜନା ଥିବାବେଳେ ଏବେ ଉକ୍ତ ପଞ୍ଚାୟତର ନାମ ନ ଥିବାରୁ ଚାଷୀମାନେ ଅସନ୍ତୋଷ ପ୍ରକାଶ କରିଛନ୍ତି। ଶୁକ୍ରବାର ବରଗଡ଼ ଏସ୍ଡିପିଓ ଅମରିତ ପଣ୍ଡା, ବରପାଲି ତହସିଲଦାର ରୁକ୍ମଣ ମେହେର ବିଦ୍ୟୁତ୍ ବିଭାଗ କର୍ମଚାରୀଙ୍କ ସହ ମେଗା ପ୍ରକଳ୍ପ ପାଇଁ ବିଦ୍ୟୁତ୍ ସଂଯୋଗ ପାଇଁ ୩୩ କେଭି ତାର ଟାଣିବାକୁ ଯିବା ସମୟରେ ଚାଷୀମାନେ ପ୍ରବଳ ବିରୋଧ କରିଥିଲେ। ଉକ୍ତ ୩ ପଞ୍ଚାୟତ ଅଞ୍ଚଳକୁ ପାଣି ନ ଦେଲେ ବିଦ୍ୟୁତ୍ ସଂଯୋଗ କରାଇ ଦେବୁନି ବୋଲି ଚାଷୀମାନେ କହିଥିଲେ। ଶେଷରେ ବିଧାୟକ ସୁଶାନ୍ତ ସିଂ ଏଥିରେ ହସ୍ତକ୍ଷେପ କରି ଚାଷୀମାନଙ୍କୁ ଭୁବନେଶ୍ବର ନେଇ ସେଠାରେ ଆଲୋଚନା କରି ସମସ୍ୟାର ସମାଧାନ କରିବେ ବୋଲି କହିଥିଲେ। ତେଣୁ ଆସନ୍ତା ୨୫ ତାରିଖ ଯାଏ କାର୍ଯ୍ୟ ସ୍ଥଗିତ ରଖାଯାଇଛି ବୋଲି ତହସିଲଦାର ପ୍ରକାଶ କରିଛନ୍ତି।
