ଔରଙ୍ଗାବାଦ,୧୮ ।୯: ଦେଶରେ ବିଭିନ୍ନ ସହରର ନାମ ବଦଳାଇବା କୌଣସି ନୂଆ କଥା ନୁହେଁ । ଏହା ହେଉିଛି ଏକ ପୁରୁଣା ପରମ୍ପରା । ମୋଗଲ ସାମଜ୍ୟ ସମୟରେ କିଛି ସହରର ନାମ ବଦଳାଯାଇଥିଲା । ଏହାପରେ ଇଂରେଜମାନେ ଓ ଏବେ କିଛି ସରକାର ବିଭିନ୍ନ ସ୍ଥାନର ନାମ ପରିବର୍ତ୍ତନ କରିଛନ୍ତି । ଏବେ ମହାରାଷ୍ଟ୍ରର ଏକନାଥ ଶିନ୍ଦେ ସରକାର ଏକ କିଲାର ନାମ ବଦଳାଇବାକୁ ଯାଉଛନ୍ତି । ମିଳିଥିବା ସୂଚନା ଅନୁଯାୟୀ, ରାଜ୍ୟର ପର୍ଯ୍ୟଟନ ମନ୍ତ୍ରୀ ମଙ୍ଗଳ ପ୍ରଭାତ ଲୋଦା ଶନିବାର କହିଛନ୍ତି ମହାରାଷ୍ଟ୍ର ପର୍ଯ୍ୟଟନ ବିଭାଗ ଔରଙ୍ଗାବାଦ ସହର ନିକଟରେ ଥିବା ଦୌଲତାବାଦ କିଲାର ନାମ ବଦଳାଇ ଏହାର ପୁରୁଣା ନାମ ‘ଦେବଗିରି’ ରଖିବାର ପ୍ରସ୍ତାବ ଉପସ୍ଥାପନ କରିବ ।
ସୂଚନାଯୋଗ୍ୟ, ଦୌଲତାବାଦ କିଲା ପରିସରରେ ଥିବା ଭାରତ ମାତା ମନ୍ଦିରରେ ଶନିବାର ‘ହାଇଦ୍ରାବାଦ ମୁକ୍ତି ସଂଗ୍ରାମ ଦିବସ’ ସମାରୋହର ଆୟୋଜନ କରାଯାଇଥିଲ । ଏହି ସମାରୋହରେ ଲୋଦା ତ୍ରିରଙ୍ଗା ଉଡାଇଥିଲେ । ଲୋଦା ଖବରଦାତାଙ୍କୁ କହିଥିଲେ, କିଲା ଦୌଲତାବାଦ ଓରଫ ଦେବଗିରି ନାମରେ ପରିଚିତ । ଏହା ଏବେ ଦୌଲତାବାଦ କିଲା ଭାବେ ପରିଚିତ । ରାଜ୍ୟ ପର୍ଯ୍ୟଟନ ବିଭାଗ ଏହାର ନାମ ପରିବର୍ତ୍ତନ କରି ଦେବଗିରି କିଲା କରିବାର ପ୍ରସ୍ତାବ ଉପସ୍ଥାପନ କରିବ । ସେ କହିଥିଲେ ହାଇଦ୍ରାବାଦ ମୁକ୍ତି ସଂଗ୍ରାମ ଦିବସରେ ପ୍ରଥମଥର ତ୍ରିରଙ୍ଗା ଉଡାଯାଇଛି । ଏବେ ଏହା ପ୍ରତିବର୍ଷ କରାଯିବ ।
