ପୋଷାକପତ୍ରରେ ଲାଗିଯାଉଥିବା ଦାଗ ଦୂରକରିବା ପାଇଁ ବିଭିନ୍ନ ପ୍ରକାର ଘରୋଇ ଉପାୟ ସମ୍ପର୍କରେ ଜାଣିରଖନ୍ତୁ….
କପଡ଼ାରେ ପେଣ୍ଟିଂର ବିଭିନ୍ନ ଦାଗ ଲାଗିଲେ ସେହି ସ୍ଥାନରେ କିଛି କିରୋସିନ ଲଗାଇ ଦିଅନ୍ତୁ। ଏହାପରେ ସେହି ସ୍ଥାନକୁ ଭଲଭାବେ ଘଷି ଗରମପାଣିରେ ସଫା କରିଦିଅନ୍ତୁ।
କଲମର ସ୍ୟାହି ଦାଗ କପଡ଼ାରେ ଲାଗିଥିଲେ ଦାଗ ଲାଗିଥିବା ସ୍ଥାନରେ ଡେଟଲ ପକାଇ ଘଷନ୍ତୁ। ଏହାପରେ ସଫା କରିଦିଅନ୍ତୁ। ଧଳା କପଡ଼ାରେ ସ୍ୟାହିର ଦାଗ ଲାଗିଥିଲେ ସେହି ସ୍ଥାନରେ ଟମାଟୋ ଓ ଲୁଣ ଲଗାଇ ଘଷନ୍ତୁ। ଦାଗ ଲାଗିଥିବା ସ୍ଥାନରେ ଲେମ୍ବୁରସ ଲଗାଇ କିଛି ସମୟ ଛାଡ଼ି ଦିଅନ୍ତୁ। ଏହାପରେ ସେହି ସ୍ଥାନକୁ ଘଷି ସଫାକରି ଦିଅନ୍ତୁ।
ଚକୋଲେଟ ଦାଗ ଛଡ଼ାଇବା ବହୁ କଷ୍ଟ। ତେଣୁ ଏହି ଦାଗ ଲାଗିବା ମାତ୍ରେ ସେହି ସ୍ଥାନରେ ତୁରନ୍ତ ଟାଲକମ୍ ପାଉଡର ଲଗାଇ ସୁଖାଇ ଦିଅନ୍ତୁ। ଏହାପରେ ହାଲ୍କା ଗରମ ପାଣିରେ ସଫା କରିଦିଅନ୍ତୁ।
ଆଇସ୍କ୍ରିମ୍ ଦାଗ ଲାଗିଥିଲେ ଆମୋନିଆ ବ୍ୟବହାର କରନ୍ତୁ। ଦାଗ ଲାଗିଥିବା ସ୍ଥାନରେ ଆମୋନିଆ ଘୋଳ ଢାଳି ଦିଅନ୍ତୁ। ଏହାପରେ ହାତରେ ତାକୁ ଘଷି ସଫାକରି ଦିଅନ୍ତୁ। ସେହିପରି ଫଳ ଜୁସ୍ର ଦାଗକୁ ମଧ୍ୟ ଆମୋନିଆ ଦ୍ୱାରା ଛଡ଼ାଇହେବ।
ଲୁଗାରେ ପାନ କି ଗୁଟ୍ଖା ଦାଗ ଲାଗିଥିଲେ ସେହି ସ୍ଥାନକୁ ଖଟାଦହିରେ ବୁଡ଼ାଇ ରଖନ୍ତୁ। କିଛି ସମୟ ପରେ ଲୁଗାକୁ ଘଷି ସଫା କରିଦିଅନ୍ତୁ। ଯଦି ଦାଗ ଭଲଭାବରେ ଛାଡ଼ି ନ ଥାଏ ତେବେ ପୁଣି ଥରେ ସେହିପରି ଖଟାଦହିରେ ବୁଡ଼ାଇ ସଫାକରନ୍ତୁ।
କପଡ଼ାରେ ଚା’ କିମ୍ବା ଅନ୍ୟ କିଛି ଦାଗ ଲାଗିଥିଲେ ସେଥିରେ କିଛି ସମୟ ଗ୍ଲିସେରିନ୍ ଲଗାଇ ଛାଡ଼ି ଦିଅନ୍ତୁ। ପରେ ସାବୁନରେ ସଫା କରିଦିଅନ୍ତୁ। ସେହିପରି ଭିନେଗାର ପାଣିରେ ଦାଗଥିବା କପଡ଼ାକୁ କିଛି ସମୟ ଭିଜାଇ ସଫାକଲେ ଦାଗ ଛାଡ଼ିଯାଏ।
