ନୂଆଦିଲ୍ଲୀ,୨୩।୯: ପଞ୍ଜାବ ବିଧାନସଭା ନିର୍ବାଚନରେ ପ୍ରଦେଶ କଂଗ୍ରେସ କମିଟି ସଭାପତି ନବଜ୍ୟୋତ ସିଂ ସିଦ୍ଧୁଙ୍କୁ ଜିତାଇ ଦେବେନାହିଁ ବୋଲି ପୂର୍ବତନ ମୁଖ୍ୟମନ୍ତ୍ରୀ ଅମରିନ୍ଦର ସିଂ କହିଛନ୍ତି। ସିଦ୍ଧୁଙ୍କ ବିରୋଧରେ ପ୍ରାର୍ଥୀ ଦେବା ସହ ତାଙ୍କୁ ମୁଖ୍ୟମନ୍ତ୍ରୀ କରାଇ ନ ଦେବା ପାଇଁ ଯେକୌଣସି ତ୍ୟାଗ କରିବାକୁ ପ୍ରସ୍ତୁତ ଥିବା ଅମରିନ୍ଦର କହିଛନ୍ତି। ସିଦ୍ଧୁଙ୍କ ସହ ଦୀର୍ଘଦିନ ହେଲା ଅମରିନ୍ଦରଙ୍କର ବିବାଦ ଲାଗି ରହିଥିଲା। ତାଙ୍କ ବିରୋଧ ସତ୍ତ୍ୱେ ସିଦ୍ଧୁଙ୍କୁ ପିସିସି ମୁଖ୍ୟ ନିଯୁକ୍ତ କରାଯାଇଥିଲା। ବିଭିନ୍ନ ଗଣମାଧ୍ୟମକୁ ସାକ୍ଷାତ୍କାର ଦେଇ ପୂର୍ବତନ ମୁଖ୍ୟମନ୍ତ୍ରୀ କହିଛନ୍ତି, ସେ ଇସ୍ତଫା ଦେବାକୁ ଚାହୁଁଥିବା ୩ ସପ୍ତାହ ପୂର୍ବରୁ କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀଙ୍କୁ ଜଣାଇଥିଲେ। ତେବେ ରାହୁଲ ଗାନ୍ଧୀ ଓ ପ୍ରିୟଙ୍କା ଗାନ୍ଧୀ ଭଦ୍ରାଙ୍କର ଅଭିଜ୍ଞତା ନାହିଁ ଓ ସେମାନଙ୍କୁ ବିଭ୍ରାନ୍ତ କରାଯାଉଥିବା କହି ସୋନିଆ ଅମରିନ୍ଦରଙ୍କୁ ମୁଖ୍ୟମନ୍ତ୍ରୀ ପଦରେ ରହିବା ପାଇଁ ପରାମର୍ଶ ଦେଇଥିଲେ। ତେବେ ସୋନିଆଙ୍କୁ ନ ଜଣାଇ କଂଗ୍ରେସ ବିଧାୟକ ଦଳର ଜରୁରୀ ବୈଠକ ଡକାଯାଇଥିବାରୁ ସେ ଅପମାନିତ ବୋଧ କରିଥିଲେ। ନିର୍ବାଚନ ଆଉ ମାତ୍ର ୫ ମାସ ଥିବାବେଳେ ଅମରିନ୍ଦର ଗତ ଶନିବାର ଇସ୍ତଫା ଦେଇଥିଲେ। ତେବେ ସିଦ୍ଧୁଙ୍କୁ କୌଣସି ପ୍ରକାରେ ମୁଖ୍ୟମନ୍ତ୍ରୀ କରାଇ ଦେବେନାହିଁ ଏବଂ ଏଥିପାଇଁ ଯେକୌଣସି ତ୍ୟାଗ କରିବାକୁ ପ୍ରସ୍ତୁତ ଥିବା ଅମରିନ୍ଦର କହିଛନ୍ତି।
