ନୂଆଦିଲ୍ଲୀ,୩୧।୮: ଭିତ୍ତିଭୂମି ଦୃଢ଼ୀକରଣ ଦ୍ୱାରା ସଂଯୋଗୀକରଣ ବ୍ୟବସ୍ଥାକୁ ତ୍ୱରାନ୍ବିତ କରିବାକୁ କେନ୍ଦ୍ର ସରକାର ଯୋଜନା ରଖିଛନ୍ତି। ଏଥିଲାଗି ଗତି ଶକ୍ତି ମାଷ୍ଟର ପ୍ଲାନ ସେପ୍ଟେମ୍ବରରେ ଶୁଭାରମ୍ଭ ହେବ। ଏଥିରେ ୧୦୦ ଲକ୍ଷ କୋଟି ଟଙ୍କା ବିନିଯୋଗ କରିବାକୁ ଲକ୍ଷ୍ୟ ରଖାଯାଇଛି। ଏହାଦ୍ୱାରା ଦେଶର ୧୨ଶହରୁ ଊର୍ଦ୍ଧ୍ୱ ଇଣ୍ଡଷ୍ଟ୍ରିଆଲ କ୍ଲଷ୍ଟର ସମେତ ୨ ପ୍ରତିରକ୍ଷା କରିଡରକୁ ସଂଯୋଗ ବ୍ୟବସ୍ଥା କରାଯିବ। ଉକ୍ତ ଯୋଜନା ଦ୍ୱାରା ମଲ୍ଟି ମୋଡାଲ ସଂଯୋଗ ଆହୁରି ଦୃଢ଼ୀକରଣ, ଯୋଗାଯୋଗ ବ୍ୟବସ୍ଥାରେ ଉନ୍ନତି ଏବଂ ଲଜିଷ୍ଟିକ ଖର୍ଚ୍ଚ କମିବ ବୋଲି ଆଶା କରାଯାଉଛି। ପ୍ରକ୍ରିୟା ସହ ଜଣେ ଅଧିକାରୀ ନାମ ଗୋପନ ରଖି କହିଛନ୍ତି, ଏହି କ୍ଲଷ୍ଟରଗୁଡିକ ମଧ୍ୟରେ ଫୁଡ୍ ପ୍ରୋସେସିଂ ପାର୍କ, ଇଲେକ୍ଟ୍ରୋନିକ୍ସ ଆଣ୍ଡ ଆଇଟି, ଫାର୍ମାସ୍ୟୁଟିକାଲ ଏବଂ ମେଡିକାଲ ଡିଭାଇସ୍, ଫିସିଂ କ୍ଲଷ୍ଟର ଏବଂ ହାର୍ବର ରହିଛି। ଅର୍ଥନୈତିକ ଜୋନ୍ଗୁଡିକୁ ଗତି ସେ ଶକ୍ତି ଟ୍ୟାଗଲାଇନରେ ବିଭିନ୍ନ ପଦକ୍ଷେପ ଗ୍ରହଣ କରାଯିବ। ବିଭିନ୍ନ ମନ୍ତ୍ରଣାଳୟର ବିଭିନ୍ନ ପ୍ରମୁଖ ଯୋଜନା ଯଥା- ଭାରତମାଳା, ସାଗରମାଳା, ଉଡାନ, ରେଳ ଭିତ୍ତିଭୂମି ସମ୍ପ୍ରସାରଣ, ଅନ୍ତର୍ଦେଶୀୟ ଜଳପଥ ଏବଂ ଭାରତ ନେଟ୍ ଭଳି ପ୍ରକଳ୍ପ ସାମିଲ ରହିବ। ଗତି ଶକ୍ତି ସ୍କିମ୍ରେ ୧୯୭ ଫୁଡ୍ ପ୍ରୋସେସିଂ ପାର୍କ ଆଗ୍ରୋ କ୍ଲଷ୍ଟର, ୨୦୨ ଫିସିଂ କ୍ଲଷ୍ଟର, ହାର୍ବର, ୨ ପ୍ରତିରକ୍ଷା କରିଡର, ୧୦୯ ଫାର୍ମା ଏବଂ ମେଡିକାଲ ଡିଭାଇସ କ୍ଲଷ୍ଟର ଏବଂ ୯୦ ଟେକ୍ସଟାଇଲ କ୍ଲଷ୍ଟର ଏବଂ ପାର୍କକୁ ସଂଯୋଗ ସୁବିଧା ପ୍ରଦାନ କରାଯିବ। ଭାରତରେ ଯୋଗାଣ ଚେନ୍ ଏବଂ ଲଜିଷ୍ଟିକ ଖର୍ଚ୍ଚ ସାଧାରଣତଃ ଉଚ୍ଚରେ ରହୁଛି। ଫଳରେ ଭାରତୀୟ ପ୍ରଡକ୍ଟଗୁଡିକ ବିଶ୍ୱବଜାର ସହ ପ୍ରତିଦ୍ୱନ୍ଦ୍ୱିତା କରିବାକୁ ସକ୍ଷମ ହେଉନାହିଁ। ଭାରତର ସପ୍ଲାଇ ଚେନ୍ ଏବଂ ଲଜିଷ୍ଟିକ ଖର୍ଚ୍ଚ ମୋଟ ଜିଡିପିର ୧୪% ରହିଛି। ଏହା ବିଶ୍ୱ ସ୍ତରରେ ହାରାହାରି ପ୍ରାୟ ୮% ରହିଛି। ଦେଶର ଭିତ୍ତିଭୂମି ବିକାଶରେ ୧୦୦ଲକ୍ଷ କୋଟି ଟଙ୍କା ବିନିଯୋଗ କରିବା ଲାଗି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଅଗଷ୍ଟ ୧୫ ଅଭିଭାଷଣରେ କହିଥିଲେ। ଜରୁରିକାଳୀନ ଭିତ୍ତିଭୂମି ବିକାଶ ଦ୍ୱାରା ସାରା ଦେଶରେ ଲଜିଷ୍ଟିକ ଖର୍ଚ୍ଚ କମାଇବା ଦିଗରେ ସରକାର ବିଭିନ୍ନ କାର୍ଯ୍ୟକ୍ରମ ଗ୍ରହଣ କରିଥିବା ସେ ମତ ପ୍ରକାଶ କରିଥିଲେ। ବାଣିଜ୍ୟ ମନ୍ତ୍ରଣାଳୟର ଲଜିଷ୍ଟିକ ଡିଭିଜନ ପକ୍ଷରୁ ଏ ଦିଗରେ ପଦକ୍ଷେପ ଗ୍ରହଣ କରାଯାଉଛି। ବିଭିନ୍ନ କାର୍ଯ୍ୟ ଦେଖାରଖା ଲାଗି କ୍ୟାବିନେଟ ସଚିବଙ୍କ ଅଧ୍ୟକ୍ଷତାରେ ସଚିବ ସ୍ତରୀୟ ଏକ କମିଟି ଗଠନ କରାଯାଇଛି।
