ରସୁଲପୁର,୨୨ା୮(ରଂଜିତ ରାଉତ):କୁଆଖିଆ ଥାନା ଅଞ୍ଚଳର ଜଣେ ମହିଳାଙ୍କୁ ପ୍ରତାରଣା କରାଯିବା ସହ ତାଙ୍କ ଅନ୍ତରଙ୍ଗ ମୁହୂର୍ତ୍ତ ଫଟୋ ଓ ଭିଡିଓ ଭାଇରାଲ କରାଯାଇଥିବା ଅଭିଯୋଗ ହୋଇଛି। ଏହି ଘଟଣାରେ ପୋଲିସ ଜଣେ ଯୁବକଙ୍କୁ ଗିରଫ କରି କୋର୍ଟଚାଲାଣ କରିଛି। ସେ ହେଲେ କେନ୍ଦ୍ରାପଡ଼ା ଜିଲା ଜମ୍ବୁପଡା ଗ୍ରାମର ଦୁଷ୍ମନ୍ତ ସେଠୀ(୩୪)।
୨୮ବର୍ଷୀୟା ମହିଳା ବିବାହ କରିଥିଲେ। ତାଙ୍କର ଏକ କନ୍ୟା ସନ୍ତାନ ରହିଛି। ତେବେ ଦମ୍ପତିଙ୍କ ମଧ୍ୟରେ ମନାନ୍ତର ଘଟିବାରୁ ସେ ବିବାହ ବିଚ୍ଛେଦ ଘଟାଇକୁ ନିଷ୍ପତ୍ତି ନେଇ ଅଲଗା ରହୁଛନ୍ତି। ମହିଳାଜଣକ କଟକ ସ୍ଥିତ ଏକ ଘରୋଇ ସିଲେଇ କମ୍ପାନୀରେ କାମ କରୁଛନ୍ତି। ଅଭିଯୁକ୍ତ ଯୁବକ କଟକସ୍ଥିତ ଏକ ଘରୋଇ କମ୍ପାନୀରେ କାମ କରୁଥିବାବେଳେ ଉଭୟଙ୍କ ମଧ୍ୟରେ କଟକରେ ଦେଖାସାକ୍ଷାତ ହୋଇଥିଲା। ସେମାନେ ପରସ୍ପରକୁ ଭଲପାଇ ବସିଥିଲେ। ମହିଳା ଜଣକ ତାଙ୍କ ଜୀବନର ସମସ୍ତ ଘଟଣାବଳୀ ଯୁବକଙ୍କୁ ଅବଗତ କରାଇଥିଲେ। ଯୁବକ ସବୁ ଜାଣିବା ପରେ ନିଜକୁ ଅବିବାହିତ ବୋଲି କହିବା ସହ ମହିଳାଙ୍କୁ ବିବାହ କରିବାକୁ ପ୍ରତିଶ୍ରୁତି ଦେଇଥିଲେ। ଦୁହେଁ ଏକାଠି ରହି ଆସୁଥିଲେ। ପରେ ଅଭିଯୁକ୍ତ ଯୁବକ ବିବାହିତ ବୋଲି ମହିଳା ଜାଣିବାକୁ ପାଇଥିଲେ। ଏହାପରେ ସେମାନଙ୍କ ସମ୍ପର୍କରେ ଫାଟ ସୃଷ୍ଟି ହୋଇଥିଲା। ମହିଳା ଜଣକ ଯୁବକଙ୍କଠାରୁ ଦୂରେଇ ଯିବାକୁ ଚେଷ୍ଟା କରିଥିଲେ। ଏଥିରେ ଉତ୍କ୍ଷିପ୍ତ ହୋଇ ଅଭିଯୁକ୍ତ ମହିଳାଙ୍କ ସହ ବିତାଇଥିବା ଅନ୍ତରଙ୍ଗ ମୁହୂର୍ତ୍ତ ଫଟୋକୁ ସଂପର୍କୀୟଙ୍କ ମୋବାଇଲକୁ ପଠାଇ ଦେଇଥିଲା। ଏ ସମ୍ପର୍କରେ ଜାଣିବା ପରେ ମହିଳା ଜଣକ ଗତ ୭ତାରିଖରେ କୁଆଖିଆ ଥାନାରେ ଲିଖିତ ଅଭିଯୋଗ କରିଥିଲେ। ପୋଲିସ ନଂ.୩୩୭/୨୪ରେ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା।
