ଅହମ୍ମଦାବାଦ,୨୦ା୧୧: ନରେନ୍ଦ୍ର ମୋଦି ଷ୍ଟାଡିୟମ୍ରେ ରବିବାର ଖେଳାଯାଇଥିବା ଦିନିକିଆ କ୍ରିକେଟ ବିଶ୍ୱକପ୍ ମ୍ୟାଚ୍ରେ ଅଷ୍ଟ୍ରେଲିଆଠାରୁ ଭାରତ ପରାଜିତ ହୋଇଛି। ଏହା ପରେ ସମସ୍ତଙ୍କ ହୃଦୟ ଭାଙ୍ଗି ଯାଇଥିଲା। ବିଶେଷକରି ଖେଳାଳିମାନେ ପରାଜିତ ହେବା ପରେ ପଡ଼ିଆରେ ଲୁହ ଏବଂ ଆଲିଙ୍ଗନରେ ଭରିଯାଇଥିଲା।
ଫାଇନାଲ ମ୍ୟାଚ୍ର ଏକ ଫଟୋ ଏବେ ସୋସିଆଲ ମିଡିଆରେ ଭାଇରାଲ ହେଉଛି। ଏଥିରେ ଅଭିନେତ୍ରୀ ଅନୁଷ୍କା ଶର୍ମା ମ୍ୟାଚ୍ ପରେ ସ୍ବାମୀ ବିରାଟ କୋହଲିଙ୍କୁ ଆଲିଙ୍ଗନ କରୁଛନ୍ତି। କେ.ଏଲ ରାହୁଲଙ୍କ ସ୍ତ୍ରୀ ଆଥିଆ ଶେଟ୍ଟୀ ମଧ୍ୟ ଅନୁଷ୍କାଙ୍କ ପଛରେ ଠିଆ ହୋଇଥିବା ଫ୍ରେମରେ ନଜର ଆସିଛନ୍ତି।
ମ୍ୟାଚ୍ ଶେଷ ହେବାର କିଛି ସମୟ ପରେ କ୍ୟାପଟେନ୍ ରୋହିତ ଶର୍ମା ଏବଂ ଦ୍ରୁତ ବୋଲର ମହମ୍ମଦ ସିରାଜ ପଡ଼ିଆରେ କାନ୍ଦୁଥିବା ନଜର ଆସିଥିଲେ। ତେବେ ସମସ୍ତଙ୍କ ନଜର ଥିଲା କୋହଲିଙ୍କ ଉପରେ। କୋହଲି ବି କାନ୍ଦି ପକାଇଥିଲେ।
ଭାରତର ବ୍ୟାଟ୍ସମ୍ୟାନ କୋହଲି ଗୋଟିଏ ବିଶ୍ୱକପ୍ରେ ଅଧିକାଂଶ ରନ୍ – ୭୬୫ କରି ଏକ ନୂତନ ରେକର୍ଡ ସୃଷ୍ଟି କରି ମ୍ୟାଚ୍ ଶେଷ କରିଛନ୍ତି। ଗତ ସପ୍ତାହରେ ସେ ମୁମ୍ବାଇର ଓ୍ବାଙ୍ଖଡେ ଷ୍ଟାଡିୟମରେ ନ୍ୟୁଜିଲାଣ୍ଡ ବିପକ୍ଷରେ ଭାରତର ସେମିଫାଇନାଲ ବିଜୟରେ ରେକର୍ଡ ଭାଙ୍ଗି ୫୦ ତମ ଏକ ଦିନିକିଆ ଅନ୍ତର୍ଜାତୀୟ (ଓଡିଆଇ) ଶତକ ହାସଲ କରିଥିଲେ।
ସେତେବେଳେ କୋହଲି ଖୁସିରେ ଆତ୍ମହରା ହୋଇ ଅନୁଷ୍କାଙ୍କୁ ଖୋଜିବାକୁ ଚେଷ୍ଟା କରୁଥିବା ଏକ ଭିଡିଓ ମଧ୍ୟ ଭାଇରାଲ ହୋଇଥିଲା। ଆଉ ଏବେ ହାରିବା ପରେ ସ୍ତ୍ରୀ ଅନୁଷ୍କା ସ୍ବାମୀଙ୍କୁ ସାନ୍ତ୍ୱନା ଦେଉଥିବା ଭିଡିଓ ଭାଇରାଲ ହେଉଛି।
