ଭୁବନେଶ୍ୱର,୧୯ା୭(ବ୍ୟୁରୋ):ଧନୀ, ଗରିବ ସମସ୍ତ ଓଡ଼ିଆଙ୍କ ପ୍ରିୟ ଖାଦ୍ୟ ଚୁଡ଼ା, ମୁଢ଼ି ଓ ଖଇ। ଏହା ଏବେ ମହଙ୍ଗା ହୋଇଯାଇଛି। କେନ୍ଦ୍ର ସରକାର ଏହି ଖାଦ୍ୟ ସାମଗ୍ରୀ ଉପରେ ୫% ଦ୍ରବ୍ୟ ଓ ସେବା ଟିକସ (ଜିଏସ୍ଟି) ଲଗାଇଛନ୍ତି। କେବଳ ଏହି ୩ଟି ଖାଦ୍ୟ ସାମଗ୍ରୀ ନୁହେଁ, ପ୍ୟାକେଟ୍ ଦହି, ଲସି, ପନିର, ଗହମ, ଚାଉଳ, ବାର୍ଲି, ଓଟ୍ସ ଉପରେ ମଧ୍ୟ ୫ ପ୍ରତିଶତ ଜିଏସ୍ଟି ଲାଗିବ। ଫଳରେ ଖାଉଟିଙ୍କୁ ମୋଟା ଅଙ୍କର ଟିକସ ଗଣିବାକୁ ପଡ଼ିବ। ଏହାକୁ ନେଇ ସୋମବାର ବିଧାନସଭାରେ ଝଡ଼ ସୃଷ୍ଟି ହୋଇଛି। ଗରିବଙ୍କ ଖାଦ୍ୟ ଉପରୁ ତୁରନ୍ତ ଜିଏସ୍ଟି ପ୍ରତ୍ୟାହାର କରିବା ଦାବିରେ କଂଗ୍ରେସ ସଦସ୍ୟମାନେ ଗୃହରେ ପ୍ରବଳ ହଟ୍ଟଗୋଳ କରିଛନ୍ତି। ହଟ୍ଟଗୋଳ ଯୋଗୁ ବାଚସ୍ପତି ବିକ୍ରମ କେଶରୀ ଆରୁଖ ଗୃହକୁ ଅପରାହ୍ନ ୪ଟା ଯାଏ ମୁଲତବୀ ଘୋଷଣା କରିଥିଲେ।
ଶୂନ୍ୟକାଳରେ କଂଗ୍ରେସ ସଦସ୍ୟ ତାରା ପ୍ରସାଦ ବାହିନୀପତି କହିଲେ, କେନ୍ଦ୍ର ସରକାର ଚୁଡ଼ା, ମୁଢ଼ି, ଦହି, କ୍ଷୀର ଭଳି ଗରିବଙ୍କ ଖାଦ୍ୟ ଉପରେ ଜିଏସ୍ଟି ଲଗାଇଛନ୍ତି। ଆମ ସମସ୍ତଙ୍କର ଏହା ପ୍ରିୟ ଖାଦ୍ୟ। କେନ୍ଦ୍ର ସରକାର ତୁରନ୍ତ ଏହା ଉପରୁ ଜିଏସ୍ଟି ହଟାନ୍ତୁ। ଦଳଗତ ନିର୍ବିଶେଷରେ ସମସ୍ତ ବିଧାୟକଙ୍କୁ ନେଇ ଏକ କମିଟି ଗଢ଼ାଯାଉ। ସେହି କମିଟି ଦିଲ୍ଲୀରେ ଜିଏସ୍ଟି କାଉନସିଲ ଅଧ୍ୟକ୍ଷ ଓ ପ୍ରଧାନମନ୍ତ୍ରୀଙ୍କୁ ଭେଟି ଗରିବଙ୍କ ଖାଦ୍ୟ ଉପରୁ ଜିଏସ୍ଟି ହଟାଇବାକୁ ଦାବି କରିବା ଲାଗି ସେ ପ୍ରସ୍ତାବ ଦେଇଛନ୍ତି। କଂଗ୍ରେସ ସଭ୍ୟ ସନ୍ତୋଷ ସିଂ ସାଲୁଜା କହିଲେ, ସମସ୍ତେ ଚୁଡ଼ା, ମୁଢ଼ି ଖାଆନ୍ତି। ଏହା ସମସ୍ତଙ୍କର ପ୍ରିୟ ଖାଦ୍ୟ। ବାଲେଶ୍ୱର, ବାରିପଦାରେ ମୁଢ଼ି ଏକ ନିତିଦିନିଆ ଖାଦ୍ୟ। ମୟୂରଭଞ୍ଜରୁ ଭାଜପାର ଅଧିକ ବିଧାୟକ ନିର୍ବାଚିତ ହୋଇ ଆସିଛନ୍ତି। ସେଠାରେ ଚିକେନ, ମଟନ ସହ ମୁଢ଼ି ଗୋଳାଇ ଖିଆଯାଏ। କ୍ଷୀର, ଦହି ଉପରେ ମଧ୍ୟ ଜିଏସ୍ଟି ଲାଗୁ କରାଯାଇଛି। କେବଳ ଖାଦ୍ୟ ସାମଗ୍ରୀ ନୁହେଁ ଚାଷୀମାନେ ବ୍ୟବହାର କରୁଥିବା ପମ୍ପସେଟ୍ ଉପରେ କେନ୍ଦ୍ର ସରକାର ୧୨% ଜିଏସ୍ଟି ଲାଗୁ କରିଛନ୍ତି। ତୁରନ୍ତ ଅତ୍ୟାବଶ୍ୟକ ସାମଗ୍ରୀ ଉପରୁ ଟିକସ ଉଠାଯାଉ। ନଚେତ୍ ଗରିବ ଲୋକମାନେ ଚୁଡ଼ା, ମୁଢ଼ି, କ୍ଷୀର, ଦହି ଖାଇପାରିବେ ନାହିଁ। ବିଜେଡି ସଭ୍ୟ ଅମର ଶତପଥୀ କହିଛନ୍ତି ଯେ ଜିଏସ୍ଟି ଲଗାଇବା ପୂର୍ବରୁ କେନ୍ଦ୍ର ସରକାର ରାଜ୍ୟ ସରକାରଙ୍କ ମତାମତ ନେଇଛନ୍ତି କି? ସାଧାରଣ ଖାଉଟିମାନଙ୍କ ଉପରେ ଟିକସ ଭାର ପଡ଼ିବ। ରାଜ୍ୟର କେଉଁ କେଉଁ ସାମଗ୍ରୀ ଉପରେ ଜିଏସ୍ଟି କେତେ ପ୍ରତିଶତ ନିଆଯାଉଛି ସେ ନେଇ ଅର୍ଥମନ୍ତ୍ରୀ ଗୃହରେ ଏକ ବିବୃତି ଦେବାକୁ ସେ ବାଚସ୍ପତିଙ୍କୁ ଅନୁରୋଧ କରିଛନ୍ତି। କଂଗ୍ରେସ ବିଧାୟକ ସୁରେଶ କୁମାର ରାଉତରାୟ କହିଛନ୍ତି ଯେ ଚୁଡ଼ା, ମୁଢ଼ି ଉପରେ ଶେଷରେ ମୋଦି ସରକାର ଜିଏସ୍ଟି ଲଗାଇ ଦେଲେ। ତୁରନ୍ତ ଏହାକୁ ଉଠାଯାଉ ବୋଲି ସେ ଶୂନ୍ୟକାଳରେ ଦାବି କରିଥିଲେ। ଏହାକୁ ନେଇ କଂଗ୍ରେସ ସଦସ୍ୟମାନେ ଗୃହର ମଧ୍ୟଭାଗକୁ ଆସି ହଟ୍ଟଗୋଳ କରିଥିଲେ। ଚୁଡ଼ା, ମୁଢ଼ି ଉପରୁ ଜିଏସ୍ଟି ତୁରନ୍ତ ହଟାଯାଉ ବୋଲି ଦାବି କରିଥିଲେ। ପ୍ରବଳ ହଟ୍ଟଗୋଳ ହେବାରୁ ବାଚସ୍ପତି ଗୃହକୁ ଅପରାହ୍ନ ୪ଟା ଯାଏ ମୁଲତବୀ ଘୋଷଣା କରିଥିଲେ। ଅପରାହ୍ନରେ ଗୃହ ସ୍ବାଭାବିକ ହୋଇଥିଲା।
ପ୍ରଶ୍ନକାଳରେ ସୁରେଶ ରାଉତରାୟ ଏହି ପ୍ରସଙ୍ଗ ଉଠାଇ ରାଜ୍ୟ ସରକାରଙ୍କୁ ଟାର୍ଗେଟ କରିଥିଲେ। ଯଦି କେନ୍ଦ୍ର ସରକାର ଏହା ଉପରେ ଜିଏସ୍ଟି ଲଗାଉଛନ୍ତି ତେବେ ରାଜ୍ୟ ସରକାର ଏହାକୁ ଓଡ଼ିଶାରେ ନ ଲଗାନ୍ତୁ ବୋଲି ସେ ଦାବି କରିଛନ୍ତି। ଯଦି ଲାଗୁ କରିବେ ତେବେ ନିଜେ ରାଜ୍ୟ ସରକାର ଏହି ଟିକସ ଭାର ବହନ କରନ୍ତୁ ବୋଲି ସେ ଦାବି କରିଛନ୍ତି।
ଉତ୍ତରରେ ଅର୍ଥମନ୍ତ୍ରୀ ନିରଞ୍ଜନ ପୂଜାରୀ କହିଛନ୍ତି ଯେ ଜିଏସ୍ଟି ଉପରେ ରାଜ୍ୟ ସରକାର କିଛି କରିପାରିବେ ନାହିଁ। ଏହା ଜିଏସ୍ଟି କାଉନସିଲ ପରିସରଭୁକ୍ତ। ତେବେ ଗାଁ ଗହଳିରେ କିମ୍ବା ଖୋଲାରେ ବିକ୍ରି ହେଉଥିବା ଚୁଡ଼ା, ମୁଢ଼ି ଉପରେ ଜିଏସ୍ଟି ଲାଗୁ ହେବ ନାହିଁ। ଏହା କେବଳ ପ୍ୟାକେଟରେ ବିକ୍ରି ହେଉଥିବା ଚୁଡ଼ା, ମୁଢ଼ି ଆଦି ଉପରେ ଲାଗୁହେବ।
