ମାଞ୍ଚେଷ୍ଟର,୧୧।୯: ହଠାତ୍ ଗୁଜରାଟ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇ ସଭିଙ୍କୁ ଚମକାଇ ଦେଇଛନ୍ତି ବିଜୟ ରୂପାନୀ। ଗତ ୬ ମାସରେ ମୁଖ୍ୟମନ୍ତ୍ରୀ ପଦ ଛାଡ଼ିବାରେ ରୂପାନୀ ଚତୁର୍ଥ ଭାଜପା ନେତା। ରାଜଭବନରେ ଇସ୍ତଫା ପତ୍ର ଦାଖଲ କରିବା ପରେ ରୂପାନୀ ଗଣମାଧ୍ୟମକୁ କହିଥିଲେ, ଭାଜପାରେ ଦାୟିତ୍ୱ ବଦଳାଯିବା ଏକ ପରମ୍ପରା। ମୋତେ ୫ ବର୍ଷ ଲାଗି ରାଜ୍ୟର ସେବା କରିବାକୁ ଅନୁମତି ମିଳିଥିଲା। ମୁଁ ରାଜ୍ୟର ଉନ୍ନତିରେ ଯୋଗଦାନ ଦେଇଛି। ଦଳ ପକ୍ଷରୁ ଯାହା କୁହାଯିବ, ତାହା ମୁଁ କରିବି।
ଏବେ ତାଙ୍କ ନିଷ୍ପତ୍ତି ପଛର କାରଣ ଖୋଜା ଚାଲିଛି। ତେବେ କୋଭିଡ୍ ସଙ୍କଟ ଓ ମୁଖ୍ୟମନ୍ତ୍ରୀ ଭାବେ ତାଙ୍କ ପ୍ରତିଚ୍ଛବି ଇସ୍ତଫା ପଛର କାରଣ ହୋଇଥାଇପାରେ। ଗୁଜରାଟରେ କୋଭିଡ୍ର ଦ୍ୱିତୀୟ ଲହର ବେଳେ ରାଜ୍ୟର ସ୍ବାସ୍ଥ୍ୟସେବା ଭୁଷୁଡ଼ି ପଡ଼ିଥିଲା। ଅକ୍ସିଜେନ ଅଭାବରୁ ବହୁ କରୋନା ସଂକ୍ରମିତ ପ୍ରାଣ ହରାଇଥିଲେ। କୋଭିଡ୍ ଜନିତ ମୃତ୍ୟୁ ସଂଖ୍ୟା ଲୁଚାଯିବା ଭଳି ସ୍ଥିତି ଛିଡ଼ା ହୋଇଯାଇଥିଲା ସରକାରଙ୍କ ଆଗରେ। ଦ୍ୱିତୀୟ ଲହରର ଫଳ ସ୍ବରୂପ ଆର୍ଥିକ ଓ ସାମାଜିକ ବିଫଳତା ଯୋଗୁ ରୂପାନୀ ଇସ୍ତଫା ଦେଇଥାଇ ପାରନ୍ତି।
ଆନନ୍ଦିବେନ ପଟେଲଙ୍କ ଇସ୍ତଫା ପରେ ରୂପାନୀ ୨୦୧୬ ଅଗଷ୍ଟ ୭ ତାରିଖରେ ମୁଖ୍ୟମନ୍ତ୍ରୀ ଗାଦିରେ ବସିଥିଲେ। ୨୦୧୭ ବିଧାନସଭା ନିର୍ବାଚନରେ ଭାଜପାର ବିଜୟ ପରେ ମଧ୍ୟ ସେ ଗାଦି ସମ୍ଭାଳିଥିଲେ। ଚଳିତ ବର୍ଷ ଅଗଷ୍ଟରେ ମୁଖ୍ୟମନ୍ତ୍ରୀ ଭାବେ ତାଙ୍କ ୫ ବର୍ଷ ପୂରଣ ହୋଇଥିଲା।
