ପ୍ୟୋଙ୍ଗୟାଙ୍ଗ,୨୧।୮: ଉତ୍ତର କୋରିଆର ଏକଛତ୍ରବାଦୀ ଶାସକ କିମ୍ ଜୋଙ୍ଗ ଉନଙ୍କ ସାନ ଭଉଣୀ କିମ୍ ୟୋ ଜୋଙ୍ଗ ଦେଶର ଦ୍ୱିତୀୟ ଶକ୍ତିଶାଳୀ ନେତା ପାଲଟି ଯାଇଛନ୍ତି। ଦକ୍ଷିଣ କୋରିଆର ଗୁଇନ୍ଦା ସଂସ୍ଥା ପକ୍ଷରୁ ମିଳିଥିବା ସୂଚନାରୁ ଜଣାପଡିଛି କି ଭଉଣୀ କିମ୍ ୟୋ ଜୋଙ୍ଗଙ୍କୁ ତାଙ୍କ ଭାଇ ଶକ୍ତିଶାଳୀ କରିବାକୁ ଚାହୁଁଛନ୍ତି। କିମଙ୍କ ଉପରେ ଏବେ ବହୁ ଗୁରୁଦାୟିତ୍ୱ ଥିବାରୁ ସେ ଏହାକୁ ହାଲ୍କା କରିବାକୁ ଯାଇ ଭଉଣୀଙ୍କୁ କିଛି ଦାୟିତ୍ୱ ଦେଇଦେଇଛନ୍ତି। ନ୍ୟାଶନାଲ ଆସେମ୍ଲିରେ ଏହାର ଘୋଷଣା ମଧ୍ୟ କରାଯାଇ ସାରିଛି। ଏହି ଘୋଷଣା ଅନୁଯାୟୀ ଏବେ ୟୋ ଜୋଙ୍ଗ ଉତ୍ତର କୋରିଆର ଅନ୍ତରାଷ୍ଟ୍ରୀୟ ନୀତି ଉପରେ ନଜର ରଖିବେ। ସୂଚନାଯୋଗ୍ୟ, ୨୬ ସେପ୍ଟେମ୍ବର ୧୯୮୭ରେ ଜନ୍ମ ନେଇଥିବା କିମ୍ ୟୋ ଜୋଙ୍ଗ କୋରିଆର ଏକଛତ୍ରବାଦୀ ଶାସକ କିମ୍ ଜୋଙ୍ଗ ଉନଙ୍କଠାରୁ ୪ ବର୍ଷ ସାନ। ସେ ଉତ୍ତର କୋରିଆର ସିନିୟର ସେକେଣ୍ଡାରୀ ସ୍କୁଲରେ ପାଠ ପଢିବା ସହ ମିଲିଟାରୀ ୟୁନିଭର୍ସିଟିରେ ମଧ୍ୟ ଅଧ୍ୟୟନ କରିଛନ୍ତି। ଉଚ୍ଚଶିକ୍ଷା ପାଇଁ ସେ ସ୍ବିଜରଲାଣ୍ଡ ବି ଗସ୍ତ କରିଥିଲେ। ସେଠାରେ ସେ ଖୁବ୍ କମ୍ ସମୟ ଅଧ୍ୟୟନ କରିବା ପରେ ଘରକୁ ଫେରି ଆସିଥିଲେ। କୁହାଯାଏ ସେହି ସମୟରେ ସେ ନାଁ ପରିବର୍ତ୍ତନ କରି ରହୁଥିଲେ। ସେତେବେଳେ ବି ସେ କଡା ସୁରକ୍ଷା ମଧ୍ୟରେ ରହୁଥିଲେ। ଯେକିତିକି କିମଙ୍କ କୌଣସି କଥା ତାଙ୍କ ଦ୍ୱାରା ପଦାକୁ ନ ଆସୁ। ରାଜନୀତି ଓ ଗଣମାଧ୍ୟମଠାରୁ ବହୁ ହୂରରେ ରଖାଯାଉଥିଲା କିମ୍ ୟୋଙ୍କୁ। ପ୍ରଥମେ ସେ ତାଙ୍କ ପିତାଙ୍କ ସହ ୨୦୧୦ରେ ଓ୍ବାର୍କସ ପାର୍ଟି ଅଫ୍ କୋରିଆର କନଭେନଶନରେ ଯୋଗ ଦେଇଥିଲେ। ବିବାହର ମାତ୍ର ୫ ବର୍ଷ ପରେ କିମ୍ ୟୋଙ୍କ ସ୍ବାମୀଙ୍କର ଏକ ଦୁର୍ଘଟଣାରେ ମୃତ୍ୟୁ ହୋଇଥିଲା। ଏହାପରେ ସେ ତାଙ୍କ ଭାଇଙ୍କ ସହ ମିଶି ସକ୍ରିୟ ରାଜନୀତିରେ ଦେଖାଦେଇଥିଲେ। କିମଙ୍କ ରାଜନୈତିକ ପରାମର୍ଶଦାତା ସହ ସେ ବିଭିନ୍ନ ଗୁରୁତ୍ୱପୂର୍ଣ୍ଣ କାର୍ଯ୍ୟର ଦାୟିତ୍ୱ ମଧ୍ୟ ବହନ କରିଛନ୍ତି। ତେଣୁ କିମ୍ ଏବେ ତାଙ୍କ ସାନ ଭଉଣୀଙ୍କୁ ଆଉ କିଛି ଗୁରୁତ୍ୱପୂର୍ଣ୍ଣ ଦାୟିତ୍ୱ ଦେଇଥିବା କୁହାଯାଏ।
