ଦୁଇ ବଡ଼ ଦଳର ତିକ୍ତତାପୂର୍ଣ୍ଣ ମାରାଥନ୍ ପ୍ରଚାର ଶେଷରେ ନୂଆ ରାଷ୍ଟ୍ରପତିଙ୍କୁ ବାଛିବା ପାଇଁ ନଭେମ୍ବର ୫ରେ ଭୋଟ ଦେଇଛନ୍ତି ଆମେରିକୀୟ ମତଦାତା। ଡେମୋକ୍ରାଟ୍ ଉପରାଷ୍ଟ୍ରପତି କମଲା ହାରିସ୍ ଦେଶର ପ୍ରଥମ ମହିଳା ରାଷ୍ଟ୍ରପତି ହେବେ ନା ରିପବ୍ଲିକାନ୍ ଓଲ୍ଡ ହର୍ସ ଡୋନାଲ୍ଡ ଟ୍ରମ୍ପ୍ ୪ ବର୍ଷର ବ୍ୟବଧାନ ପରେ ପୁଣି ହ୍ବାଇଟ୍ ହାଉସ୍କୁ ଫେରିବେ ତାହା ସ୍ଥିର ହୋଇସାରିଛି । ଫଳାଫଳ ପ୍ରକାଶ ପାଇବା ପୂର୍ବରୁ ବିଭିନ୍ନ ଅନ୍ତର୍ଜାତୀୟ ଗଣମାଧ୍ୟମ ପକ୍ଷରୁ କରାଯାଇଥିବା ଭିନ୍ନ ଭିନ୍ନ ଆକଳନ:
ବିବିସି
୭ ସୁଇଙ୍ଗ୍ ଷ୍ଟେଟ୍ ନିର୍ବାଚନ ଫଳାଫଳକୁ ସ୍ଥିର କରିବେ। ପ୍ରାକ୍ ନିର୍ବାଚନୀ ସର୍ଭେଠାରୁ ଅଳ୍ପ କିଛି ପଏଣ୍ଟର ଫରକ୍ ଆସିଲେ ସୁଇଙ୍ଗ୍ ଷ୍ଟେଟ୍ଗୁଡ଼ିକରେ ବିଜୟୀ ପ୍ରାର୍ଥୀଙ୍କ ବ୍ୟବଧାନ ବଢ଼ିବ।
ଓ୍ବାଶିଂଟନ ପୋଷ୍ଟ
ସେପ୍ଟେମ୍ବର ଯାଏ ଟ୍ରମ୍ପ୍ ଆଗରେ ଥିଲେ। ଏହା ପରଠାରୁ ନିର୍ବାଚନରେ ପ୍ରତିନ୍ଦ୍ୱନ୍ଦ୍ୱିତା ଅଧିକ ତୀବ୍ର ହୋଇଛି। ଆରିଜୋନା, ନର୍ଥ କ୍ୟାରୋଲିନା ପରି ରାଜ୍ୟରେ ଟ୍ରମ୍ପ୍ଙ୍କ ଲିଡ୍ କମିଛି। ମିଶିଗାନ୍, ପେନ୍ସିଲ୍ଭାନିଆ ଓ ଓ୍ବିସ୍କୋନ୍ସିନରେ ହାରିସ୍ଙ୍କ ସ୍ଥିତି ଦୃଢ଼ ରହିଛି।
ରଏଟର୍ସ
ପ୍ରାରମ୍ଭିକ ଗଣତି ସର୍ବଦା ଭ୍ରମାତ୍ମକ ହୋଇଥାଏ। ସେଥିପାଇଁ ଭୋଟ ଗଣତିର ଶେଷ ପର୍ଯ୍ୟନ୍ତ ଅପେକ୍ଷା କରିବାକୁ ପଡ଼ିବ। ଅଧିକ ଜନସଂଖ୍ୟା ଥିବା ସହରାଞ୍ଚଳଗୁଡ଼ିକରେ ଗଣତି ଲମ୍ବା ସମୟ ଧରି ଚାଲିବ।
ନ୍ୟୁୟର୍କ ଟାଇମ୍ସ
କଡ଼ା ପ୍ରତିଦ୍ୱନ୍ଦ୍ୱିତା ହେବ ବୋଲି କହିହେବ ନାହିଁ। ପ୍ରତି ସର୍ଭେର କିଛି ମାର୍ଜିନ ଅଫ୍ ଏରର୍ ରହିଥାଏ। ଫଳାଫଳ ଏକତରଫା ମଧ୍ୟ ହୋଇପାରେ। ୭ ସୁଇଙ୍ଗ୍ ଷ୍ଟେଟ୍ ହାରିସ୍ଙ୍କ ସପକ୍ଷରେ ଗଲେ ୩୧୯ ଇଲେକ୍ଟୋରାଲ ଭୋଟ ସହ ସେ ବିଜୟୀ ହେବେ। କିନ୍ତୁ ଏହି ରାଜ୍ୟଗୁଡ଼ିକରୁ ଟ୍ରମ୍ପ୍ ଅଧିକ ସମର୍ଥନ ପାଇଲେ ସେ ୩୧୨ ଇଲେକ୍ଟୋରାଲ ଭୋଟ ସହ ବିଜୟୀ ହେବେ।
ସିଏନ୍ଏନ୍
କଡ଼ା ମୁକାବିଲା ହେଉଥିବାରୁ କିଏ ଜିତିବା ଆକଳନ କରିବା କଷ୍ଟକର। ପ୍ରଚାର ଆରମ୍ଭର ପ୍ରାରମ୍ଭିକ ସମୟରେ ଏହା ଟ୍ରମ୍ପ୍ଙ୍କ ସପକ୍ଷରେ ଗଣମତ ପରି ମନେହେଉଥିଲା। ତେବେ ଜୋ ବାଇଡେନ୍ ନିର୍ବାଚନରୁ ଓହରି ହାରିସ୍ଙ୍କୁ ପ୍ରାର୍ଥୀ କରିବା ପରେ ନିର୍ବାଚନର ଟ୍ରେଣ୍ଡ୍ରେ ପରିବର୍ତ୍ତନ ଆସିଥିଲା।
