ନୂଆଦିଲ୍ଲୀ,୧୬।୧୨: ୫ ଥର ଆଇପିଏଲ ଟ୍ରଫି ଜିତାଇଥିବା ଅଧିନାୟକ ରୋହିତ ଶର୍ମାଙ୍କ ସ୍ଥାନରେ ମୁମ୍ବାଇ ଇଣ୍ଡିଆନ୍ସ ଦଳ ହାର୍ଦ୍ଦିକ ପାଣ୍ଡ୍ୟାଙ୍କୁ ଏହାର ନୂତନ ଅଧିନାୟକ ଭାବେ ନିଯୁକ୍ତ କରିଛି। ଭବିଷ୍ୟତକୁ ଦୃଷ୍ଟିରେ ରଖି ଏଭଳି ନିଷ୍ପତ୍ତି ନେଇଛନ୍ତି ବୋଲି ମୁମ୍ବାଇ ଇଣ୍ଡିଆନ୍ସ ଯୁକ୍ତି ବାଢିଛି। ତେବେ ଚେନ୍ନାଇ ସୁପର କିଙ୍ଗ୍ସର ଅବସ୍ଥା ମଧ୍ୟ ମୁମ୍ବାଇ ଭଳି। ଚେନ୍ନାଇକୁ ମଧ୍ୟ ମହେନ୍ଦ୍ର ସିଂ ଧୋନି ୫ଥର ଚାମ୍ପିୟନ କରାଇଛନ୍ତି ଏବଂ ବୋଧହୁଏ ଆଇପିଏଲ ୨୦୨୪ ଅଧିନାୟକ ତଥା ଖେଳାଳି ଭାବରେ ତାଙ୍କର ଶେଷ ସିଜନ ହୋଇପାରେ। ଏଭଳି ପରିସ୍ଥିତିରେ ଧୋନିଙ୍କ ପରେ ଚେନ୍ନାଇ ସୁପର କିଙ୍ଗ୍ସର ଅଧିନାୟକ କିଏ ହେବେ? ସେନେଇ ଚର୍ଚ୍ଚା ଆରମ୍ଭ ହୋଇଯାଇଛି।
ପ୍ରକୃତରେ, ମୁମ୍ବାଇ ପରି ଚେନ୍ନାଇ ମଧ୍ୟ ଆଇପିଏଲ ୨୦୨୨ରେ ଧୋନିଙ୍କ ଉପସ୍ଥିତିରେ ଭବିଷ୍ୟତକୁ ଦୃଷ୍ଟିରେ ରଖି ରବିନ୍ଦ୍ର ଜାଡେଜାଙ୍କୁ ଅଧିନାୟକ କରିଥିଲା, କିନ୍ତୁ ସିଏସକେର ଏହି ପଦକ୍ଷେପ ଭଲରେ ଚାଲି ନ ଥିଲା ଏବଂ ସିଜିନ୍ ମଧ୍ୟରେ ଧୋନିଙ୍କୁ ପୁଣିଥରେ ଅଧିନାୟକତ୍ୱ ଗ୍ରହଣ କରିବାକୁ ପଡିଲା। ଏହା ପରେ ଧୋନି ପୁଣି ଥରେ ଚେନ୍ନାଇ ସୁପର କିଙ୍ଗ୍ସକୁ ଆଇପିଏଲ ୨୦୨୩ରେ ଚାମ୍ପିୟନ କରାଇଥିଲେ ଏବଂ ବର୍ତ୍ତମାନ ଆଇପିଏଲ ୨୦୨୪ ପାଇଁ ମଧ୍ୟ ଚେନ୍ନାଇ ସୁପର କିଙ୍ଗ୍ସ ମହେନ୍ଦ୍ର ସିଂ ଧୋନିଙ୍କୁ ଏହାର ଅଧିନାୟକ ଭାବେ ଘୋଷଣା କରିଛନ୍ତି।
ଏପରି ପରିସ୍ଥିତିରେ, ଯଦି ଧୋନି ଆଇପିଏଲ ୨୦୨୪ ପରେ ଅବସର ନେବେ, ତା’ହେଲେ ତାଙ୍କ ସ୍ଥାନରେ ଚେନ୍ନାଇ ସୁପର କିଙ୍ଗ୍ସର ଅଧିନାୟକ କିଏ ହେବେ? ବର୍ତ୍ତମାନ ଏହି ପ୍ରଶ୍ନର ଉତ୍ତର ଦେବା ଅତ୍ୟନ୍ତ କଷ୍ଟକର, କିନ୍ତୁ ତଥାପି କିଛି ଖେଳାଳି ଅଛନ୍ତି ଯେଉଁମାନଙ୍କ ଉପରେ ଚେନ୍ନାଇ ଦଳ ବେଟ୍ ଲଗାଇପାରେ। ସେହି ଖେଳାଳିମାନଙ୍କ ମଧ୍ୟରୁ ଜଣେ ହେଉଛନ୍ତି ଋତୁରାଜ ଗାଇକୱାଡ।
