ମୁମ୍ବାଇ,୧୨।୨ : ଶିବସେନା (ଉଦ୍ଧବ ଦଳ) ନେତା ସଞ୍ଜୟ ରାଉତ ପୁଣି ଥରେ ମହାରାଷ୍ଟ୍ରର ମୁଖ୍ୟମନ୍ତ୍ରୀ ଏକନାଥ ଶିନ୍ଦେ ସରକାରଙ୍କ ବିରୋଧରେ ସ୍ବର ଉତ୍ତୋଳନ କରିଛନ୍ତି। ସୁପ୍ରିମକୋର୍ଟରେ ସରକାରଙ୍କ ବିରୋଧରେ ଚାଲିଥିବା ମାମଲାରେ ସତ୍ୟର ବିଜୟ ହେବ ବୋଲି ସେ କହିଛନ୍ତି। ସୁପ୍ରିମକୋର୍ଟରେ ଦାଖଲ ହୋଇଥିବା ଅଯୋଗ୍ୟତା ଆବେଦନ ଉପରେ ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସଙ୍କ ମନ୍ତବ୍ୟ ପରେ ସଞ୍ଜୟ ରାଉତଙ୍କ ବିବୃତ୍ତି ଆସିଛି।
ଫଡନାଭିସ କହିଥିଲେ ଯେ ଅଯୋଗ୍ୟତା ଆବେଦନକୁ ନେଇ ସୁପ୍ରିମକୋର୍ଟ ତାଙ୍କ ସପକ୍ଷରେ ଏକ ରାୟ ଦେବେ। ସେ କହିଛନ୍ତି ଯେ ମହାରାଷ୍ଟ୍ରରେ ଶାସକ ଏକନାଥ ଶିନ୍ଦେ-ଭାଜପା ମିଳିତ ମଞ୍ଚ ଏକ ବୈଧ ସରକାର। ସାମ୍ବିଧାନିକ ନିୟମ ଅନୁଯାୟୀ ଏବଂ ଆଇନ ଠିକ ଭାବରେ ଅଧ୍ୟୟନ କରାଯାଇଥିବାରୁ ଆମେ ଯାହା କରିଛୁ ତାହା ଆଇନଗତ ଅଟେ, ତେଣୁ ଫଳାଫଳ ଆମ ସପକ୍ଷରେ ରହିବ।
ସଞ୍ଜୟ ରାଉତ ଏକ ଟୁଇଟରେ କହିଛନ୍ତି ଯେ ମାନ୍ୟବର ସୁପ୍ରିମକୋର୍ଟ କିମ୍ବା ନିର୍ବାଚନ ଆୟୋଗ ଏଭଳି ଲୋକଙ୍କ କଥା ପ୍ରତି ପ୍ରତି ଧ୍ୟାନ ଦେଇ ନ ଥାନ୍ତି। ବିଜୟ କେବଳ ସତ୍ୟର ହେବ। ମାନ୍ୟବର ସୁପ୍ରିମକୋର୍ଟ ତାଙ୍କ ସପକ୍ଷରେ ଏକ ରାୟ ଦେବେ ବୋଲି ଦାବି କରିବାକୁ ଦେବେନ୍ଦ୍ର ଫଡନାଭିସ କିଏ? ନାରାୟଣ ରାଣେ ଘୋଷଣା କରିଛନ୍ତି ଯେ ନିର୍ବାଚନ ଆୟୋଗ ଶିନ୍ଦେଙ୍କୁ ଶିବସେନାର ନିର୍ବାଚନୀ ଚିହ୍ନ ଦେବେ। ଏଭଳି କହିବାକୁ ସେ କିଏ ବୋଲି ସଞ୍ଜୟ କହିଛନ୍ତି।
