ନୂଆଦିଲ୍ଲୀ,୨।୬: ଭାରତୀୟ କ୍ରିକେଟ୍ ଦଳର ପୂର୍ବତନ ବିସ୍ଫୋରକ ବ୍ୟାଟ୍ସମ୍ୟାନ ବୀରେନ୍ଦ୍ର ସେହ୍ବାଗ ମହେନ୍ଦ୍ର ସିଂ ଧୋନୀଙ୍କୁ ନେଇ ବଡ଼ ଖୁଲାସା କରିଛନ୍ତି। ସେ କହିଛନ୍ତି, ୨୦୦୮ ଅଷ୍ଟ୍ରେଲିଆ ଗସ୍ତ ସମୟରେ ଦିନିକିଆ କ୍ରିକେଟରୁ ଅବସର ନେବାକୁ ଚାହୁଁଥିଲି। ଏହାର କାରଣ ଥିଲେ ଏମଏସ ଧୋନୀ। କିଛି ମ୍ୟାଚରେ ଫ୍ଲପ ହେତୁ ଅଧିନାୟକ ମାହି ଖେଳୁଥିବା ଏକାଦଶରୁ ମୋତେ ବାଦ୍ ଦେଇଥିଲେ। ଏହାପରେ ମୁଁ ଦିନିକିଆରୁ ଅବସର ନେଇ ଟେଷ୍ଟ କ୍ରିକେଟ୍ ଉପରେ ଅଧିକ ଧ୍ୟାନ ଦେବାକୁ ଚାହୁଁଥିଲି। କିନ୍ତୁ ସଚିନ ତେନ୍ଦୁଲକର ତାଙ୍କୁ ଅବସର ନେବାରୁ ରୋକିଥିଲେ। ସେ କହିଥିଲେ ଯେ ଏହା ତୁମ ଜୀବନର ଏହା ଏକ ଖରାପ ପର୍ଯ୍ୟାୟ। ଟିକିଏ ଅପେକ୍ଷା କର। ଏହି ଗସ୍ତ ପରେ ଘରକୁ ଫେରି ଗମ୍ଭୀର ଭାବରେ ଚିନ୍ତା କର ଏବଂ ତା’ପରେ ପରବର୍ତ୍ତୀ ସମୟରେ କ’ଣ କରିବ ତାହା ସ୍ଥିର କରିବ। ସୌଭାଗ୍ୟବଶତଃ ମୁଁ ସେତେବେଳେ ମୋର ଅବସର ଘୋଷଣା କରି ନ ଥିଲି। ସମୟ ବଦଳିଗଲା। ଆମେ ଭାରତକୁ ଫେରିଲୁ। କେ ଶ୍ରୀକାନ୍ତ ସେହି ସମୟରେ ମୁଖ୍ୟ ଚୟନକର୍ତ୍ତା ଥିଲେ। ସେ ମୋତେ ପଚାରିଲେ କଣ କରିବି? ମୁଁ କହିଲି ମୋର ଭଲ ଫର୍ମ ସତ୍ତ୍ୱେ ମୋତେ ୩-୪ ମ୍ୟାଚରୁ ଡ୍ରପ୍ କରାଯାଇଛି। ତେବେ, ମୁଁ କ’ଣ କରିବି?
ମୁଁ ଶ୍ରୀକାନ୍ତଙ୍କୁ କହିଥିଲି ଯେ ଯଦି ତୁମେ ମୋତେ ନିଶ୍ଚିତ କର ଯେ ତୁମେ ମୋତେ ସମସ୍ତ ମ୍ୟାଚ୍ରେ ଏକାଦଶରେ ସ୍ଥାନ ଦେବ, ତେବେ ତୁମେ ମୋତେ ଦଳରେ ନିଅ, ନଚେତ୍ ରହିବାକୁ ଦିଅ। ତା’ପରେ ଶ୍ରୀକାନ୍ତ ୨୦୦୮ ଏସିଆ କପ ସମୟରେ ଏମଏସ ଧୋନୀଙ୍କ ସହ କଥା ହୋଇଥିଲେ। ତା’ପରେ ନିୟମିତ ଭାବେ ଦଳରେ ଖେଳି ଆସିଥିଲି।
ସେହ୍ବାଗ ଶେଷ ଥର ପାଇଁ ୨୦୧୩ ରେ ଭାରତ ପାଇଁ ଖେଳିଥିଲେ। ସେ ଭାରତ ପାଇଁ ୧୦୪ ଟେଷ୍ଟରେ ୮୫୮୬ ରନ, ୨୫୧ ଦିନିକିଆରେ ୮୨୭୩ ରନ ଏବଂ ୧୯ ଟି -୨୦ ମ୍ୟାଚରେ ୩୯୪ ରନ କରିଛନ୍ତି।
