ଅଭିନେତା ସୁଶାନ୍ତ ସିଂ ରାଜପୁତ ଆତ୍ମହତ୍ୟା ମାମଲାରେ ଡ୍ରଗ୍ସ କନେକ୍ସନ ଆସିବା ପରେ ଅଭିନେତ୍ରୀ ରିୟା ଚକ୍ରବର୍ତ୍ତୀ ୧୪ ଦିନ ଜେଲରେ ଅଛନ୍ତି। ଅନେକ ଚଳଚ୍ଚିତ୍ର ବ୍ୟକ୍ତିତ୍ୱ ରିୟାଙ୍କୁ ସମର୍ଥନ କରି ଗଣମାଧ୍ୟମର ଭୂମିକା ଉପରେ ପ୍ରଶ୍ନ କରିଛନ୍ତି। ଜଣାଶୁଣା ଗାୟିକ ଚିନ୍ମୟ ଶ୍ରୀପଡା ରିୟାଙ୍କ ମାମଲାକୁ ଭେଟେରାନ ଅଭିନେତ୍ରୀ ରେଖାଙ୍କ ମିଡିଆ ଟ୍ରାଏଲ ସହିତ ତୁଳନା କରିଛନ୍ତି। ଚିନ୍ମୟ ଟୁଇଟରରେ ରେଖାଙ୍କ ଜୀବନୀରୁ କିଛି ଉଦ୍ଧୃତ ଅଂଶ ପୋଷ୍ଟ କରିଛନ୍ତି। ଏଥିରେ ଦର୍ଶାଯାଇଛି ଯେ ରେଖାଙ୍କ ସ୍ବାମୀ ମୁକେଶ ଅଗ୍ରୱାଲ ଆତ୍ମହତ୍ୟା କରିଥିଲେ। ଏହା ପରେ ରେଖାଙ୍କ ଶାଶୁ ଏବଂ ବଲିଉଡ ସେଲିବ୍ରିଟିମାନେ ତାଙ୍କ ପ୍ରତି କିପରି ବ୍ୟବହାର କରିଥିଲେ। ୧୯୯୦ରେ ରେଖା ମୁକେଶଙ୍କୁ ବିବାହ କରିଥିଲେ। ଏହାର ପରବର୍ତ୍ତୀ ବର୍ଷ ଅର୍ଥାତ ୧୯୯୧ରେ, ରେଖାଙ୍କ ସ୍ବାମୀ ଓଢଣୀ ସାହାଯ୍ୟରେ ଫାଶୀ ଲଗାଇ ଆତ୍ମହତ୍ୟା କରିଥିଲେ। ସେତେବେଳେ ଖବର ଆସିଥିଲା ଯେ ଯେଉଁ ଓଢଣୀ ଦ୍ୱାରା ମୁକେଶ ଫାଶୀ ଲଗାଇଥିଲେ ସେହି ଓଢଣୀଟି ରେଖାଙ୍କର ଥିଲା। ଏହାପରେ ରେଖାଙ୍କୁ ଅନେକ ବିରୋଦର ସାମ୍ନା କରିବାକୁ ପଡିଥିଲା। ଏପରିକି ମୁକେଶଙ୍କ ମା’ ତାଙ୍କୁ ଡାହାଣୀ, ମୋ ପୁଅକୁ ଖାଇଲୁ ବୋଲି କହିଥିଲେ। ସେତେବେଳେ ଗଣମାଧ୍ୟମ ମଧ୍ୟ ତାଙ୍କୁ ନେଇ ବେଶ୍ ଚର୍ଚ୍ଚା କରି ତାଙ୍କୁ ଭିଲିଆନ୍ ଆଖ୍ୟା ଦେଇଥିଲା ବୋଲି ଚିନ୍ମୟୀ କହିଛନ୍ତି। ଏଭଳି ଘଟଣା ପରେ ରେଖା ଦୃଢତାର ସହ କମବ୍ୟାକ୍ କରିଥିଲେ। ଅନେକ ଫିଲ୍ମ ଅଭିନୟ କରି ପ୍ରଶଂସା ସାଉଁଟିଥିଲେ।
