କୋଲକାତା,୨୫।୪: ପଶ୍ଚିମବଙ୍ଗର ଖାରଦା ବିଧାନସଭା ଆସନରୁ ଲଢୁଥିବା ତୃଣମୂଳ କଂଗ୍ରେସ ପ୍ରାର୍ଥୀ କାଜଲ ସିହ୍ନାଙ୍କ ରବିବାର ଦେହାନ୍ତ ହୋଇଛି। ସେ କରୋନାରେ ସଂକ୍ରମିତ ହୋଇଥିଲେ। ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଟୁଇଟରରେ ଏହି ସୂଚନା ଦେଇଛନ୍ତି। ଏହା ସହିତ ମମତା କାଜଲ ସିହ୍ନାଙ୍କ ପରିବାର ଲୋକଙ୍କୁ ସମବେଦନା ଜଣାଇଛନ୍ତି। ଗୋଟିଏ ପରେ ଗୋଟିଏ ପ୍ରାର୍ଥୀ କରୋନା ଆକ୍ରାନ୍ତ ହେବା ଦେଖି ମମତାଙ୍କ ତୃଣମୂଳ କଂଗ୍ରେସ ଭାଙ୍ଗି ପଡିଛି।
ସୂଚନାଯୋଗ୍ୟ, ବେଙ୍ଗଲ ନିର୍ବାଚନ ସମୟରେ ଏପର୍ଯ୍ୟନ୍ତ କରୋନା ଭାଇରସ ଯୋଗୁ ତିନି ଜଣ ପ୍ରାର୍ଥୀଙ୍କ ମୃତ୍ୟୁ ହୋଇଥିବାବେଳେ ଷ୍ଟାର ପ୍ରଚାରକ ଆଦିର ରଂଜନ ଚୌଧୁରୀ ଏବଂ ମନୋଜ ତିୱାରୀଙ୍କ ବ୍ୟତୀତ ଅତିକମରେ ୬ ଜଣ ପ୍ରାର୍ଥୀ କରୋନା ସଂକ୍ରମିତ ହୋଇଛନ୍ତି। ଏହାର କିଛି ସମୟ ପୂର୍ବରୁ ତୃଣମୂଳ କଂଗ୍ରେସର ବରିଷ୍ଠ ନେତା ଡା. ଶଶି ପାଞ୍ଜା ଏବଂ ସାଧନ ପାଣ୍ଡେ ମଧ୍ୟ ଏହି ଜୀବାଣୁ ସଂକ୍ରମିତ ହୋଇଥିବା ଜଣାପଡିଛି। ସୂଚନାଯୋଗ୍ୟ, ଶନିବାର ପଶ୍ଚିମବଙ୍ଗରେ ଗୋଟିଏ ଦିନରେ ସର୍ବାଧିକ ୧୪,୨୮୧ ରୋଗୀଙ୍କ ସଂଖ୍ୟା ରିପୋର୍ଟ ହେବା ପରେ ରାଜ୍ୟରେ ସମୁଦାୟ ସଂକ୍ରମିତ ଲୋକଙ୍କ ସଂଖ୍ୟା ୭,୨୮,୦୬୧କୁ ବୃଦ୍ଧି ପାଇଛି। ସଂକ୍ରମଣ ହେତୁ ୫୯ ଜଣ ରୋଗୀଙ୍କ ମୃତ୍ୟୁ ପରେ ମୋଟ ମୃତକଙ୍କ ସଂଖ୍ୟା ୧୦,୯୯୪ କୁ ବୃଦ୍ଧି ପାଇଛି।
