ପଶ୍ଚିମବଙ୍ଗ, ୨୩।୩: ରାଜନୀତିରେ କିଛି ବି ସମ୍ଭବ ହୋଇପାରେ। ଏ ହେଉଛନ୍ତି ୩୨ ବର୍ଷିୟା କଲିତା ମାଝି। କଲିତା ଅନ୍ୟର ଘରେ ସହାୟିକା ଭାବେ କାମ କରନ୍ତି। ଝାଡୁ, ପୋଛା ଠାରୁ ଆରମ୍ଭ କରି ବାସନ ମାଜିବା, କପାଡ଼ା ସଫା ଆଦି ସେ କରିଥାନ୍ତି। ଅନେକ ଦିନ ହେବ ସେ ସମାଜ ସେବା ମଧ୍ୟ କରିଆସୁଛନ୍ତି। ତେଣୁ ଭାଜପା ତାଙ୍କୁ ପୂର୍ବ ବର୍ଦ୍ଧମାନର ଆୟୁସ ଗ୍ରାମ ବିଧାନସଭା ଆସନରୁ ଟିକେଟ ଦେଇ ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଛି। ଏବେ କଲିତା ନିର୍ବାଚନ ଲଢ଼ିବା ପାଇଁ ନିଜ ମାଲିକମାନଙ୍କଠାରୁ ଦେଢ଼ ମାସର ଛୁଟି ନେଇଛନ୍ତି।
କାଲିତା ଗୁସକରା ମ୍ୟୁନିସିପାଲଟିର ମାଝପୁକୁରପରାସ୍ଥିତ ପାତ୍ରପଡ଼ାର ଏକ ବସ୍ତିରେ ରୁହନ୍ତି। ତାଙ୍କ ସ୍ବାମୀ ପ୍ଲମ୍ବର କାମ କରନ୍ତି। ତାଙ୍କର ଏକମାତ୍ର ପୁଅ ଯିଏକି ୮ମ କ୍ଳାସରେ ପାଠ ପଢ଼ୁଛନ୍ତି। କଲିତାଙ୍କ ବାପ ଘର ମଙ୍ଗଳକୋଟର କାଶମନଗରରେ। କଲିତା ମାସକୁ ୨,୫୦୦ ଆୟ କରିଥାନ୍ତି। ଗତ ୫ ବର୍ଷ ହେବ ସେ ସମାଜସେବା କରୁଛନ୍ତି। ତାଙ୍କର ଏମିତି କାମ ଭାଜପାକୁ ପସନ୍ଦ ଆସିଛି। ତେବେ ଭାଜପା ଟିକେଟ ଦେଇଥିବା ତାଙ୍କୁ ବିଶ୍ୱାସ ହେଉ ନ ଥିବା କଲିତା କହିଛନ୍ତି। ଏହା ତାଙ୍କ ପାଇଁ ଏକ ବଡ଼ ଚ୍ୟାଲେଞ୍ଜ ବୋଲି ସେ କହିଛନ୍ତି। ଯଦି ସେ ଏହି ନିର୍ବାଚନ ଜିତିବେ ସର୍ବପ୍ରଥମେ ଚିକିତ୍ସାକୁ ପ୍ରାଧାନ୍ୟ ଦେବେ। ହସ୍ପିଟାଲ ନିର୍ମାଣ କରିବା ତାଙ୍କର ପ୍ରଥମ କାମ ରହିବ ବୋଲି ସେ କହିଛନ୍ତି।
