ତେହରାନ, ୮।୬: ପଶ୍ଚିମ ଇରାନରେ ପରବର୍ତ୍ତୀ ସୂଚନା ପର୍ଯ୍ୟନ୍ତ ସମସ୍ତ ବିମାନବନ୍ଦରକୁ ବନ୍ଦ କରିଦିଆଯାଇଛି। ସମସ୍ତ ଭାରତୀୟ ନାଗରିକଙ୍କୁ ଯଥାଶୀଘ୍ର ସମ୍ଭବ ଯେକୌଣସି ଉପାୟରେ ଇରାନ ଛାଡ଼ିବାକୁ ନିର୍ଦ୍ଦେଶ ଜାରି କରାଯାଇଛି। ଅନ୍ୟପଟେ, ଇସ୍ରାଏଲରେ ସୋମବାର ସକାଳୁ କ୍ରମାଗତ ଆକ୍ରମଣ ଯୋଗୁଁ ସାଇରନ ଶବ୍ଦ ଶୁଣାଯାଉଛି। ମାତ୍ର ୨୪ ଘଣ୍ଟା ମଧ୍ୟରେ ମଧ୍ୟପ୍ରାଚ୍ୟ (ମିଡିଲ ଇଷ୍ଟ)ର ଚିତ୍ର ପୁଣି ଥରେ ବଦଳିଯାଇଛି। ଭୂମିରେ ଧ୍ୱଂସାବଶେଷର ସ୍ତୂପ ଏବଂ ଆକାଶରେ ବାରୁଦର ଆସ୍ତରଣ ଛାଇ ହୋଇରହିଛି।
ଏହି ସମୟରେ, ଇରାନ ବିରୋଧରେ ଯୁଦ୍ଧର ସୂତ୍ରପାତ କରିଥିବା ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଅସହାୟ ମନେହେଉଛନ୍ତି। ପରିସ୍ଥିତି ଏପରି ହୋଇଛି ଯେ ତାଙ୍କର ନିକଟତମ ସହଯୋଗୀ ଇସ୍ରାଏଲର ପ୍ରଧାନମନ୍ତ୍ରୀ ବେଞ୍ଜାମିନ ନେତନ୍ୟାହୁ ତାଙ୍କ କଥା ଶୁଣୁନାହାନ୍ତି। ଟ୍ରମ୍ପଙ୍କୁ ସୋସିଆଲ ମିଡିଆ ମାଧ୍ୟମରେ ଇରାନ ଏବଂ ଇସ୍ରାଏଲକୁ ଯୁଦ୍ଧ ବନ୍ଦ କରିବା ପାଇଁ ଅପିଲ କରିବାକୁ ପଡ଼ିଛି।
ପ୍ରକୃତରେ, ଏହି ସଂଘର୍ଷ ସେତେବେଳେ ତୀବ୍ର ରୂପ ଧାରଣ କଲା ଯେତେବେଳେ ଇସ୍ରାଏଲ ଲେବାନନରେ ହିଜବୁଲ୍ଲାର ଆଡ୍ଡାଗୁଡ଼ିକୁ ଟାର୍ଗେଟ କଲା। ଇରାନ ପୂର୍ବରୁ ହିଁ ଚେତାବନୀ ଦେଇ ସାରିଥିଲା ଯେ ଯଦି ହିଜବୁଲ୍ଲା ଉପରେ ଆକ୍ରମଣ ହୁଏ, ତେବେ ସେ ଚୁପ ବସିବ ନାହିଁ। ଇସ୍ରାଏଲର ଆକ୍ରମଣର ଜବାବରେ ଇରାନ ପାଲଟା ଆକ୍ରମଣ କରିଥିଲା ଏବଂ ଦେଖୁଦେଖୁ ଏହି ସଂଘର୍ଷ ସିଧାସଳଖ ତେହରାନ ଏବଂ ତେଲ ଆଭିଭ ମଧ୍ୟରେ ମହାଯୁଦ୍ଧରେ ପରିଣତ ହୋଇଗଲା।
