ସିମୁଳିଆ, ୧୫।୪(ସନ୍ତୋଷ କୁମାର ନାୟକ): ବାଲେଶ୍ୱର ଜିଲା ସିମୁଳିଆ ଥାନାଠାରୁ ୧ କିମି. ଦୂର ୧୬ନଂ ଜାତୀୟ ରାଜପଥର କଣିଆରି ଛକ ନିକଟରେ ବରଯାତ୍ରୀ ମିନି ବସ (ଟ୍ରାଭଲର- ଓଡି୩ଏଏମ୩୩୩୭) ଦୁର୍ଘଟଣାଗ୍ରସ୍ତ ହୋଇଛି। ବର ମହମ୍ମଦ ହୁସେନ କାଦ୍ରି (୩୫) ଓ କନ୍ୟା ନୁରୀ ସାବା(୨୦)ଙ୍କ ସମେତ ୧୩ଜଣ ଯାତ୍ରୀ ଆହତ ହୋଇଥିବାବେଳେ ଏମିଡି ଫୋରମ(୪୫) ନାମକ ଜଣେ ବ୍ୟକ୍ତିଙ୍କର ମୃତ୍ୟୁ ଘଟିଛି ।
ଗତ ସୋମବାର ରାତିରେ ଭୁବନେଶ୍ୱର ଡୁମୁଡୁମାର ଅହମ୍ମଦ ହୁସେନ କାଦ୍ରିଙ୍କ ବିବାହ ଉତ୍ସବରେ ୧୫ଜଣ ବରଯାତ୍ରୀ ପଡେଶୀ ରାଜ୍ୟ କୋଲକାତାର କ୍ଷିଦ୍ରୀପୁର ଅଞ୍ଚଳକୁ ବିବାହ ଉତ୍ସବରେ ଯୋଗ ଦେବା ପାଇଁ ଯାଇଥିଲେ। ମଙ୍ଗଳବାର ବିବାହ ଉତ୍ସବ ସାରିବାପରେ ରାତିରେ ଭୁବନେଶ୍ୱର ଅଭିମୁଖେ ବାହାରିଥିଲେ। ତେବେ କିଆରୀ ନିକଟରେ ବରଯାତ୍ରୀ ବସଟି ଭାରସାମ୍ୟ ହରାଇ ରାସ୍ତା ପାର୍ଶ୍ୱ ପାଣି ନାଳ ଭିତରକୁ ପଶିଯାଇ ଏକ ଗଛ ସହିତ ଧକ୍କା ହୋଇଥିଲା ।
ସ୍ଥାନୀୟ ଯୁବକମାନେ ଆହତମାନଙ୍କୁ ଉଦ୍ଧାର କରି ଆମ୍ବୁଲାନ୍ସ ଯୋଗେ ସିମୁଳିଆ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ । ଆହତ ମାନଙ୍କ ପ୍ରାଥମିକ ଚିକିତ୍ସା ପରେ ଭଦ୍ରକ ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତରିତ କରାଯାଇଛି। ଘଟଣାସ୍ଥଳରେ ପୋଲିସ ଓ ଦମକଳବାହିନୀ ପହଞ୍ଚି ଥିଲା।
ସୂଚନାଯୋଗ୍ୟ ଯେ, ଏହି ବସରେ ୪ଜଣ ଶିଶୁ, ୫ଜଣ ମହିଳା ଓ ୬ଜଣ ପୁରୁଷ ଥିଲେ । ଗାଡ଼ି ଚାଳକ ପ୍ରିୟବ୍ରତ ପାଢ଼ୀ (୩୪) ମଧ୍ୟ ଆହତ ହୋଇଛନ୍ତି । ତାଙ୍କ ଘର ନୟାଗଡ଼ ଅଞ୍ଚଳରେ ତାଙ୍କ ଆଗରେ ହଠାତ୍ ଅନ୍ୟ ଏକ ଗାଡ଼ି ବ୍ରେକ ମାରିବା ଯୋଗୁ ଭାରସାମ୍ୟ ହରାଇ ସେ ବାମପାର୍ଶ୍ୱକୁ କାଟିଦେବା ଯୋଗୁ ଭାରସାମ୍ୟ ହରାଇ ପାଣି ନାଳ ମଧ୍ୟକୁ ଟାଣିହୋଇ ଯାଇଥିବାର ଗାଡ଼ି ଚାଳକ କହିଥିଲେ।
Dharitri – Odisha’s No.1 Odia Daily
