ଚେନ୍ନାଇ,୪।୩ : ତାମିଲନାଡୁ ମୁଖ୍ୟମନ୍ତ୍ରୀ ଏମ.କେ ଷ୍ଟାଲିନ ଶନିବାର ବିହାରବାସୀଙ୍କ ଉପରେ ହୋଇଥିବା ଆକ୍ରମଣ ନେଇ କହିଛନ୍ତି ଯେ ପ୍ରବାସୀ ଶ୍ରମିକମାନେ ଭୟଭୀତ ହେବାର ଆବଶ୍ୟକତା ନାହିଁ। ଯଦି କେହି ଆପଣଙ୍କୁ ଧମକ ଦେଉଛନ୍ତି ତେବେ ହେଲ୍ପଲାଇନ ନମ୍ବରରେ ଫୋନ କରନ୍ତୁ। ତାମିଲନାଡୁ ସରକାର ଏବଂ ଲୋକମାନେ ଆମର ପ୍ରବାସୀ ଭାଇମାନଙ୍କୁ ସୁରକ୍ଷା ଦେବା ପାଇଁ ସେମାନଙ୍କ ସହିତ କାନ୍ଧକୁ କାନ୍ଧ ମିଶାଇ ଠିଆ ହୋଇଛନ୍ତି। ତାମିଲନାଡୁ ଏବଂ ବିହାରର ଅଧିକାରୀମାନେ ମଧ୍ୟ ଦକ୍ଷିଣ ରାଜ୍ୟକୁ ବିହାରରୁ ଆସିଥିବା ପ୍ରବାସୀ ଶ୍ରମିକଙ୍କ ଉପରେ ଗୁଜବ ପ୍ରଚାର କରୁଥିବା ଲୋକଙ୍କୁ ଚେତାବନୀ ଦେଇଛନ୍ତି।
ତାମିଲନାଡୁର ମୁଖ୍ୟମନ୍ତ୍ରୀ ଏମ.କେ ଷ୍ଟାଲିନଙ୍କ କାର୍ଯ୍ୟାଳୟ ସୂତ୍ରରୁ ପ୍ରକାଶ ଯେ ବିହାର ଅଧିକାରୀମାନେ କହିଛନ୍ତି ଯେ ସେମାନେ ସ୍ଥାନୀୟ ଅଧିକାରୀଙ୍କ ସହ ପ୍ରବାସୀ ଶ୍ରମିକଙ୍କୁ ଭେଟିବେ। ଅନ୍ୟପକ୍ଷରେ ତାମିଲନାଡୁର ଜିଲା ମାଜିଷ୍ଟ୍ରେଟମାନେ ପ୍ରବାସୀ ଶ୍ରମିକମାନଙ୍କୁ ଭୟ ନ କରିବାକୁ ହିନ୍ଦୀରେ ଅପିଲ କରିଛନ୍ତି। ବିହାରର ପ୍ରବାସୀ ଶ୍ରମିକଙ୍କ ଉପରେ ହୋଇଥିବା ଗୁଜବ ଯାଞ୍ଚ କରିବା ପାଇଁ ଉଭୟ ରାଜ୍ୟର ପୋଲିସ ମଧ୍ୟ ସୋସିଆଲ ମିଡିଆ ଉପରେ ତୀକ୍ଷଣ ନଜର ରଖିଛି।
ବିହାରର ଶ୍ରମିକମାନଙ୍କ ଉପରେ ହୋଇଥିବା ଆକ୍ରମଣ ଖବର ଉପରେ ବିହାର ବିଧାନସଭାରେ ଉତ୍ତେଜନା ଦେଖାଦେଇଥିଲା। ବିହାର ବିଧାନସଭାରେ ଉପମୁଖ୍ୟମନ୍ତ୍ରୀ ତେଜସ୍ବୀ ଯାଦବ ଗୃହ ମନ୍ତ୍ରଣାଳୟକୁ ଏହି ଘଟଣାର ତଦନ୍ତ କରିବାକୁ କହିଛନ୍ତି। ଯାଦବ କହିଛନ୍ତି ଯେ ତାମିଲନାଡୁ ପୋଲିସ ସ୍ପଷ୍ଟ କରିଛି ଯେ ପିଟିବା ଭିଡିଓ ଭିତ୍ତିହୀନ।
ବିହାର ମୁଖ୍ୟମନ୍ତ୍ରୀ ନୀତୀଶ କୁମାର ଗତକାଲି ତାମିଲନାଡୁକୁ ଏକ ସର୍ବଦଳୀୟ ପ୍ରତିନିଧି ଦଳ ପଠାଇବାକୁ ନିଷ୍ପତ୍ତି ନେଇଛନ୍ତି। ବିଧାନସଭା ପରିସରରେ ବିରୋଧୀଦଳର ନେତା ବିଜୟ କୁମାର ସିହ୍ନା ଗଣମାଧ୍ୟମ ସହ ସହ କଥାବାର୍ତ୍ତା କରି କହିଛନ୍ତି, ମୋର ଲଖିସରାଇ ନିର୍ବାଚନମଣ୍ଡଳୀରୁ ଜଣେ ପ୍ରବାସୀଙ୍କଠାରୁ ମୋତେ କଷ୍ଟଦାୟକ କଲ ଆସିଛି। ଏହା ପରେ ତାମିଲନାଡୁକୁ ଏକ ପ୍ରତିନିଧି ଦଳ ପଠାଇବା ଦାବିକୁ ଗ୍ରହଣ କରି ମୁଖ୍ୟମନ୍ତ୍ରୀ ରାଜି ହୋଇଛନ୍ତି।
