ପୁରୀ,୭ା୭(ଅଜିତ୍ କୁମାର ମହାନ୍ତି)ରାଜ୍ୟ ସରକାରଙ୍କ ପକ୍ଷରୁ ହାଇକୋର୍ଟର ପୂର୍ବତନ ବିଚାରପତି ବିଶ୍ୱନାଥ ରଥଙ୍କ ଅଧ୍ୟକ୍ଷତାରେ ଗଠନ କରାଯାଇଥିବା ରତ୍ନଭଣ୍ଡାର ଯାଞ୍ଚ କମିଟିର ପ୍ରଥମ ବୈଠକ ଶନିବାର ଅନୁଷ୍ଠିତ ହୋଇଛି। ଶ୍ରୀମନ୍ଦିର ପ୍ରଶାସନ କାର୍ଯ୍ୟାଳୟଠାରେ ବିଚାରପତି ରଥଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ୧୬ଜଣିଆ ଟିମ୍ ସଦସ୍ୟ ରତ୍ନଭଣ୍ଡାର ଖୋଲିବା ନେଇ ବିସ୍ତୃତ ଆଲୋଚନା କରିଥିଲେ। ରତ୍ନଭଣ୍ଡାର ଖୋଲାଯିବା ନେଇ ତାରିଖ ନିର୍ଦ୍ଧାରିତ ହୋଇପାରିନି। ଆସନ୍ତା ୯ରେ କମିଟିର ଦ୍ୱିତୀୟ ବୈଠକରେ ଏନେଇ ନିଷ୍ପତ୍ତି ନିଆଯିବ। ଏପରି କି ଡୁପ୍ଲିକେଟ ଚାବିରେ ରତ୍ନଭଣ୍ଡାର ଚାବି ନ ଖୋଲିଲେ ଆମେ ତାଲା ଭାଙ୍ଗିବୁ ବୋଲି ଯାଞ୍ଚ କମିଟିର ଅଧ୍ୟକ୍ଷ ରଥ କହିଛନ୍ତି। କମିଟି ଅଧ୍ୟକ୍ଷଙ୍କ ଏଭଳି ମନ୍ତବ୍ୟ ପରେ ରତ୍ନଭଣ୍ଡାର ଖୋଲିବା ଆଶା ଦୃଢ଼ୀଭୂତ ହୋଇଛି।
ଦୀର୍ଘ ୨ ଘଣ୍ଟାର ରୁଦ୍ଧଦ୍ୱାର ବୈଠକ ପରେ ଅଧ୍ୟକ୍ଷ ରଥ କହିଛନ୍ତି, ସମସ୍ତ ଦିଗ ଉପରେ ଆଲୋଚନା କରାଯାଇଛି। ଏପରି କି ସମସ୍ତ କାଗଜପତ୍ରର ଯାଞ୍ଚ କରାଯାଇଛି। କାଗଜପତ୍ରରୁ ଜଣାପଡୁଛି ରତ୍ନଭଣ୍ଡାରର ଡୁପ୍ଲିକେଟ ଚାବି ଜିଲା ଟ୍ରେଜେରିରେ ରହିଛି। ଡୁପ୍ଲିକେଟ ଚାବିରେ ରତ୍ନଭଣ୍ଡାର ନ ଖୋଲିଲେ ତାଲା ଭଙ୍ଗାଯିବ। ତାଲା କିଭଳି ଭଙ୍ଗାଯିବ ସେନେଇ ଏସ୍ଓପି ପ୍ରସ୍ତୁତ କରାଯିବ। ପ୍ରସ୍ତୁତ ଏସ୍ଓପି ସରକାରଙ୍କଠାରେ ଉପସ୍ଥାପନ କରାଯିବ। ସେହିପରି ଆସନ୍ତା ୯ତାରିଖରେ ଦ୍ୱିତୀୟ ବୈଠକ ବସିବ। ଉକ୍ତ ବୈଠକରେ ଜିଲା ଟ୍ରେଜେରିରୁ ମିଳିଥିବା ଡୁପ୍ଲିକେଟ୍ ଚାବି କମିଟି ନିକଟରେ ଦାଖଲ କରାଯିବ। ଏନେଇ ଶ୍ରୀମନ୍ଦିର ମୁଖ୍ୟ ପ୍ରଶାସକଙ୍କୁ ଦାୟିତ୍ୱ ଦିଆଯାଇଛି। ସେହିପରି ରତ୍ନଭଣ୍ଡାର ମରାମତି ନିମନ୍ତେ ଏକ ଏସ୍ଓପି କରାଯିବା ସହ ସରକାରଙ୍କଠାରୁ ଅନୁମତି ଅଣାଯିବ। ପରିଚାଳନା କମିଟି ବୈଠକ ବସି ଅଳଙ୍କାରଗୁଡ଼ିକୁ ରଖାଯିବା ସହ ଗଣତିମଣତି କରିବା ପାଇଁ ପ୍ରୟାସ କରିବ। ଅଳଙ୍କାର ଗଣତି ପାଇଁ ପରିଚାଳନା କମିଟି ବଣିଆଙ୍କୁ ଆଣିବେ। ଆଶା କରାଯାଉଛି, ମହାପ୍ରଭୁଙ୍କ ନୀଳାଦ୍ରିବିଜେ ପୂର୍ବରୁ ଏହାକୁ ମରାମତି କରାଯିବ। ମହାପ୍ରଭୁଙ୍କ ନୀତିକାନ୍ତି ପ୍ରଥମ ଏବଂ ଭକ୍ତଙ୍କ ଦର୍ଶନ ବ୍ୟବସ୍ଥା ଦ୍ୱିତୀୟ। ତେଣୁ ମହାପ୍ରଭୁଙ୍କ ନୀତିକାନ୍ତିରେ କୌଣସି ବ୍ୟତିକ୍ରମ ହେବ ନାହିଁ ବୋଲି ଜଷ୍ଟିସ ରଥ କହିଛନ୍ତି। ଅନ୍ୟପଟେ ଅଳଙ୍କାରଗୁଡ଼ିକୁ ସୁରକ୍ଷିତ ଭାବରେ ଅନ୍ୟସ୍ଥାନକୁ ସ୍ଥାନାନ୍ତରିତ କରାଯିବ। କିନ୍ତୁ ଗଣତିମଣତି ଲମ୍ବା ପ୍ରକ୍ରିୟା ହୋଇଥିବାରୁ ରଥଯାତ୍ରା ସମୟରେ ଏହା ସମ୍ଭବ ନୁହେଁ ବୋଲି ବୈଠକରେ ମତ ପ୍ରକାଶ ପାଇଛି। ତଥାପି ଶୀଘ୍ର କରିବାକୁ ଚେଷ୍ଟା କରାଯାଉଛି। ବୈଠକରେ ରତ୍ନଭଣ୍ଡାର ମରାମତି ଉପରେ ମଧ୍ୟ ଗୁରୁତ୍ୱ ଦିଆଯାଇଛି। ରତ୍ନଭଣ୍ଡାର ଖୋଲାଗଲେ ଏହାର ମରାମତି ନେଇ ମହାପ୍ରଭୁଙ୍କ ରତ୍ନ ଆଭୂଷଣକୁ ଏକ ସ୍ବତନ୍ତ୍ର ସ୍ଥାନକୁ ସ୍ଥାନାନ୍ତର କରାଯିବା ସହ ଗଣତିରେ ଅତ୍ୟାଧୁନିକ ବ୍ୟବସ୍ଥାର ଉପଯୋଗ କରାଯିବ ଏବଂ ରତ୍ନର ଚିହ୍ନଟ ନେଇ ବଣିଆମାନଙ୍କୁ ନିଯୁକ୍ତ ନେଇ ପରିଚାଳନା କମିଟି ନିଷ୍ପତ୍ତି ନେବ ବୋଲି ଅଧ୍ୟକ୍ଷ ରଥ କହିଛନ୍ତି। ରଥଯାତ୍ରା ମଧ୍ୟରେ ରତ୍ନଭଣ୍ଡାର ଖୋଲିବା ପାଇଁ ଯାଞ୍ଚ କମିଟି ପ୍ରୟାସ କରିବ। ମହାପ୍ରଭୁ ଏହି ସମୟରେ ଗୁଣ୍ଡିଚା ଘରେ ଥିବାରୁ ନୀତିରେ ବ୍ୟାଘାତ ନ କରି ମରାମତି କାର୍ଯ୍ୟ ମଧ୍ୟ କରାଯାଇପାରିବ। ରତ୍ନଭଣ୍ଡାର ମରାମତି ପାଇଁ ସ୍ବତନ୍ତ୍ର ଏସ୍ଓପି କରାଯିବା ସହ ଅଳଙ୍କାର ଥାଇ ଯଦି ମରାମତି ସମ୍ଭବ ହେବନାହିଁ ତେବେ ଅଳଙ୍କାରର କିଭଳି ରକ୍ଷଣାବେକ୍ଷଣ କରାଯିବ ସେନେଇ ପରିଚାଳନା କମିଟି ନିଷ୍ପତ୍ତି ନେବ ବୋଲି ବୈଠକରେ ଆଲୋଚନା ହୋଇଛି। ତେବେ ଡୁପ୍ଲିକେଟ୍ ଚାବିରେ ରନତ୍ଭଣ୍ଡାର ଖୋଲୁଛି କି ନାହିଁ ତାହା ଦେଖିବାକୁ ଥିବାବେଳେ ୧୯୭୮ ମସିହା ରତ୍ନ ଗଣତି ରିପୋର୍ଟ ଆଧାରରେ ଗଣତି ହେବ।
