ନୂଆଦିଲ୍ଲୀ,୫।୧ : ମଧ୍ୟପ୍ରଦେଶର ରାଜଧାନୀ ଭୋପାଳରେ ଗୁରୁବାରଠାରୁ ଜଳ ଭିଜନ ୨୦୪୭ ବିଷୟବସ୍ତୁ ଉପରେ ଦୁଇ ଦିନିଆ ପ୍ରଥମ ଅଲ ଇଣ୍ଡିଆ ରାଜ୍ୟ ମନ୍ତ୍ରୀଙ୍କ ବାର୍ଷିକ ସମ୍ମିଳନୀ ଆୟୋଜିତ ହୋଇଛି। ଏହି ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଭିଡିଓ କନଫରେନ୍ସିଂ ମାଧ୍ୟମରେ ସମ୍ମିଳନୀକୁ ସମ୍ବୋଧିତ କରିଛନ୍ତି।
ସେ କହିଛନ୍ତି ଯେ ଆଜି ଜଳ ନିରାପତ୍ତା କ୍ଷେତ୍ରରେ ଭାରତ ଅଦ୍ଭୁତପୂର୍ବ କାର୍ଯ୍ୟ କରୁଛି ଏବଂ ବହୁ ପୁଞ୍ଜି ବିନିଯୋଗ କରୁଛି। ଜଳ ସଂରକ୍ଷଣ ପାଇଁ ରାଜ୍ୟଗୁଡିକର ପ୍ରୟାସ ଦେଶର ସାମୂହିକ ଲକ୍ଷ୍ୟ ହାସଲ କରିବାରେ ସହାୟକ ହେବ। ପ୍ରଧାନମନ୍ତ୍ରୀ କହିଛନ୍ତି ଯେ ମନରେଗା ଅଧୀନରେ ଜଳ ନିରାପତ୍ତା ଉପରେ ସର୍ବାଧିକ କାର୍ଯ୍ୟ କରାଯିବା ଉଚିତ।
ଜଳ ସଂରକ୍ଷଣ ପାଇଁ ଜନସାଧାରଣଙ୍କ ଅଂଶଗ୍ରହଣ ସହିତ ଲୋକଙ୍କ ମନରେ ସଚେତନତା ଜାଗ୍ରତ ହେବା ଆବଶ୍ୟକ। ଏହି ଦିଗରେ ଆମେ ଯେତେ ଚେଷ୍ଟା କରିବୁ, ସେତେ ଅଧିକ ପ୍ରଭାବ ସୃଷ୍ଟି ହେବ। ଦେଶର ପ୍ରତ୍ୟେକ ଜିଲାରେ ୭୫ ଅମୃତ ସରୋବର ତିଆରି କରୁଛି ଏବଂ ଏପର୍ଯ୍ୟନ୍ତ ୨୫ ହଜାର ଅମୃତ ସରୋବର ନିର୍ମାଣ କରାଯାଇଛି । ଆଗାମୀ ୨୫ବର୍ଷ ପାଇଁ ଜଳ ଭିଜନ ୨୦୪୭ ହେଉଛି ଅମୃତ ଯାତ୍ରାର ଏକ ଗୁରୁତ୍ୱପୂର୍ଣ୍ଣ ଦିଗ।
ପ୍ରଧାନମନ୍ତ୍ରୀ କହିଛନ୍ତି ଯେ ଜଳ ସଂରକ୍ଷଣ କାର୍ଯ୍ୟରେ ଜିଓ ମ୍ୟାପିଂ ଏବଂ ଜିଓ ସେନ୍ସିଂ ଭଳି ଟେକ୍ନୋଲୋଜି ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରୁଛି। ଅନେକ ରାଜ୍ୟ ଏଥିରେ ଏକ ଭଲ କାମ କରିଛନ୍ତି ଏବଂ ଅନେକ ରାଜ୍ୟ ଏହି ଦିଗରେ ଗତି କରୁଛନ୍ତି। ଜଳ ସଂରକ୍ଷଣ ପାଇଁ କେନ୍ଦ୍ର ଅଟଳ ଭୂତଳ ଜଳ ସଂରକ୍ଷଣ ଯୋଜନା ଆରମ୍ଭ କରିଛି।
ସରକାର ବଜେଟରେ ସର୍କୁଲାର ଅର୍ଥନୀତି ଉପରେ ଅଧିକ ଗୁରୁତ୍ୱ ଦେଇଛନ୍ତି। ଜଳ ସଂରକ୍ଷଣ କ୍ଷେତ୍ରରେ ସର୍କୁଲାର ଅର୍ଥନୀତିର ମଧ୍ୟ ଏକ ପ୍ରମୁଖ ଭୂମିକା ରହିଛି ।
ପ୍ରଧାନମନ୍ତ୍ରୀ କହିଛନ୍ତି ଯେ ଆମ ଦେଶରେ ସହରୀକରଣ ଦ୍ରୁତ ଗତିରେ ବୃଦ୍ଧି ପାଉଛି ଏବଂ ଯେତେବେଳେ ସହରୀକରଣର ଗତି ଏହିପରି, ସେତେବେଳେ ଆମେ ଜଳ ବିଷୟରେ ଗମ୍ଭୀର ଭାବରେ ଚିନ୍ତା କରିବା ଉଚିତ। ଶିଳ୍ପ ଏବଂ କୃଷି ହେଉଛି ଏହିପରି ଦୁଇଟି କ୍ଷେତ୍ର, ଯେଉଁଥିରେ ଜଳର ଆବଶ୍ୟକତା ଅଧିକ । ଏହି ଉଭୟ କ୍ଷେତ୍ର ଏକତ୍ର ଜଳ ସଂରକ୍ଷଣ ଅଭିଯାନ ଚଳାଇବା ଉଚିତ ଏବଂ ଲୋକଙ୍କୁ ସଚେତନ କରାଯିବା ଜରୁରୀ।
