ବାଲେଶ୍ୱର, ୪।୯(ବାଞ୍ଛାନିଧି ଦେ): ଲଘୁଚାପ ଜନିତ ଅବିଶ୍ରାନ୍ତ ବର୍ଷା ଫଳରେ ବାଲେଶ୍ୱର ସହର ବେହାଲ୍ ହୋଇପଡ଼ିଛି। ଦୁଇଦିନ ଧରି ସହରର ବିଭିନ୍ନ ରାସ୍ତା ଓ ଛକଗୁଡ଼ିକରେ ବର୍ଷା ଜଳ ଜମି ରହିବା ଫଳରେ ଯାତାୟାତ ପ୍ରଭାବିତ ହୋଇଛି। ନୂଆସାହି ଛକଠାରେ ଥିବା ପୋଷ୍ଟାଲ ସୁପରିଣ୍ଟେଣ୍ଡେଣ୍ଟଙ୍କ କାର୍ଯ୍ୟାଳୟ ସଂଲଗ୍ନ ସହଦେବଖୁଣ୍ଟା ଉପଡାକଘର ଭିତରକୁ ବର୍ଷା ଜଳ ପଶି ଦୟନୀୟ ସ୍ଥିତି ଦେଖାଦେଇଛି। ଡାକଘର ଆଲମିରାରେ ପାଣି ପଶିବା ଫଳରେ ସେଠାରେ ଥିବା ଟଙ୍କା ସବୁ ଓଦା ହୋଇଯାଇଥିଲା। କମ୍ପ୍ୟୁଟର, ପ୍ରିଣ୍ଟର ମେସିନ୍, ପାସବୁକ୍, ରେକର୍ଡପତ୍ର, ଫାଇଲ୍ ସବୁ ଓଦା ହୋଇ ନଷ୍ଟ ହୋଇଥିଲା। ଏପରିକି ଡାକ ଘର ପରିସରରେ ଜମି ରହିଥିବା ବର୍ଷା ପାଣିରେ ମାଛ ଖେଳୁଥିବା ଦେଖିବାକୁ ମିଳିଥିଲା। ବୁଧବାର ଜଣେ ଜମାକାରୀ ୧ଲକ୍ଷ ଟଙ୍କା ଉଠାଇବା ପାଇଁ ଏହି ଉପଡାକଘରକୁ ଯାଇଥିଲେ। ଟଙ୍କା ଥିବା ଆଲମିରା ଖୋଲିବା ବେଳକୁ ସେଥିରେ ମଙ୍ଗଳବାର ରାତିରେ ପାଣି ପଶି ସବୁ ଓଦା ହୋଇଯାଇଥିବା ଦେଖିବାକୁ ମିଳିଥିଲା। ଅଧିକାରୀ ଓ କର୍ମଚାରୀମାନେ ସଙ୍ଗେ ସଙ୍ଗେ ଓଦା ହୋଇଥିବା ସମସ୍ତ ସାମଗ୍ରୀ ଓ ଟଙ୍କାକୁ ଶୁଖାଇଥିଲେ। ଆବଶ୍ୟକତା ଦୃଷ୍ଟିରୁ ଉକ୍ତ ଜମାକାରୀ ଜଣକ ବାଧ୍ୟ ହୋଇ ଓଦା ଟଙ୍କାକୁ ନେଇଥିବା ଜଣାପଡ଼ିଛି।
ସୂଚନା ଯେ, ମଙ୍ଗଳବାର ଜିଲାରେ ୬୦୫ମି.ମି. ବର୍ଷା ହୋଇଥିବା ବେଳେ ସହରରେ ୧୨୮ମି.ମି. ବର୍ଷା ରେକର୍ଡ ହୋଇଥିଲା। ବୁଧବାର ଜିଲାରେ ୩୬୬ମି.ମି. ବର୍ଷା ହୋଇଥିବା ବେଳେ ସହରରେ ୩୫ମି.ମି. ବର୍ଷା ରେକର୍ଡ ହୋଇଛି। ସହରର ତଳିଆ ଅଞ୍ଚଳ ଜଳମଗ୍ନ ରହିଛି। ବହୁ ଦୋକାନ ଓ ଘର ଭିତରକୁ ବର୍ଷା ପାଣି ପଶି ଆସବାବପତ୍ର ଭାସୁଥିବାର ପରିଲକ୍ଷିତ ହୋଇଥିଲା। ଏପରିକି ଉକ୍ତ ଛକରେ ଦୋକାନଗୁଡ଼ିକ ବନ୍ଦ ରହିଥିଲା। ଜଳ ନିଷ୍କାସନ ବ୍ୟବସ୍ଥା ଦିଗରେ ଗୁରୁତ୍ୱ ଦେବା ସହ ତୁରନ୍ତ ପଦକ୍ଷେପ ଗ୍ରହଣ କରିବା ପାଇଁ ସହରବାସୀ ଦାବି କରିଛନ୍ତି।
