ଦିଗପହଣ୍ଡି,୧୪|୮(ଅଶେଷ ନାଥ ମିଶ୍ର) ଗଞ୍ଜାମ ଜିଲା ସାହାସପୁର ଗ୍ରାମ ନିକଟ ଦିଗପହଣ୍ଡି ସବଜେଲ କ୍ୱାଟର୍ସରୁ ଶୁକ୍ରବାର ସନ୍ଧ୍ୟାରେ ଜଣେ ଜେଲ ୱାର୍ଡରଙ୍କ ମୃତଦେହ ଉଦ୍ଧାର କରାଯାଇଛି। ମୃତକ ଜଣକ ହେଲେ ଆସିକା କୋଟିନଡ଼ା ଥାନା ନୂଆପଲ୍ଲୀ ଗ୍ରାମର ଶିବାନନ୍ଦ ସ୍ବାଇଁ(୩୫)। ଜେଲ ୱାର୍ଡର ଭାବେ କାର୍ଯ୍ୟ କରୁଥିବା ଶିବାନନ୍ଦ ପୁରୀ ଜେଲରୁ ବଦଳି ହୋଇ ଗତ ୫ ତାରିଖରେ ଦିଗପହଣ୍ଡି ସବଜେଲରେ କାର୍ଯ୍ୟରେ ଯୋଗଦେଇଥିଲେ। ସେ କ୍ୱାଟର୍ସରେ ଏକୁଟିଆ ରହୁଥିଲେ। କୌଣସି କାରଣରୁ ଗତ ପ୍ରାୟ ୨ ଦିନ ହେଲା ଚିନ୍ତିତ ରହୁଥିଲେ ବୋଲି ତାଙ୍କ ସହକର୍ମୀମାନେ କହିଛନ୍ତି। ସକାଳୁ ସେ କ୍ୱାଟର୍ସରୁ ପଦାକୁ ବାହାରି ନଥିଲେ। ଅପରାହ୍ନ ୨ଟାରେ ସବଜେଲରେ ତାଙ୍କ ଡ୍ୟୁଟି ଥିଲା। ନିର୍ଦ୍ଧାରିତ ସମୟ ଗଡ଼ି ଯାଇଥିଲେ ମଧ୍ୟ ସେ ଡ୍ୟୁଟିକୁ ନ ଆସିବା କାରଣରୁ ଅନ୍ୟଜଣେ ସହକର୍ମୀ ୱାର୍ଡର ତାଙ୍କ କ୍ୱାର୍ଟରକୁ ଯାଇ ଡାକି ଥିଲେ ମଧ୍ୟ ଶିବରାମଙ୍କ କିଛି ଉତ୍ତର ମିଳି ନ ଥିଲା। ତାଙ୍କ ମୋବାଇଲକୁ ବାରମ୍ବାର ଫୋନ କରାଯାଇଥିଲେ ମଧ୍ୟ ସେ ଫୋନ ଉଠାଇ ନ ଥିଲେ। ପରେ ଝରକା ଫାଙ୍କରୁ ଦେଖିବାରୁ ତାଙ୍କ ବେକରେ ଏକ ରଶି ଓହଳିବା ସହ ଏକ ଚେୟାରରେ ସେ ନିଶ୍ଚଳ ଅବସ୍ଥାରେ ବସି ରହିଥିବା ଜଣାପଡିଥିଲା। ଏନେଇ ସେ ଦୌଡ଼ି ଯାଇ ସବଜେଲ ସୁପରିଟେଣ୍ଡେଣ୍ଟ ରାଧାଶ୍ୟାମ ବେହେରାଙ୍କୁ ଜଣାଇଥିଲେ। ସୁପରିିଟେଣ୍ଡେଣ୍ଟଙ୍କ ସହ ଅନ୍ୟକିଛି ସହକର୍ମୀ କ୍ୱାର୍ଟର ସମ୍ମୁଖରେ ପହଞ୍ଚି ସବିଶେଷ ସ୍ଥିତି ଅନୁଧ୍ୟାନ କରିବା ପରେ ପାଟପୁର ଥାନାରେ ଏନେଇ ଏତଲା ଦିଆଯାଇଥିଲା। ଖବର ପାଇ ବ୍ରହ୍ମପୁର ଜେଲ ଡିଆଇଜି ଶୁଭକାନ୍ତ ମିଶ୍ର,ସାନଖେମୁଣ୍ଡି ତହସିଲଦାର ତଥା ଏକଜିକ୍ୟୁଟିଭ ମାଜିଷ୍ଟ୍ରେଟ ରାମଚନ୍ଦ୍ର ପଟ୍ଟନାୟକ ପ୍ରମୁଖ ଘଟଣାସ୍ଥଳରେ ପହଞ୍ଚି ତାଙ୍କ ସ୍ତ୍ରୀ ଓ ପରିବାର ଲୋକଙ୍କୁ ଫୋନ କରି ଘଟଣା ଜଣାଇଥିଲେ। ପରିବାର ଲୋକେ ସନ୍ଧ୍ୟା ପ୍ରାୟ ୬ ଟାରେ ପହଞ୍ଚିବା ପରେ କ୍ୱାଟର୍ସ କବାଟ ତାଡି ଚେତାଶୂନ୍ୟ ଅବସ୍ଥାରେ ତାଙ୍କୁ ଉଦ୍ଧାର କରାଯାଇ ଦିଗପହଣ୍ଡି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନିଆଯାଇଥିଲା।
ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ପାଟପୁର ପୋଲିସ ଏନେଇ ଅପମୃତ୍ୟୁ ମାମଲା ରୁଜୁ କରିବା ସହ ମୃତଦେହ ଜବତ କରି ବ୍ୟବଚ୍ଛେଦ ନିମନ୍ତେ ବ୍ରହ୍ମପୁର ବଡ଼ ଡାକ୍ତରଖାନାକୁ ପଠାଇଛନ୍ତି। ବ୍ୟବଚ୍ଛେଦ ରିପୋର୍ଟ ମିଳିବା ପରେ ମୃତ୍ୟୁର ପ୍ରକୃତ କାରଣ ଜଣାପଡ଼ିବ ବୋଲି ପାଟପୁର ଥାନା ଆଇଆଇସି କହିଛନ୍ତି। ତାଙ୍କ ଆକସ୍ମିକ ମୃତ୍ୟୁରେ ପରିବାର ଲୋକେ ଦୁଃଖରେ ଭାଙ୍ଗି ପଡିଛନ୍ତି। ଗତ କିଛି ମାସ ପୂର୍ବେ ତାଙ୍କ ୫ ବର୍ଷର ପୁଅ ପୋଖରୀରେ ବୁଡ଼ିଯାଇ ମୃତ୍ୟୁବରଣ କରିଥିଲେ। ସେହିଦିନଠାରୁ ସେ ପ୍ରାୟ ଅନ୍ୟମନସ୍କ ରହୁଥିଲେ ବୋଲି ପରିବାର ଲୋକେ ପୋଲିସକୁ କହିଛନ୍ତି। ସେ କୌଣସି କାରଣରୁ ମାନସିକ ଭାରସାମ୍ୟ ହରାଇ ଆତ୍ମହତ୍ୟା କରିଥିବା ପାରିପାର୍ଶ୍ଵିକ ସ୍ଥିତିରୁ ଜଣାପଡ଼ିଛି। ବ୍ରହ୍ମପୁର ଜେଲ ଡିଆଇଜି,ସବ ଜେଲ ସୁପରିଟେଣ୍ଡେଣ୍ଟ,ପାଟପୁର ଥାନା ଆଇଆଇସିଙ୍କ ସମେତ ଜେଲର କର୍ମଚାରୀ ବୃନ୍ଦ ଗଭୀର ଶୋକ ପ୍ରକାଶ କରିବା ସହ ଶୋକ ସନ୍ତପ୍ତ ପରିବାରବର୍ଗଙ୍କୁ ସମବେଦନା ଜଣାଇଛନ୍ତି।
