ମୁମ୍ବାଇ/ନୂଆଦିଲ୍ଲୀ,୩ା୫: ଏପ୍ରିଲ ୧୯ରେ ଏନ୍ସିପି ଅଧ୍ୟକ୍ଷ ଶରଦ ପାଓ୍ବାରଙ୍କ ଝିଅ ସୁପ୍ରିୟା ସୁଲେ କହିଥିଲେ, ୧୫ ଦିନ ମଧ୍ୟରେ ଦୁଇଟି ବଡ଼ ବିସ୍ଫୋରଣ ଘଟିବାକୁ ଯାଉଛି, ଗୋଟିଏ ଦିଲ୍ଲୀରେ ଓ ଅନ୍ୟଟି ମହାରାଷ୍ଟ୍ରରେ। ପାଓ୍ବାରଙ୍କ ପୁତୁରା ଅଜିତ ପାଓ୍ବାର ଭାଜପା ଆଡ଼କୁ ଢଳୁଥିବାବେଳେ ଏନ୍ସିପିର ବାରାମତୀ ଏମ୍ପି ସୁପ୍ରିୟା ଏହା ପ୍ରକାଶ କରିଥିଲେ। ପାଓ୍ବାର ଦଳୀୟ ମଙ୍ଗ ଛାଡ଼ିବା ଘୋଷଣା ଯଦି ଗୋଟିଏ ବିସ୍ଫୋରଣ ହୋଇଥାଏ ତେବେ ଅନ୍ୟଟି କ’ଣ? ଦିନେ ଦୁଇଦିନ ମଧ୍ୟରେ ଦିଲ୍ଲୀ ରାଜନୀତିରେ ମଧ୍ୟ କିଛି ବଡ଼ ପରିବର୍ତ୍ତନ ହୋଇପାରେ କି? ବର୍ତ୍ତମାନ ଏଭଳି କିଛି ପ୍ରଶ୍ନର ଉତ୍ତର ଖୋଜିବାରେ ଲାଗିଛନ୍ତି ରାଜନୈତିକ ବିଶ୍ଳେଷକ।
ମହାରାଷ୍ଟ୍ର ପ୍ରତିଷ୍ଠା ଦିବସରେ ଜାତୀୟତାବାଦୀ କଂଗ୍ରେସ ପାର୍ଟି (ଏନ୍ସିପି) ମୁଖ୍ୟ ଶରଦ ପାଓ୍ବାର ଦଳର ମଙ୍ଗ ଛାଡ଼ିବା ନେଇ ଘୋଷଣା କରିଛନ୍ତି। ଏହା ପରେ ତାଙ୍କ ଉତ୍ତରାଧିକାରୀ ଚୟନକୁ ନେଇ କସରତ ଆରମ୍ଭ ହୋଇଛି। ବରିଷ୍ଠ ଏନ୍ସିପି ନେତା ତଥା ପାଓ୍ବାରଙ୍କ ପୁତୁରା ଅଜିତ ପାଓ୍ବାର ଏବଂ ଝିଅ ସୁପ୍ରିୟା ସୁଲେଙ୍କ ମଧ୍ୟରୁ ଜଣେ ଦଳର ନୂଆ ଅଧ୍ୟକ୍ଷ ହୋଇପାରନ୍ତି ବୋଲି ଚର୍ଚ୍ଚା ଜୋର୍ ଧରିଛି। ପାଓ୍ବାର ନିଜ ନିଷ୍ପତ୍ତି ପ୍ରତ୍ୟାହାର ନ କରିବା ଯାଏ ସଭାସ୍ଥଳ ଛାଡ଼ିବେ ନାହିଁ ବୋଲି ଦଳର ବହୁ ନେତା ଓ କର୍ମୀ କହିଥିଲେ। ଏହାସତ୍ତ୍ୱେ ଅପରାହ୍ନ ୨ଟା ୩୦ରେ ପାଓ୍ବାର ନିଜ ‘ସିଲ୍ଭର ଓକ୍’ ବାସଭବନକୁ ଫେରିଯାଇଥିଲେ। ପାଓ୍ବାର ଏଭଳି ସମୟରେ ଏନ୍ସିପି ଅଧ୍ୟକ୍ଷ ପଦ ଛାଡ଼ିବା ନେଇ ଘୋଷଣା କରିଛନ୍ତି ଯେତେବେଳେ ଅଜିତ ଭାଜପା ଆଡ଼କୁ ଢଳୁଥିବା ନେଇ ଚର୍ଚ୍ଚା ଜୋର୍ ଧରିଛି। ଅଜିତ କହିଛନ୍ତି, ପାଓ୍ବାର ସାହେବ ଏନ୍ସିପି ନେତୃତ୍ୱରେ ପରିବର୍ତ୍ତନ ନେଇ କିଛିଦିନ ପୂର୍ବେ କହିଥିଲେ। ତେଣୁ ନିଜ ବୟସ ଓ ସ୍ବାସ୍ଥ୍ୟ ଦୃଷ୍ଟିରୁ ସେ ଏହି ନିଷ୍ପତ୍ତି ନେଇଥିବା ଆମେ ମନେକରିବା ଉଚିତ। ୨୦୨୪ ଲୋକ ସଭା ନିର୍ବାଚନ ପୂର୍ବରୁ ଭାଜପା ବିରୋଧରେ ବିରୋଧୀ ଦଳଗୁଡ଼ିକୁ ଏକାଠି କରିବାରେ ପାଓ୍ବାର ଉଦ୍ୟମ ଚଳାଇଥିବାବେଳେ ସେ ଏହି ନିଷ୍ପତ୍ତି ଶୁଣାଇଛନ୍ତି। ୪ ଥର ମହାରାଷ୍ଟ୍ରର ମୁଖ୍ୟମନ୍ତ୍ରୀ ଆସନ ଅଳଙ୍କୃତ କରିଥିବା ପାଓ୍ବାର କେନ୍ଦ୍ରରେ ପ୍ରତିରକ୍ଷା ଓ କୃଷି ଭଳି ଗୁରୁତ୍ୱପୂର୍ଣ୍ଣ ମନ୍ତ୍ରଣାଳୟ ସମ୍ଭାଳିଥିଲେ। ୨୦୧୯ ମହାରାଷ୍ଟ୍ର ବିଧାନସଭା ନିର୍ବାଚନ ପରେ ଏନ୍ସିପି ଏବଂ କଂଗ୍ରେସକୁ ଦୁଇଦଳର ଆଦର୍ଶଗତ ଶତ୍ରୁ ଶିବସେନା ସହ ମିଶାଇ ମହାବିକାଶ ଅଘାଡ଼ି (ଏମ୍ଭିଏ) ସରକାର ଗଠନ କରାଇବାରେ ସଫଳ ହୋଇଥିଲେ। ମହାରାଷ୍ଟ୍ର ଷ୍ଟ୍ରଙ୍ଗ୍ମ୍ୟାନ୍ଙ୍କ ଉଦ୍ଦେଶ୍ୟ ଥିଲା ଭାଜପାକୁ କ୍ଷମତାରୁ ଦୂରେଇ ରଖିବା। ଏନେଇ ତାଙ୍କ ପୂର୍ବତନ ଘନିଷ୍ଠ ସହଯୋଗୀ ତଥା ବର୍ତ୍ତମାନର କଂଗ୍ରେସ ନେତା ତାରିକ୍ ଅନ୍ଓ୍ବର କହିଛନ୍ତି, ପାଓ୍ବାର ଭବିଷ୍ୟତ ପାଇଁ ନିଶ୍ଚିତ ଭାବେ କିଛି ଯୋଜନା କରିଥିବେ। କାରଣ ବିନା କୌଣସି ପୂର୍ବ ଯୋଜନାରେ ସେ କିଛି ନିଷ୍ପତ୍ତି ନେଇ ନ ଥାଆନ୍ତି ବୋଲି ଏନ୍ସିପିର ସହ ପ୍ରତିଷ୍ଠାତା ଅନ୍ଓ୍ବର ପ୍ରକାଶ କରିଛନ୍ତି।
