ନୂଆଦିଲ୍ଲୀ,୧୬ା୩: ୧୦ ରାଜ୍ୟରେ ଖାଲି ହେବାକୁ ଥିବା ୩୭ ରାଜ୍ୟ ସଭା ଆସନ ପାଇଁ ସୋମବାର ପୂର୍ବାହ୍ନ ୯ଟାରୁ ଅପରାହ୍ନ ୪ଟା ମଧ୍ୟରେ ନିର୍ବାଚନ ଅନୁଷ୍ଠିତ ହେବାକୁ ଯାଉଛି। ଅପରାହ୍ନ ୫ଟାରେ ଭୋଟ ଗଣତି ହୋଇ ଫଳାଫଳ ପ୍ରକାଶ ପାଇବ। ମହାରାଷ୍ଟ୍ର, ଓଡ଼ିଶା, ତାମିଲନାଡୁ, ପଶ୍ଚିମବଙ୍ଗ, ଆସାମ, ବିହାର, ଛତିଶଗଡ଼, ହରିୟାଣା, ହିମାଚଳପ୍ରଦେଶ ଓ ତେଲଙ୍ଗାନାରୁ ରାଜ୍ୟ ସଭାକୁ ନିର୍ବାଚିତ ହୋଇଥିବା ୩୭ ସଦସ୍ୟଙ୍କ କାର୍ଯ୍ୟକାଳ ଏପ୍ରିଲରେ ଶେଷ ହେବାକୁ ଥିବାରୁ ମାର୍ଚ୍ଚ ୧୬ରେ ଉକ୍ତ ଆସନଗୁଡ଼ିକ ପାଇଁ ନିର୍ବାଚନ କରିବାକୁ ଗତ ମାସରେ ନିର୍ବାଚନ କମିଶନ ଘୋଷଣା କରିଥିଲେ। ତଦନୁଯାୟୀ ସୋମବାର ମହାରାଷ୍ଟ୍ରର ୭ ଆସନ, ତାମିଲନାଡୁର ୬, ବିହାର ଏବଂ ପଶ୍ଚିମବଙ୍ଗର ୫ଟି ଲେଖାଏ, ଓଡ଼ିଶାର ୪, ଆସାମର ୩, ତେଲଙ୍ଗାନା, ଛତିଶଗଡ଼ ଓ ହରିୟାଣାର ୨ଟି ଲେଖାଏ ଏବଂ ହିମାଚଳପ୍ରଦେଶର ଗୋଟିଏ ଆସନ ପାଇଁ ସମ୍ପୃକ୍ତ ରାଜ୍ୟ ବିଧାନସଭାରେ ଭୋଟଗ୍ରହଣ ହେବ।
ବାଲଟ୍ ପେପରରେ ମନୋନୀତ ପ୍ରାର୍ଥୀଙ୍କୁ ଚିହ୍ନଟ କରିବା ପାଇଁ ବିଧାୟକମାନେ କେବଳ ପୂର୍ବ ନିର୍ଦ୍ଧାରିତ ନିର୍ଦ୍ଦିଷ୍ଟ ଭାଓଲେଟ୍ ରଙ୍ଗର ସ୍କେଚ୍ ପେନ୍ ବ୍ୟବହାର କରିବେ। ରିଟର୍ନିଂ ଅଫିସର ଏହି ପେନ୍ ଯୋଗାଇଦେବେ। ଏହା ବ୍ୟତୀତ ଅନ୍ୟ କୌଣସି କଲମ ବ୍ୟବହାର କରାଯିବ ନାହିଁ। ମୁକ୍ତ ଓ ଅବାଧ ନିର୍ବାଚନ ପାଇଁ ନିର୍ବାଚନ କମିଶନଙ୍କ ଦ୍ୱାରା ନିଯୁକ୍ତ ପର୍ଯ୍ୟବେକ୍ଷକମାନେ ଉପସ୍ଥିତ ରହି ଭୋଟ ପ୍ରକ୍ରିୟା ଉପରେ ନଜର ରଖିବେ। ଏପ୍ରିଲରେ କାର୍ଯ୍ୟକାଳ ଶେଷ ହେଉଥିବା ରାଜ୍ୟ ସଭା ସଦସ୍ୟଙ୍କ ମଧ୍ୟରେ ଅଛନ୍ତି କେନ୍ଦ୍ରମନ୍ତ୍ରୀ ରାମନାଥ ଠାକୁର, ରାମଦାସ ଅଠାଓ୍ବାଲେ, ରାଜ୍ୟ ସଭା ଉପାଧ୍ୟକ୍ଷ ହରିବଂଶ ନାରାୟଣ ସିଂ, ଏନ୍ସିପି(ଏସ୍ପି) ନେତା ଶରଦ ପାଓ୍ବାର, ଆର୍ଏଲ୍ଏମ୍ ନେତା ଉପେନ୍ଦ୍ର କୁଶଓ୍ବାହା, କଂଗ୍ରେସ ନେତା ଅଭିଷେକ ମନୁ ସିଂଘଭି, ଏଆଇଏଡିଏମ୍କେ ନେତା ଏମ୍. ଥାମ୍ବିଦୁରାଇ ଏବଂ ଡିଏମ୍କେ ନେତା ତିରୁଚି ଶିବା ପ୍ରମୁଖ।
