ଧାମନଗର, ୧୯ା୮(ସନ୍ତୋଷ କୁମାର ମହାପାତ୍ର): ଖଣି ବିଭାଗ, ତହସିଲ, ଜିଲା ପ୍ରଶାସନ ଓ ଜଳ ସମ୍ପଦ ବିଭାଗର ମିଳିତ ଟିମ୍ ଗୁରୁବାର ଭଦ୍ରକ ଜିଲା ଧାମନଗର ତହସିଲ ଅଧୀନ ଆନନ୍ଦପୁର ପଞ୍ଚାୟତର ବୈତରଣୀ ନଦୀ ସଇରାତ ଉତ୍ସ ବୁଲି ଦେଖିଛନ୍ତି। ଭଦ୍ରକ ଓ ବାଲେଶ୍ୱର ଜିଲା ଭୂତତ୍ତ୍ୱବିତ୍ ସନ୍ତୋଷୀପ୍ରଭା ସେଠୀଙ୍କ ନେତୃତ୍ୱରେ ଧାମନଗର ତହସିଲଦାର ସ୍ନିଗ୍ଧାରାଣୀ ଦେବୀ, ଅତିରିକ୍ତ ତହସିଲଦାର ସାଇ ସିଲୋନା ପ୍ରମୁଖ ମିଳିତ ଭାବେ ଆନନ୍ଦପୁରର ପଣସମାହାରା ଘାଟରେ ପହଞ୍ଚତ୍ ଆନନ୍ଦପୁର-୧ ବୈତରଣୀ ନଦୀ ବାଲିଘାଟ ପରିଦର୍ଶନ କରିଛନ୍ତି। ସେହିପରି ଉତେଇପୁର-୨ ବାଲିଘାଟ ବୁଲି ଦେଖିଥିଲେ।
ନଦୀରେ ପାଣି ଥିବାରୁ କେବଳ ନଦୀପଠାରୁ ବାଲିଘାଟ ବୁଲି ଦେଖି ଟିମ୍ ଫେରିଯାଇଛି। ଏହାପରେ ସଇରାତ ଉତ୍ସଗୁଡ଼ିକର ଭୌଗଳିକ ସ୍ଥିତି, ଜିପିଏସ୍ ଲୋକେସନ ପ୍ରସ୍ତୁତ କରୁଥିବା ଓରସାକ୍ ଟିମ୍ ଆସି ଅନୁଧ୍ୟାନ କରିବ ବୋଲି ଭୂତତ୍ତ୍ୱବିତ୍ ସେଠୀ କହିଛନ୍ତି। ଅପରପକ୍ଷେ ଏଠାରେ ଆଉ ବାଲିଘାଟ ନିଲାମ ନ ଦେବାକୁ ସ୍ଥାନୀୟ ଲୋକେ ଦାବି କରିଛନ୍ତି।
ବୈତରଣୀ ନଦୀର ବାଲିଘାଟ ୧୯୯୫ରୁ ଚାଲି ଆସୁଥିଲା। ୨୦୧୫ରୁ ୨୦୨୦ ମଧ୍ୟରେ ଧାମନଗର ତହସିଲ ପକ୍ଷରୁ ଏହାକୁ ୫ ବର୍ଷିଆ ନିଲାମ ଦିଆଯାଇଥିଲା। ସେତେବେଳେ ନିଲାମ ନେଇଥିବା ବ୍ୟକ୍ତି ବେଆଇନ ଭାବେ ବାଲି ଉତ୍ତୋଳନ କରୁଥିଲେ। ବାର୍ଷିକ ପ୍ରାୟ ୭ ହଜାର ଟନ୍ ବାଲି ଉତ୍ତୋଳନ ପାଇଁ ଧାର୍ଯ୍ୟ ହୋଇଥିବା ବେଳେ ସେ ଦିନକୁ ହଜାରେ ଟନ୍ରୁ ଅଧିକ ବାଲି ଉଠାଇ ବିକ୍ରି କରୁଥିଲେ। ଆନନ୍ଦପୁର ଅଞ୍ଚଳରେ ବାଲିଘାଟକୁ ନେଇ ଦୀର୍ଘବର୍ଷ ହେଲା ବିବାଦ ଲାଗି ରହିଛି। ପଞ୍ଚାୟତର ଜଣେ ବ୍ୟକ୍ତି ପୂର୍ବରୁ ବାଲିଘାଟ ନିଲାମ ନେଇଥିଲେ। ୨୦୨୨ ମାର୍ଚ୍ଚ ୩୧ରୁ ତାଙ୍କ ନିଲାମ ଅବଧି ସରିଥିଲେ ବି ସେ ବେଆଇନ ଭାବେ ବାଲି ଉଠାଇ ଚାଲିଛନ୍ତି। ଏନେଇ ଆନନ୍ଦପୁରର ଅନେକ ଲୋକ ତହସିଲଦାର, ଉପଜିଲାପାଳ ଓ ରାଜସ୍ବ ମନ୍ତ୍ରୀଙ୍କୁ ଜଣାଇ ଆସିଛନ୍ତି। ହେଲେ ପଦକ୍ଷେପ ନିଆଯାଉ ନ ଥିବାରୁ ବେଆଇନ ଭାବେ ସମ୍ପୃକ୍ତ ବ୍ୟକ୍ତି ବାଲି ଉତ୍ତୋଳନ କରୁଥିବା ଅଭିଯୋଗ ହୋଇଥିଲା। ଧାମନଗର ତହସିଲ ଅଫିସର ସୂଚନା ଅନୁସାରେ ଉତେଇପୁର ବାଲିଘାଟର ନିଲାମ ୨୦୧୭ରେ ହୋଇଥିଲା। ହେଲେ ମାଇନିଂ ପ୍ଲାନ ଓ ପରିବେଶ ଅନୁମତି ବିଳମ୍ବରେ ମିଳିବାରୁ ବାଲି ଉତ୍ତୋଳନ ଲାଗି ୨୦୧୯ ଡିସେମ୍ବରରେ ରାଜିନାମା ସ୍ବାକ୍ଷରିତ ହୋଇଥିଲା। ଏଣୁ ବାଲିଘାଟର ନିଲାମ ଅବଧି ୨୦୨୪ ଯାଏ ରହିଛି। ହେଲେ ୨୦୨୨ ମାର୍ଚ୍ଚ ୩୧ରେ ଘାଟର ସିଟିଓ ଅବଧି ଶେଷ ହୋଇଛି। ସେହିପରି ୨୦୨୨ ଆର୍ଥତ୍କ ବର୍ଷ ଯାଏ ଘାଟରୁ ୪ ଲକ୍ଷ ଟଙ୍କାର ରାଜସ୍ବ ଆଦାୟ ବାକି ରହିଥିବା କୁହାଯାଇଛି।
