ନୂଆଦିଲ୍ଲୀ, ୧୧।୧୧: ବିରାଟ କୋହଲି ଭାରତ ପାଇଁ ବର୍ତ୍ତମାନ କେବଳ ଦିନିକିଆ ଫର୍ମାଟ୍ରେ ଖେଳୁଛନ୍ତି। ସେ ୨୦୨୪ରେ ଟି-୨୦ ଅନ୍ତର୍ଜାତୀୟ ଏବଂ ୨୦୨୫ରେ ଟେଷ୍ଟ କ୍ରିକେଟରୁ ଅବସର ନେଇଥିଲେ। ଏବେ ଚର୍ଚ୍ଚା ଜୋର ଧରିଛି ଯେ, ସେ ୨୦୨୭ ବିଶ୍ୱକପ ପରେ ଦିନିକିଆ କ୍ରିକେଟରୁ ମଧ୍ୟ ଅବସର ନେଇପାରନ୍ତି। ତେବେ ଏହି ପ୍ରସଙ୍ଗରେ ତାଙ୍କ ବାଲ୍ୟକାଳର କୋଚ ରାଜକୁମାର ଶର୍ମା ଏକ ବଡ଼ ଖୁଲାସା କରିଛନ୍ତି, ଯାହା କ୍ରିକେଟ ପ୍ରଶଂସକଙ୍କ ପାଇଁ ଖୁସି ଖବର ହୋଇପାରେ।
ଦିଲ୍ଲୀ ଆଣ୍ଡ ଡିଷ୍ଟ୍ରିକ୍ଟ କ୍ରିକେଟ ଆସୋସିଏଶନ (DDCA)ର ଏକ କାର୍ଯ୍ୟକ୍ରମରେ ରାଜକୁମାର ଶର୍ମା କିଙ୍ଗ କୋହଲିଙ୍କୁ ନେଇ ନିଜର ମତ ରଖିଥିଲେ। ବର୍ତ୍ତମାନ କୋହଲିଙ୍କ ବୟସ ୩୮ ବର୍ଷ। ଆଗାମୀ ବିଶ୍ୱକପ ସମୟରେ ତାଙ୍କୁ ୩୯ ବର୍ଷ ହୋଇଥିବ। ଏହି ବୟସକୁ ଦେଖି ତାଙ୍କ ଅବସରକୁ ନେଇ ଚର୍ଚ୍ଚା ହେଉଛି।
କୋଚ ରାଜକୁମାର ଶର୍ମା କହିଛନ୍ତି, ବିରାଟ କହିଥିଲେ ଯେ ଏହା ତାଙ୍କର ଶେଷ ବିଶ୍ୱକପ ହେବ, ଭାରତ ପାଇଁ ତାଙ୍କର ଶେଷ ମ୍ୟାଚ ନୁହେଁ। ସେ ଏପରି କହିବାର କାରଣ ହେଉଛି, ବିଶ୍ୱକପ ପ୍ରତିବର୍ଷ ଆସେ ନାହିଁ। ଏହା ଚାରି ବର୍ଷରେ ଥରେ ଆୟୋଜିତ ହୋଇଥାଏ। ବିରାଟ କୋହଲି ବର୍ତ୍ତମାନ ନ୍ୟୁଜିଲାଣ୍ଡ ବିପକ୍ଷରେ ଦିନିକିଆ ସିରିଜ ଖେଳୁଛନ୍ତି। ପ୍ରଥମ ମ୍ୟାଚରେ କୋହଲି ୭୪ ରନର ଏକ ଚମତ୍କାର ଇନିଂସ ଖେଳିଥିଲେ। ଦ୍ୱିତୀୟ ମ୍ୟାଚରେ ସେ ମାତ୍ର ୭ ରନ କରି ଆଉଟ ହୋଇଥିଲେ। ତୃତୀୟ ମ୍ୟାଚ ବର୍ଷା ଯୋଗୁ ବାତିଲ ହୋଇଯାଇଥିଲା। ଫଳରେ କୋହଲିଙ୍କୁ ବ୍ୟାଟିଂ କରିବାର ସୁଯୋଗ ମିଳିନଥିଲା।
ବିରାଟ କୋହଲି ନିଜ ଅନ୍ତର୍ଜାତୀୟ କ୍ୟାରିୟରରେ ୧୨୩ଟି ଟେଷ୍ଟ ଏବଂ ୧୨୫ଟି ଟି-୨୦ ଅନ୍ତର୍ଜାତୀୟ ମ୍ୟାଚ ଖେଳିଛନ୍ତି। ସେହିପରି ଦିନିକିଆ ଫର୍ମାଟ୍ରେ ସେ ୩୨୦ଟି ମ୍ୟାଚ ଖେଳିସାରିଛନ୍ତି।
ଟେଷ୍ଟ କ୍ରିକେଟରେ ୨୧୦ଟି ଇନିଂସରେ ସେ ୪୬.୮୫ ହାରରେ ୯,୨୩୦ ରନ ସଂଗ୍ରହ କରିଛନ୍ତି। ଏଥିରେ ୩୦ଟି ଶତକ ଏବଂ ୩୧ଟି ଅର୍ଦ୍ଧଶତକ ସାମିଲ ରହିଛି। ଟି-୨୦ ଅନ୍ତର୍ଜାତୀୟର ୧୧୭ଟି ଇନିଂସରେ କୋହଲି ୪୮.୬୯ ହାର ଏବଂ ୧୩୭.୦୪ ଷ୍ଟ୍ରାଇକ ରେଟ୍ରେ ୪,୧୮୮ ରନ କରିଛନ୍ତି।
ସେହିପରି ଦିନିକିଆ କ୍ରିକେଟରେ ୩୦୭ଟି ଇନିଂସରେ ତାଙ୍କ ବ୍ୟାଟରୁ ୧୫,୧୯୦ ରନ ବାହାରିଛି। ଏଥିରେ ୫୫ଟି ଶତକ ଏବଂ ୮୦ଟି ଅର୍ଦ୍ଧଶତକ ରହିଛି। ଦିନିକିଆରେ ତାଙ୍କର ସର୍ବାଧିକ ସ୍କୋର ୧୮୩ ରନ।
