ଇନ୍ଦୋର,୧୪।୧: ଭାରତୀୟ କ୍ରିକେଟ ଟିମ୍ ଟି୨୦ ବିଶ୍ୱକପ୍ ୨୦୨୪ ପୂର୍ବରୁ ଆଫଗାନିସ୍ତାନ ବିପକ୍ଷରେ ଅନ୍ତିମ ଟି୨୦ ସିରିଜ ଖେଳିବ। ସିରିଜ ଲାଗି ଦୀର୍ଘ ୧୪ ମାସର ବ୍ୟବଧାନ ପରେ ରୋହିତ ଶର୍ମା ଏବଂ ବିରାଟ କୋହଲି ଦଳକୁ ଫେରିଛନ୍ତି। ଉଭୟ ଖେଳାଳି ୨୦୨୨ରେ ଇଂଲଣ୍ଡ ବିପକ୍ଷରେ ଟି୨୦ ବିଶ୍ୱକପ୍ ସେମିଫାଇନାଲରେ ପରାଜୟ ପରଠାରୁ ଦଳରୁ ବାଦ୍ ପଡ଼ିଥିଲେ। ଏହାପରେ ଅନେକ ଖେଳାଳିଙ୍କୁ ସୁଯୋଗ ମିଳିଥିଲେ ହେଁ ପୁଣିଥରେ ଦୁହେଁ ପ୍ରତ୍ୟାବର୍ତ୍ତନ କରିବାରେ ସଫଳ ହୋଇଛନ୍ତି। ଏମିତିରେ ଭାରତର ପୂର୍ବତନ କ୍ରିକେଟର ସୁରେଶ ରାଇନା କୋହଲି ଟି୨୦ ଟିମ୍କୁ କେଉଁ କାରଣରୁ ଫେରିଛନ୍ତି ତାହା କହିଛନ୍ତି।
ରାଇନା କହିଛନ୍ତି, କୋହଲି ଦଳରେ ଥିବା ଯୋଗୁ ୧୯ ମ୍ୟାଚ୍ରୁ ୧୭ରେ ବିଜେତା ହୋଇଛି। ଯେତେବେଳେ ଆପଣ ରନ୍ ଚେସ୍ କରନ୍ତି ସେତେବେଳେ ମୁଣ୍ଡରେ ହିସାବ ଚାଲୁଥାଏ, ଏଥିଲାଗି ଚେସ୍ ମାଷ୍ଟର ବିରାଟ କୋହଲିଙ୍କୁ ଦଳକୁ ଅଣାଯାଇଛି।
କୋହଲିଙ୍କୁ କ୍ରିକେଟଜଗତର କିଙ୍ଗ ଅଫ୍ ଚେସ୍ ନାମରେ ଜଣାଶୁଣା। ଦିନିକିଆ ଏବଂ ଟି୨୦ ଫର୍ମାଟରେ ଲକ୍ଷ୍ୟକୁ ସଫଳତାପୂର୍ବକ ପିଛା କରିବା ଲାଗି ତାଙ୍କ ପାଖରେ ଯୋଗ୍ୟତା ରହିଛି। ତାଙ୍କ ଉତ୍ତରାଧିକାରୀ ଏଯାଏ ଭାରତୀୟ ଟିମ୍କୁ ମିଳିନାହିଁ। ଏମିତିରେ କୋହଲିଙ୍କ ଟି୨୦ ବିଶ୍ୱକପ୍ରେ ଦଳରେ ରହିଲେ ଖେଳାଳିଙ୍କ ସହ ଭାରତୀୟ ପ୍ରଶଂସକଙ୍କୁ ଭିନ୍ନ ପ୍ରକାର ଆତ୍ମବିଶ୍ୱାସ ଦେବ ବୋଲି କୁହାଯାଉଛି।
