ଲଣ୍ଡନ,୧୫।୪ : ଭାରତୀୟ ଅଧିନାୟକ ବିରାଟ କୋହଲି ଆଉ ଏକ ବଡ଼ ଉପଲବ୍ଧି ହାସଲ କରିଛନ୍ତି। କ୍ରିକେଟର ବାଇବେଲ କୁହାଯାଉଥିବା ଓ୍ବିଜଡେନ ଅଲମାନକର ଦଶକର ଶ୍ରେଷ୍ଠ ଦିନିକିଆ କ୍ରିକେଟର ଭାବେ ସେ ବିବେଚିତ ହୋଇଛନ୍ତି। ଇଂଲଣ୍ଡ ଅଲରାଉଣ୍ଡର ବେନ୍ ଷ୍ଟୋକ୍ସ କ୍ରମାଗତ ଦ୍ୱିତୀୟ ବର୍ଷ ପାଇଁ କ୍ରିକେଟର ଅଫ୍ ଦି ଇୟର ବିବେଚିତ ହୋଇଛନ୍ତି। ଉଚ୍ଚ ମାନ୍ୟତାପ୍ରାପ୍ତ ଏହି ବାର୍ଷିକ ପ୍ରକାଶନ ଓ୍ବିଜଡେନ ଅଲମାନକ ଗୁରୁବାର ଏ ନେଇ ତାଲିକା ପ୍ରକାଶ କରିଛି। ୨୦୦୮ ଅଗଷ୍ଟରେ ଶ୍ରୀଲଙ୍କା ବିପକ୍ଷରେ କୋହଲି ଦିନିକିଆ କ୍ୟାରିୟର ଆରମ୍ଭ କରିଥିଲେ। ସର୍ବକାଳୀନ ଶ୍ରେଷ୍ଠ ବ୍ୟାଟ୍ସମ୍ୟାନ ବିବେଚିତ ହେଉଥିବା କୋହଲି ଏ ପର୍ଯ୍ୟନ୍ତ ୨୫୪ଟି ଦିନିକିଆ ଖେଳି ୧୨, ୧୬୯ ରନ କରିଛନ୍ତି।
ପ୍ରଥମ ଅନ୍ତର୍ଜାତୀୟ ଦିନିକିଆର ୫୦ତମ ବାର୍ଷିକୀ ପାଳନ କରାଯିବାର କାର୍ଯ୍ୟକ୍ରମ ରହିଛି। ୧୯୭୧ରୁ ୨୦୨୧ ମଧ୍ୟରେ ସବୁ ଦଶକର ଶ୍ରେଷ୍ଠ କ୍ରିକେଟରଙ୍କୁ ମାନ୍ୟତା ପ୍ରଦାନ କରାଯାଇଛି। ଏହି କ୍ରମରେ ୨୦୨୧ ଦଶକ ପାଇଁ କୋହଲିଙ୍କୁ ପୁରସ୍କୃତ କରାଯିବ ବୋଲି ଓ୍ବିଜଡେନ ତା’ର ଓ୍ବେବସାଇଟ୍ରେ ଉଲ୍ଲେଖ କରିଛି। ଗତ ଦଶନ୍ଧିରେ କୋହଲି ୨୦୧୧ ବିଶ୍ୱକପ୍ ଚାମ୍ପିୟନ ଦଳର ସଦସ୍ୟ ଥିଲେ ଓ ୧୦ ହଜାରରୁ ଊର୍ଦ୍ଧ୍ୱ ରନ ସଂଗ୍ରହ କରିଛନ୍ତି।
କୋହଲିଙ୍କୁ ବାଦ୍ ଦେଲେ ଅନ୍ୟତମ କିମ୍ବଦନ୍ତୀ ଭାରତୀୟ ବ୍ୟାଟ୍ସମ୍ୟାନ ସଚିନ ତେନ୍ଦୁଲକର ମଧ୍ୟ ୧୯୯୦ ଦଶକର ଶ୍ରେଷ୍ଠ କ୍ରିକେଟର ବିବେଚିତ ହୋଇଛନ୍ତି। ୧୯୯୮ରେ ସଚିନ ସର୍ବାଧିକ ୯ଟି ଦିନିକିଆ ଶତକ ହାସଲ କରିଥିଲେ। ଗୋଟିଏ ବର୍ଷରେ ଏହା ଯେକୌଣସି ବ୍ୟାଟ୍ସମ୍ୟାନଙ୍କଠାରୁ ଲାଗି ସର୍ବାଧିକ। ସେହିପରି ଭାରତର ଅନ୍ୟତମ ବିଶ୍ୱକପ୍ ବିଜୟୀ ଅଧିନାୟକ କପିଳ ଦେବ ମଧ୍ୟ ୧୯୮୦ ଦଶକ ପାଇଁ ଶ୍ରେଷ୍ଠ ଦିନିକିଆ କ୍ରିକେଟର ବିବେଚିତ ହୋଇଛନ୍ତି। ୧୯୮୩ରେ କପିଳଙ୍କ ନେତୃତ୍ୱରେ ଭାରତ ପ୍ରଥମଥର ପାଇଁ ବିଶ୍ୱକପ୍ ଚାମ୍ପିୟନ ହେବାର ଗୌରବ ଅର୍ଜନ କରିଥିଲା। ଏହି ଦଶନ୍ଧିରେ ସେ ଅନ୍ୟ ବୋଲରଙ୍କଠାରୁ ସର୍ବାଧିକ ଉଇକେଟ ହାସଲ କରିଥିଲେ ଓ ବ୍ୟାଟ୍ସମ୍ୟାନ ଭାବେ ତାଙ୍କର ଷ୍ଟ୍ରାଇକ ରେଟ ୧୦୦ରୁ ଊର୍ଦ୍ଧ୍ୱ ଥିଲା।
