ନୂଆଦିଲ୍ଲୀ, ୪।୧୧: ସୌରଭ ଗାଙ୍ଗୁଲୀ କି ଏମ.ଏସ. ଧୋନୀ? ସଚିନ ତେନ୍ଦୁଲକରଙ୍କୁ ଯେତେବେଳେ ପଚରାଗଲା ଯେ କେଉଁ ଖେଳାଳିଙ୍କ ଅଧିନାୟକତ୍ୱରେ ଖେଳି ତାଙ୍କୁ ସବୁଠାରୁ ଭଲ ଲାଗିଲା, ସେତେବେଳେ ଏହାକୁ ନେଇ ସଚିନଙ୍କ ଏକ ବୟାନ ଭାଇରାଲ ହେବାରେ ଲାଗିଛି। ପ୍ରକୃତରେ ମଙ୍ଗଳବାର ଦିନ ସେ ସୋସିଆଲ ମିଡିଆ ପ୍ଲାଟଫର୍ମ ରେଡିଟ (Reddit) ରେ ’ଆସ୍କ ମି ଏନିଥିଂ’ (Ask Me Anything) ସେସନ କରିଥିଲେ। ଏଥିରେ ସେ ସୌରଭ ଗାଙ୍ଗୁଲୀ ଏବଂ ଏମ.ଏସ. ଧୋନୀ ଉଭୟଙ୍କୁ ନିଜର ପସନ୍ଦର ଅଧିନାୟକ ବୋଲି କହିଥିଲେ। ଏହା ସହିତ ସେ ଦକ୍ଷିଣ ଆଫ୍ରିକୀୟ ଦଳର ବର୍ତ୍ତମାନର ଅଧିନାୟକ ଟେମ୍ବା ବାଭୁମାଙ୍କର ମଧ୍ୟ ପ୍ରଶଂସା କରିଥିଲେ।
ତେନ୍ଦୁଲକରଙ୍କୁ ପଚରାଯାଇଥିଲା ଯେ କାହାର ଅଧିନାୟକତ୍ୱରେ ଖେଳି ତାଙ୍କୁ ସବୁଠାରୁ ଭଲ ଲାଗିଲା। ସେ କହିଥିଲେ, “ମୋର ପସନ୍ଦର ଅଧିନାୟକଙ୍କ କଥା କହିବାକୁ ଗଲେ, ସୌରଭ ଗାଙ୍ଗୁଲୀ ଏବଂ ଏମ.ଏସ. ଧୋନୀ ମୋ ତାଲିକାର ଶୀର୍ଷରେ ରହିବେ।” ତଥାପି ୧୫ ବର୍ଷ ପୂର୍ବେ ତେନ୍ଦୁଲକର ଧୋନୀଙ୍କୁ ଗାଙ୍ଗୁଲୀଙ୍କଠାରୁ ମଧ୍ୟ ଅଧିକ ଶ୍ରେଷ୍ଠ ବୋଲି କହିଥିଲେ। ୨୦୧୧ରେ ଭାରତୀୟ ଦଳ ବିଶ୍ୱବିଜୟୀ ହେବାର କିଛି ଦିନ ପରେ ସଚିନ ତେନ୍ଦୁଲକର କହିଥିଲେ ଯେ ଧୋନୀ ହେଉଛନ୍ତି ସବୁଠାରୁ ଶ୍ରେଷ୍ଠ ଅଧିନାୟକ, ଯାହାଙ୍କ ଅଧିନାୟକତ୍ୱରେ ତାଙ୍କୁ ଖେଳିବାର ସୁଯୋଗ ମିଳିଥିଲା।
ଗାଙ୍ଗୁଲୀ ଏବଂ ଧୋନୀଙ୍କ ଅଧିନାୟକତ୍ୱର ତୁଳନା କଲେ ଦିନିକିଆରେ (ODI) ଅଧିନାୟକ ଭାବେ ଧୋନୀଙ୍କ ଜିତିବାର ପ୍ରତିଶତ ୫୯.୫୨ ଥିଲା, ଯେତେବେଳେ କି ଗାଙ୍ଗୁଲୀ ନିଜ ଅଧିନାୟକତ୍ୱରେ ଟିମ ଇଣ୍ଡିଆକୁ ୫୩.୯ ପ୍ରତିଶତ ମ୍ୟାଚରେ ଜିତାଇଥିଲେ। ସେହିପରି ଟେଷ୍ଟ କ୍ରିକେଟରେ ଅଧିନାୟକ ଭାବେ ଗାଙ୍ଗୁଲୀଙ୍କ ଜିତିବାର ପ୍ରତିଶତ ଧୋନୀଙ୍କଠାରୁ ଭଲ ଥିଲା।
ସଚିନ ତେନ୍ଦୁଲକର ନିଜେ ୭୩ଟି ଦିନିକିଆ ଏବଂ ୨୫ଟି ଟେଷ୍ଟ ମ୍ୟାଚରେ ଟିମ ଇଣ୍ଡିଆର ଅଧିନାୟକତ୍ୱ କରିଥିଲେ। ତାଙ୍କ ଅଧିନାୟକତ୍ୱରେ ଟିମ ଇଣ୍ଡିଆ ବିଶେଷ ଭଲ ପ୍ରଦର୍ଶନ କରିପାରି ନଥିଲା, କିନ୍ତୁ ସେ ବିସିସିଆଇ ଉପରେ କଟାକ୍ଷ କରିବାକୁ ମଧ୍ୟ ପଛାଇ ନଥିଲେ। ତେନ୍ଦୁଲକର କହିଥିଲେ ଯେ ୧୯୯୦ ଦଶକରେ ବିସିସିଆଇ ଭିତରେ ବୃତ୍ତିଗତତା (Professionalism) ର ଅଭାବ ଦେଖିବାକୁ ମିଳୁଥିଲା।
ତେନ୍ଦୁଲକର କହିଥିଲେ, “ଟିମ ଇଣ୍ଡିଆର ଅଧିନାୟକତ୍ୱ ପାଇବା ଏକ ଗୌରବର ବିଷୟ ଥିଲା, କିନ୍ତୁ ମତେ ନିଜ ଦଳ ବାଛିବାର ପୂର୍ଣ୍ଣ ସ୍ବାଧୀନତା ନଥିଲା। ୧୯୯୦ ଦଶକ ତୁଳନାରେ ବିସିସିଆଇ ଭିତରେ ବର୍ତ୍ତମାନ ବହୁତ ଅଧିକ ବୃତ୍ତିଗତତା ଆସିଯାଇଛି। ସେହି ସମୟରେ ଭାରତୀୟ କ୍ରିକେଟ ଏକ କଠିନ ଦଉ ଦେଇ ମଧ୍ୟ ଗତି କରିଥିଲା।”
