ମୁମ୍ବାଇ,୩୦।୧୧: ନିଜ ପ୍ରିୟର ଖେଳାଳି ବିରାଟ କୋହଲିଙ୍କୁ ପୁଣିଥରେ ଟେଷ୍ଟ ମ୍ୟାଚରେ ଦେଖିବାକୁ ଚାହୁଁଛନ୍ତି। ଅନେକ ସୋସିଆଲ ମିଡିଆରେ ଦାବି କରୁଛନ୍ତି କି ବିରାଟ ଅବସର ପ୍ରତ୍ୟାହାର କରି ଟେଷ୍ଟ କ୍ରିକେଟକୁ ଫେରି ଆସନ୍ତୁ। ତେବେ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (BCCI) ସଚିବ ଦେବଜିତ୍ ସାଇକିଆ, କ୍ରିକେଟର ବିରାଟ କୋହଲିଙ୍କୁ ତାଙ୍କ ଟେଷ୍ଟ କ୍ରିକେଟ୍ ଅବସର ନିଷ୍ପତ୍ତିରୁ ଓହରି ଆସିବାକୁ ବୋର୍ଡ ପକ୍ଷରୁ ଅନୁରୋଧ କରାଯାଇଥିବା ଗୁଜବକୁ ଖଣ୍ଡନ କରିଛନ୍ତି।
ରେଡ୍-ବଲ୍ କ୍ରିକେଟରେ ଭାରତୀୟ ଦଳର ନିରାଶାଜନକ ପ୍ରଦର୍ଶନ ପରେ ଏହି ଗୁଜବ ଭାରତୀୟ ଗଣମାଧ୍ୟମରେ ବ୍ୟାପିଥିଲା। ଗତ ଦୁଇ ବର୍ଷ ମଧ୍ୟରେ ଭାରତ ଘରୋଇ ମାଟିରେ ଦ୍ୱିତୀୟ ଥର ପାଇଁ ଟେଷ୍ଟ ସିରିଜ୍ ହାରିବା ପରେ, ଗଣମାଧ୍ୟମରେ କଳ୍ପନାଜଳ୍ପନା ଆରମ୍ଭ ହୋଇଥିଲା ଯେ BCCI ବିରାଟଙ୍କୁ ତାଙ୍କ ଅବସର ପ୍ରତ୍ୟାହାର କରିବାକୁ ଅନୁରୋଧ କରିବ।
ତେବେ BCCI ସଚିବ ଦେବଜିତ୍ ସାଇକିଆ ‘ଆଜ୍ ତକ୍’ ସହିତ ଏକ ସାକ୍ଷାତକାରରେ ସ୍ପଷ୍ଟ କରିଛନ୍ତି ଯେ କୋହଲିଙ୍କୁ ଟେଷ୍ଟ ଫର୍ମାଟକୁ ଫେରିବା ପାଇଁ କୌଣସି ଅନୁରୋଧ କରାଯାଇ ନାହିଁ। ଏହି ପ୍ରସଙ୍ଗରେ ବୋର୍ଡ କୌଣସି ଆଲୋଚନା ମଧ୍ୟ ଆରମ୍ଭ କରିନାହିଁ।
“ବିରାଟ କୋହଲିଙ୍କ ବିଷୟରେ ଯାହା କୁହାଯାଉଛି, ତାହା କେବଳ ଗୁଜବ। ଏହି ବିଷୟରେ କୋହଲିଙ୍କ ସହ କୌଣସି କଥାବାର୍ତ୍ତା ହୋଇନାହିଁ। ଗୁଜବକୁ ଗୁରୁତ୍ୱ ଦିଅନ୍ତୁ ନାହିଁ। ଏପରି କିଛି ହୋଇନାହିଁ,” ରବିବାର ଦିନ ଦେବଜିତ୍ ସାଇକିଆ କହିଛନ୍ତି।
ପୂର୍ବତନ ଇଂଲଣ୍ଡ କ୍ରିକେଟର କେଭିନ୍ ପିଟରସେନ୍ ମଧ୍ୟ ଏହି ଗୁଜବ ଉପରେ ପ୍ରତିକ୍ରିୟା ଦେଇଛନ୍ତି। ସେ ସୋସିଆଲ୍ ମିଡିଆରେ ଲେଖିଛନ୍ତି ଯେ ଯଦି ବିରାଟ କୋହଲି ଏବଂ ରୋହିତ ଶର୍ମାଙ୍କ ଭଳି ଖେଳାଳି ଟେଷ୍ଟ କ୍ରିକେଟକୁ ଫେରିବାକୁ ଆଗ୍ରହୀ, ତେବେ ସେମାନଙ୍କୁ ନିଶ୍ଚିତ ଭାବରେ ଫେରାଇ ଅଣାଯିବା ଉଚିତ।
“ମୁଁ ସବୁବେଳେ ଗଣମାଧ୍ୟମ କିମ୍ବା ସୋସିଆଲ୍ ମିଡିଆରେ ପଢୁଥିବା ବିଷୟକୁ ବିଶ୍ୱାସ କରେ ନାହିଁ। କିନ୍ତୁ, ଯଦି ଏହା ଅଧା ସତ ଯେ ବିରାଟ ଏବଂ ରୋହିତ ପୁଣି ଟେଷ୍ଟ କ୍ରିକେଟ୍ ଖେଳିବାକୁ ବିଚାର କରୁଛନ୍ତି, ତେବେ ଏହାକୁ ଅତ୍ୟନ୍ତ ଗମ୍ଭୀରତାର ସହ ନିଆଯିବା ଆବଶ୍ୟକ। ଟେଷ୍ଟ କ୍ରିକେଟ୍ର ସ୍ଥିତି ଏକ ଗୁରୁତ୍ୱପୂର୍ଣ୍ଣ ଆଲୋଚନା ବିଷୟ ଏବଂ ଯଦି ଖେଳର ବଡ ତାରକାମାନେ ଏହାକୁ ପୁଣି ଖେଳିବାକୁ ଚାହୁଁଛନ୍ତି, ତେବେ ସେମାନେ ଖେଳିବା ଦରକାର!”
ବିରାଟ କୋହଲି ବର୍ତ୍ତମାନ କେବଳ ଦିନିକିଆ ଫର୍ମାଟ୍ ଖେଳୁଛନ୍ତି। ରବିବାର ସେ ଦକ୍ଷିଣ ଆଫ୍ରିକା ବିପକ୍ଷରେ ପ୍ରଥମ ଦିନିକିଆରେ ତାଙ୍କର ୫୨ତମ ଶତକ ହାସଲ କରିଛନ୍ତି।
