ସାସାରାମ,୩।୪: ବିହାର ରାଜ୍ୟ ଏବେ ହିଂସାର ନିଆଁରେ ଜଳୁଛି। ରାମ ନବମୀ ଦିନରେ ହୋଇଥିବା ହିଂସା ପରେ ଅନେକ ଜିଲାରେ ଏହାର ପ୍ରଭାବ ଦେଖିବାକୁ ମିଳିଛି। ରବିବାର ସାସାରାମ ଥାନାର ଶେରଗଞ୍ଜ ଅଞ୍ଚଳରେ ଏକ ମସଜିଦ ନିକଟରେ ବୋମା ପ୍ରସ୍ତୁତି ସମୟରେ ହଠାତ୍ ବିସ୍ଫୋରଣ ହୋଇଥିଲା। ସେଠାରେ ପୁଣିଥରେ ସୋମବାର ସକାଳ ପ୍ରାୟ ୪ଟାରେ ଏକ ଘରେ ଅଚାନକ ବିସ୍ଫୋରଣ ହୋଇଛି। ଫଳରେ ସମ୍ପୂର୍ଣ୍ଣ ଅଞ୍ଚଳରେ ଭୟର ବାତାବରଣ ଦେଖାଦେଇଛି। ଏହି ଘଟଣା ପରେ ଡିଏମ ଓ ଏସପି ସେମାନଙ୍କ ଟିମ ସହ ଘଟଣାସ୍ଥଳରେ ପହଞ୍ଚି ମାମଲାର ଯାଞ୍ଚ ଆରମ୍ଭ କରିଛନ୍ତି।
ସୂଚନାଯୋଗ୍ୟ, ଏହି ଘଟଣା ସାସାରାମ ନଗର ଥାନା ଅଞ୍ଚଳରେ ଥିବା ମୋଚି ଟୋଲାର ଏକ ଘରେ ହୋଇଛି। ଏଠାରେ ହଠାତ୍ ଏକ ଘରେ ବୋମା ବିସ୍ଫୋରଣ ହେବାରୁ ସମ୍ପୂର୍ଣ୍ଣ ଘରଟି ଦୋହଲି ଯାଇଥିଲା। ଖବର ପାଇ ତୁରନ୍ତ ଡିଏମ ଓ ଏସପି ଘଟଣା ସ୍ଥଳରେ ପହଞ୍ଚିବା ସହ ଦଙ୍ଗା ନିରୋଧ ଦଳ ଓ ଏସଏସବି ଦ୍ୱାରା ଫ୍ଲାଗ ମାର୍ଚ୍ଚ କରାଯାଉଛି। କୁହାଯାଉଛି କି କେତେଜଣ ଅସାମାଜିକ ବ୍ୟକ୍ତି ଘର ନିକଟରେ ଏହି ବିସ୍ଫୋରଣ କରିଛନ୍ତି। ତେବେ ଘରର ବାହାର କାନ୍ଥରେ ଏହି ବୋମାକୁ ପକାଯାଇଛି। ଏଥିରେ କୌଣସି କ୍ଷୟକ୍ଷତି ହୋଇ ନ ଥିବା ଜଣାପଡିଥିବା ବେଳେ ସାସାରାମ ନଗରରେ ଏହା ଦ୍ୱିତୀୟ ବିସ୍ଫୋରଣ।
