ପ୍ୟାରିସ,୭।୮: ଭିନେଶ ଫୋଗଟ ପ୍ୟାରିସ ଅଲିମ୍ପିକ୍ସର ଫାଇନାଲରେ ପହଞ୍ଚି ଇତିହାସ ସୃଷ୍ଟି କରିଛନ୍ତି କିନ୍ତୁ ଏହା କେବଳ ଏକ ମାଇଲଖୁଣ୍ଟ। ଗନ୍ତବ୍ୟ ସ୍ଥଳରେ ପହଞ୍ଚିବା ଏ ପର୍ଯ୍ୟନ୍ତ ବାକି ଅଛି। ଏହା ଆମେ କହୁ ନାହୁଁ । ଭିନେଶ ଫୋଗଟ ନିଜେ ଭିଡିଓ କଲରେ ନିଜ ମା’ଙ୍କୁ ଏହା କହିଛନ୍ତି।
ପ୍ୟାରିସ ଅଲିମ୍ପିକ୍ସର ୫୦ କିଗ୍ରା ବର୍ଗ ମହିଳା ଫ୍ରିଷ୍ଟାଇଲ ରେସଲିଂରେ ଭିନେଶ ଫୋଗେଟ ଚମତ୍କାର ପ୍ରଦର୍ଶନ କରିଥିଲେ। ପ୍ରଥମ ରାଉଣ୍ଡରେ ଡିଫେଣ୍ଡିଂ ଚାମ୍ପିୟନ ତଥା ବିଶ୍ୱ ଚାମ୍ପିୟନ ଜାପାନର ୟୁଇ ସୁସାକିଙ୍କୁ ହରାଇଥିଲେ ଭିନେଶ। ପରବର୍ତ୍ତୀ ମ୍ୟାଚରେ ଉଚ୍ଚ ର଼୍ୟାଙ୍କିଙ୍ଗପ୍ରାପ୍ତ ୟୁକ୍ରେନ୍ର ଓକସାନା ଲିଭାଚ୍ଙ୍କୁ ହରାଇଥିଲେ ଭିନେଶ।
ସେମି ଫାଇନାଲରେ କ୍ୟୁବାର ୟୁସନେୟୁସ ଗଜମାନଙ୍କୁ ୫-୦ରେ ଏକପାଖିଆ ଭାବରେ ପରାସ୍ତ କରି ଫାଇନାଲରେ ପ୍ରବେଶ କରିଛନ୍ତି। ଗଜମାନ ପ୍ରଥମ ୩ ମିନିଟରେ ଆକ୍ରମଣାତ୍ମକ ଖେଳିଥିବା ବେଳେ ଭିନେଶ ଡିଫେଣ୍ଡ କରିଥିଲେ। ତେବେ ଦ୍ୱିତୀୟ ସେଟରେ ଭିନେଶ କାଉଣ୍ଟର ଆଟାକ କରିବା ସହ ୪ ପଏଣ୍ଟ ଅର୍ଜନ କରିଥିଲେ । ଫଳରେ ଚଳିତ ଅଲିମ୍ପିକ୍ସରେ ଭାରତ ଆଉ ଏକ ପଦକ ପକ୍କା କରିଛି।
ସେମିଫାଇନାଲରେ ପହଞ୍ଚିବା ପରେ ଭିନେଶ ତାଙ୍କ ମା ଏବଂ ପରିବାରଙ୍କ ସହ ଭିଡିଓ କଲ ମାଧ୍ୟମରେ କଥା ହୋଇଥିଲେ। ଭିନେଶ ହାତ ଯୋଡି ତାଙ୍କୁ ଅଭିବାଦନ ଜଣାଇଲେ ଏବଂ ତାଙ୍କ ମା ଏବଂ ପରିବାର ତାଙ୍କ ଝିଅକୁ ଆଶୀର୍ବାଦ କରିଥିଲେ। ଏହି ସମୟରେ ଭିନେଶ ଫୋଗାଟ ତାଙ୍କ ମାଙ୍କୁ ପ୍ରତିଶ୍ରୁତି ଦେଇଥିଲେ ଯେ ସେ ଫାଇନାଲରେ ସ୍ବର୍ଣ୍ଣ ଜିତିବେ। ଭିଡିଓରେ ଭିନେଶ କହୁଥିବା ଶୁଣିବାକୁ ମିଳିଛି ଯେ ଗୋଲ୍ଡ ଆଣିବାକୁ ହେବ … ଗୋଲ୍ଡ।
