ଝାରସୁଗୁଡ଼ା,୧୫।୪(ଆଶିଷ ରଞ୍ଜନ ଦାଶ): ଝାରସୁଗୁଡ଼ା ଜିଲା ସଦର ବ୍ଲକ ଅଧୀନ କୁ. କଣ୍ଟାପାଲି ଗ୍ରାମରେ ଥିବା ଜଳ ଯୋଗାଣ ବିଭାଗ ଟ୍ରାନ୍ସଫର୍ମର ଗତ ବୁଧବାର ରାତିଠାରୁ ଚୋରି ହୋଇଯାଇଛି। କିନ୍ତୁ ଆଜିକୁ ୭ ଦିନ ବିତିଯାଇଥିଲେ ମଧ୍ୟ ପ୍ରଶାସନ ପକ୍ଷରୁ ଜଳ ଯୋଗାଣ ପାଇଁ କୌଣସି ବ୍ୟବସ୍ଥା କରାଯାଇ ନାହିଁ। ଫଳରେ କୁ. କଣ୍ଟାପାଲି ଗ୍ରାମବାସୀ ପିଇବା ପାଣି ପାଇଁ ନାହିଁ ନ ଥିବା ସମ୍ମୁଖୀନ ହେଉଛନ୍ତି।
ଗ୍ରାମବାସୀଙ୍କ ଅଭିଯୋଗ ଅନୁସାରେ ଗତ ବୁଧବାର ରାତିରେ ଗାଁମୁଣ୍ଡରେ ଥିବା ଜଳ ଯୋଗାଣ ବିଭାଗ ଟ୍ରାନ୍ସଫର୍ମର ଖୋଲି ସେଥିରେ ଥିବା ମୂଲ୍ୟବାନ ଧାତୁକୁ ଚୋରମାନେ ନେଇ ଯାଇଥିଲେ। ସକାଳୁ ଗ୍ରାମବାସୀ ଟ୍ରାନ୍ସଫର୍ମର ଚୋରି ହୋଇଥିବା ଦେଖି ବଡମାଳ ଥାନାରେ ଅଭିଯୋଗ କରିବାକୁ ଯାଇଥିଲେ।
ବଡ଼ମାଳ ପୋଲିସ ଏହି ମାମଲା ସ୍ଥାନୀୟ ସରପଞ୍ଚ କରିବେ ବୋଲି କହିଥିଲେ। ଏହାପରେ ଗ୍ରାମବାସୀ ହିର୍ମା ସରପଞ୍ଚଙ୍କ ପାଖକୁ ଯିବାରୁ ସେ ଏହି ମାମଲା ବିଦ୍ୟୁତ୍ ବିଭାଗ କରିବ ବୋଲି କହିଥିଲେ। ଏପରି ପ୍ରଚଣ୍ଡ ଖରା ସାଙ୍ଗକୁ ଗରମରେ ଗ୍ରାମବାସୀ ଉତ୍କଟ ଜଳ ସଙ୍କଟର ସମ୍ମୁଖୀନ ହୋଇ ଏ କାର୍ଯ୍ୟାଳୟରୁ ସେ କାର୍ଯ୍ୟାଳୟକୁ ଦୌଡ଼ି ଦୌଡ଼ି ନୟାନ୍ତ ହେଉଥିବା କୁ. କଣ୍ଟାପାଲିର ଗ୍ରାମବାସୀ କହିଛନ୍ତି।
ଝାରସୁଗୁଡାରେ ବର୍ତ୍ତମାନ ଗରମରେ ପ୍ରଶାସନ ଲୋକଙ୍କୁ ପିଇବା ପାଣି ପରି ଏକ ସମ୍ବେଦନଶୀଳ ଘଟଣାରେ ଏତେ ବିଳମ୍ବ କରିବା ଲୋକଙ୍କ ମନକୁ ଢେର କଷ୍ଟ ଦେବା ସହିତ ପ୍ରଶାସନ ପ୍ରତି ଲୋକଙ୍କ ଆସ୍ଥା ବିଶ୍ୱାସ ତୁଟିବାକୁ ଲାଗୁଛି।
ଏ ନେଇ ସରବାହାଲ ବିଦ୍ୟୁତ୍ ବିଭାଗ ଏସ୍ଡିଓ ଭଗବାନ ସାହୁଙ୍କୁ ପଚାରିଯବାରୁ ସେ କହିଥିଲେ ଯେ ବଡ଼ମାଳ ବିଦ୍ୟୁତ୍ ବିଭାଗ କନିଷ୍ଠ ଯନ୍ତ୍ରୀ ବଡ଼ମାଳ ଥାନାରେ ଟ୍ରାନ୍ସଫର୍ମର ଚୋରି ନେଇ ଅଭିଯୋଗ କରିିଛନ୍ତି। ଆମେ ଏହାର ତୁରନ୍ତ ସମାଧାନ କରି କୁ. କଣ୍ଟାପାଲି ଗ୍ରାମବାସୀଙ୍କୁ ପିଇବା ପାଣି ପହଞ୍ଚାଇବା ବ୍ୟବସ୍ଥା କରିବୁ ବୋଲି କହିଛନ୍ତି।
କୁ. କଣ୍ଟାପାଲି ଗ୍ରାମର ମନ ପଧାନ, ଶରତ ସା, ଅବଧୁତ ପଧାନ, ସଭ୍ୟ ପଟେଲ ପ୍ରମୁଖ ପିଇବା ପାଣି ଯୋଗାଣର ତୁରନ୍ତ ବ୍ୟବସ୍ଥା ନ କଲେ ରାଜରାସ୍ତାକୁ ଓହ୍ଲାଇବୁ ବୋଲି କହିଛନ୍ତି।
