କୁନ୍ଦୁରା,୨୮ା୨ (ଡି.ଏନ.ଏ.): କୋରାପୁଟ ଜିଲା କୁନ୍ଦୁରା ବ୍ଲକ ଆସନା ପଞ୍ଚାୟତର ଆମ୍ବଗୁଡା ପ୍ରାଥମିକ ବିଦ୍ୟାଳୟରେ ସୋମବାର ଗ୍ରାମବାସୀ ତାଲା ପକାଇଛନ୍ତ। ପୂର୍ବାହ୍ନ ୧୧ଟା ସୁଦ୍ଧା ବିଦ୍ୟାଳୟ ଖୋଲି ନ ଥିଲା। ବିଦ୍ୟାଳୟ ପରିସରରେ ୫୦ରୁ ଉର୍ଦ୍ଧ୍ୱ ଛାତ୍ରୀଛାତ୍ର ବୁଲୁଥିଲେ। ୧୧ଟା ସୁଦ୍ଧା ବିଦ୍ୟାଳୟ ଖୋଲି ନ ଥିବା ଦେଖି ଅଭିଭାବକ ଓ ଗ୍ରାମବାସୀ ଛାତ୍ରୀଛାତ୍ରଙ୍କୁ ନିଜ ନିଜ ଘରକୁ ପଠାଇ ଦେଇଥିଲେ l ପରେ ଶିକ୍ଷକ ସତ୍ୟ ନାରାୟଣ ବିଶୋୟୀ ଆସିଥିଲେ। ଘରକୁ ଫେରି ଯାଇଥିବା ପିଲାଙ୍କୁ ଡାକି ସ୍କୁଲ ଖୋଲିବାକୁ ଗ୍ରାମବାସୀ ଓ ଅଭିଭାବକଙ୍କ ସହ ଆଲୋଚନା କରିଥିଲେ। ମାତ୍ର ଏହା ପ୍ରଥମ ଥର ନୁହେଁ ଏପରି ବହୁବାର ହେଲାଣି। ବାରମ୍ବାର କହିବା ପରେ ମଧ୍ୟ ଠିକ୍ ସମୟରେ ସ୍କୁଲ ନ ଖୋଲିବା, ସମସ୍ତ ଶିକ୍ଷକ ଠିକ୍ ସମୟରେ ନ ଆସିବା ନେଇ ଅଭିଯୋଗ କରି ଗ୍ରାମବାସୀ ତାଲା ଖୋଲି ନଥିଲେ। ପ୍ରଧାନ ଶିକ୍ଷକ ଜୟନ୍ତ ତ୍ରିପାଠୀଙ୍କୁ ପଚାରିବାରୁ ସେ କହିଥିଲେ, ବିଦ୍ୟାଳୟରେ ପ୍ରଥମ ରୁ ପଞ୍ଚମ ଶ୍ରେଣୀ ପର୍ଯ୍ୟନ୍ତ ୭୦ ଜଣ ଛାତ୍ରଛାତ୍ରୀ ପଢ଼ୁଛନ୍ତି I ସେ ସାମର୍ଥ୍ୟ ତାଲିମ୍ ନେଉଛନ୍ତି ଏବଂ ଅନ୍ୟ ଜଣେ ସହଶିକ୍ଷକ ଛୁଟିରେ ଥିବା ବେଳେ ସୋମବାର ଜଣେ ଶିକ୍ଷକ କାର୍ଯ୍ୟରତ ଥିଲେ। ସେ ଏକ ଘଣ୍ଟା ବିଳମ୍ବରେ ସ୍କୁଲକୁ ଯାଇଥିବାରୁ ଏହି ସମସ୍ୟା ଦେଖା ଦେଇଛି ବୋଲି କହିଛନ୍ତି। ଅନ୍ୟପକ୍ଷରେ ବିଦ୍ୟାଳୟର ଏହି ସମସ୍ୟା ନେଇ ଗ୍ରାମବାସୀ ଗୋଷ୍ଠୀ ଶିକ୍ଷା ଅଧିକାରୀ ତିଳୋତ୍ତମା ଗରଡ଼ାଙ୍କୁ ଭେଟି ଅଭିଯୋଗ ପତ୍ର ଦେଇଛନ୍ତି l ଏ ନେଇ ଗୋଷ୍ଠୀ ଶିକ୍ଷା ଅଧିକାରୀ ଗରଡ଼ାଙ୍କୁ ପଚାରିବାରୁ ଗ୍ରାମବାସୀ ଦେଇଥିବା ଅଭିଯୋଗ ଗ୍ରହଣ କରିଛନ୍ତି। ଅଭିଯୋଗର ତଦନ୍ତ ପାଇଁ ଅତିରିକ୍ତ ଗୋଷ୍ଠୀ ଶିକ୍ଷା ଅଧିକାରୀଙ୍କୁ ନିର୍ଦ୍ଦେଶ ଦେଇଛି। ରିପୋର୍ଟ ଆସିବା ପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଥିଲେ।
