ଖଇରା,୧୪।୩(ଡି.ଏନ.ଏ.):ବାଲେଶ୍ୱରରୁ କେନ୍ଦୁଝରକୁ ସଂଯୋଗ କରୁଥିବା ପଦୁନା-ତାଳକୁରୁଆ, ଦୋମୁହାଁଣି ଆର୍ଡି ରାସ୍ତା ନିର୍ମାଣରେ ବ୍ୟାପକ ଅନିୟମିତତା ହେଉଥିବା ନେଇ ଗତ ୧ବର୍ଷ ଧରି ବିଭିନ୍ନ ଗ୍ରାମର ଅଧିବାସୀ ଜିଲାପାଳ, ନିର୍ବାହୀ ଯନ୍ତ୍ରୀଙ୍କଠାରେ ବାରମ୍ବାର ଅଭିଯୋଗ କରିଆସୁଛନ୍ତି । କଂକ୍ରିଟ ଓ ପିଚୁ କାମ ଏଷ୍ଟିମେଟ ଅନୁଯାୟୀ ନ ହେବା, କଲଭର୍ଟ କାମଗୁଡିକ ମାସ ମାସ ଧରି ଅଧାପନ୍ତରିଆ ଅବସ୍ଥାରେ ଛାଡି ଦିଆଯିବା ଭଳି ଅଭିଯୋଗ ସତ୍ତ୍ୱେ ଠିକାଦାର ଏଥିପ୍ରତି ଦୃଷ୍ଟି ଦେଉ ନ ଥିବା ନେଇ ପୂର୍ବରୁ ବିଭିନ୍ନ ଗଣମାଧ୍ୟମରେ ବାରମ୍ବାର ପ୍ରକାଶ ପାଉଛି। ପୁନର୍ବାର ଅତିଷ୍ଠ ଗ୍ରାମବାସୀ ଶନିବାର ପ୍ରତିବାଦ ସ୍ବରୂପ ରାସ୍ତାକୁ ଜେସିବି ଲଗାଇ ତାଡି ଦେଇଛନ୍ତି । ପ୍ରଶାସନ ଏଥିପ୍ରତି ଦୃଷ୍ଟି ଦେବାକୁ ଦାବି ହୋଇଛି । ଏହି ୫.୩କି.ମି. ରାସ୍ତା ନିର୍ମାଣ ଲାଗି ପାଖାପାଖି ୪ କୋଟି ଟଙ୍କା ପ୍ରଦାନ କରାଯାଇଥିଲା । ବିନା ସୂଚନାଫଳକରେ କାର୍ଯ୍ୟ କରାଯିବା ଏବଂ ଅବଧି ଶେଷ ପରେ ମଧ୍ୟ କାର୍ଯ୍ୟ ସମ୍ପୂର୍ଣ୍ଣ ନ ହେବା, ଡଷ୍ଟ ଫିଲିଂ ବଦଳରେ ପାହାଡମାଟି ବ୍ୟବହାର କରାଯିବା ନେଇ ରାସ୍ତା ସଂଲଗ୍ନ ଯାତ୍ରୀମାନେ ଅଭିଯୋଗ କରିଥିଲେ। ଏବେ ପ୍ରଶାସନ କର୍ଣ୍ଣପାତ ନ କରିବା ତଥା ଦିଘି ନିକଟରେ ବିନା ଅନୁମତିରେ ବ୍ୟକ୍ତିଗତ ମାଲିକାନାରେ ଥିବା ଜମିରେ ରାସ୍ତା ନିର୍ମାଣ କରାଯିବା ପ୍ରତିବାଦରେ ଗ୍ରାମବାସୀ ଜେସିବି ଲଗାଇ ରାସ୍ତାକୁ ଡାଡି ଦେଇଛନ୍ତି।
