ହାଟଡିହୀ/ଛେନାପଦୀ,୯l୮(ଶୁଭକାନ୍ତ ନାୟକ/ନିରାକାର ପରିଡା): ଅସରାଏ ବର୍ଷା ହେଲେ ଲୋକଙ୍କ ଦୁଃଖ ବଢିଯାଉଛି l କିନ୍ତୁ ସ୍ଥାନୀୟ ଲୋକ ପ୍ରତିନିଧି କିମ୍ବା ପ୍ରଶାସନ ଏଥିପ୍ରତି ଦୃଷ୍ଟି ନ ଦେବା ପରିତାପର ବିଷୟ ସାଜିଛି । ବର୍ଷା ହେଲେ କେନ୍ଦୁଝର ଜିଲା ହାଟଡିହୀ ବ୍ଲକ ପଞ୍ଚୁଗୋଛିଆ ଗାଁର ଗୋବର ଗାଡ଼ିଆ ସାହି ପାଣି ଘେରରେ ରହୁଛି।
ବର୍ଷାଜଳ ନିଷ୍କାସନ ପାଇଁ ଉପଯୁକ୍ତ ବ୍ୟବସ୍ଥା ନ ଥିବାରୁ ରାସ୍ତା ଉପରେ ପାଣି ଜମି ରହୁଛି। ବର୍ଷାର ପରିମାଣ ବଢିଲେ ଲୋକଙ୍କ ଘର ଭିତରେ ପାଣି ପଶିଥାଏ । ଫଳରେ ସାହିବାସୀଙ୍କ ଦୈନନ୍ଦିନ ଜୀବନକୁ ଯଥେଷ୍ଟ ପ୍ରଭାବିତ କରିଥାଏ l ଗାଁର ମୁଖ୍ୟ ରାସ୍ତା ଦେଇ ୧୦୦ରୁ ଊର୍ଦ୍ଧ ସ୍ଥାନୀୟ ବାସିନ୍ଦା ନିୟମିତ ଯାତାୟାତ କରନ୍ତି । କିନ୍ତୁ ବର୍ଷା ସମୟରେ ରାସ୍ତାରେ ପାଣି ଜମି ରହିବା ଯୋଗୁ ସାହିବାସୀଙ୍କୁ ନାନା ସମସ୍ୟାର ସମ୍ମୁଖୀନ ହେବାକୁ ପଡ଼ୁଛି।
ବିଶେଷକରି ସ୍କୁଲ ଛାତ୍ରୀଛାତ୍ର ଓ ଅଙ୍ଗନବାଡ଼ି କେନ୍ଦ୍ରକୁ ଯାଉଥିବା ଛୋଟ ପିଲାମାନେ ଏହି ରାସ୍ତାରେ ଯାତାୟାତ କରିବା ବେଳେ ଅସୁବିଧା ଭୋଗୁଛନ୍ତି। ସାହିବାସୀଙ୍କ ଅଭିଯୋଗ ଅନୁଯାୟୀ, ରାସ୍ତାରେ ଜଳ ନିଷ୍କାସନ ବ୍ୟବସ୍ଥା ନ ଥିବାରୁ ସାମାନ୍ୟ ବର୍ଷାରେ ମଧ୍ୟ ପାଣି ଜମୁଛି।
ନୂତନ ରାସ୍ତା ନିର୍ମାଣ ବେଳେ ଜଳ ନିଷ୍କାସନ ପାଇଁ ଉପଯୁକ୍ତ ବ୍ୟବସ୍ଥା ନ କରିବାରୁ ଏପରି ସମସ୍ୟା ସୃଷ୍ଟି ହୋଇଛି। ଦୀର୍ଘ ଦିନ ଧରି ଏହି ସମସ୍ୟା ଲାଗି ରହିଥିଲେ ମଧ୍ୟ ସ୍ଥାୟୀ ସମାଧାନ ହୋଇ ପାରି ନାହିଁ। ଫଳରେ ଲୋକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି।
ବର୍ଷା ପାଣି ନିଷ୍କାସନ ପାଇଁ ଡ୍ରେନେଜ ବ୍ୟବସ୍ଥା କରାଗଲେ ସାହିବାସୀଙ୍କ ସମସ୍ୟା ଦୂର ହୋଇପାରିବ ବୋଲି ଗ୍ରାମର ଅନିତା ଜେନା, ଶଶିକାନ୍ତ ଜେନା, ସୁଲୋଚନା ଜେନା, ଜାନକୀ ଜେନା, ରଙ୍ଗବତୀ ଜେନା, ଭାନୁମତୀ ଜେନା, ଆନନ୍ଦ ଜେନା, ସରସତୀ ଜେନା, ବୁଲା ଜେନା, ପ୍ରମିଳା ଜେନା, ଜୟନ୍ତୀ ଜେନା, ଉମାକାନ୍ତ ଜେନା, ତରଣି ଜେନା, ମଦନ ଜେନା, ସୁଦାମ ଜେନା, ବାବୁ ଜେନା, ସୁଶାନ୍ତ ଜେନା ଓ ପ୍ରତୀମା ଜେନା ପ୍ରମୁଖ କହିଛନ୍ତି। ବ୍ଲକ କର୍ତ୍ତୃପକ୍ଷ ତୁରନ୍ତ ଉପଯୁକ୍ତ ବ୍ୟବସ୍ଥା ମାଧ୍ୟମରେ ସମସ୍ୟାର ସ୍ଥାୟୀ ସମାଧାନ ପାଇଁ ସାହିବାସୀ ଦାବି କରିଛନ୍ତି।
