ଭୁବନେଶ୍ୱର,୧।୩(ସ୍ପୋର୍ଟ୍ସ ବ୍ୟୁରୋ): ବିଜୟ ହଜାରେ ଟ୍ରଫିରେ ଓଡ଼ିଶା ଆଉ ଏକ ପରାଜୟ ବରଣ କରିଛି। ବେଙ୍ଗାଲୁରୁର ଜଷ୍ଟ କ୍ରିକେଟ ଏକାଡେମୀ ଗ୍ରାଉଣ୍ଡରେ ରବିବାର ଖେଳାଯାଇଥିବା ମ୍ୟାଚ୍ରେ ଓଡ଼ିଶାକୁ ଉତ୍ତରପ୍ରଦେଶ (ୟୁପି) ୧୭୦ଟି ବଲ ବାକି ରଖି ୬ ଉଇକେଟରେ ଅତି ସହଜରେ ପରାସ୍ତ କରିଛି। ଉତ୍ତରପ୍ରଦେଶ ଟସ୍ ଜିତି ଫିଲ୍ଡିଂ କରିବାକୁ ନିଷ୍ପତ୍ତି ନେଇଥିଲା। ପ୍ରଥମେ ବ୍ୟାଟିଂ କରି ଓଡ଼ିଶା ବିପର୍ଯ୍ୟୟର ସମ୍ମୁଖୀନ ହୋଇ ୪୦.୧ ଓଭରରେ ୧୪୮ ରନରେ ଅଲଆଉଟ ହୋଇଥିଲା। ଜବାବରେ ଉତ୍ତରପ୍ରଦେଶ ୨୧.୪ ଓଭରରେ ୪ ଉଇକେଟ ହରାଇ ୧୫୦ ରନକରି ବିଜୟ ହାସଲ କରିଥିଲା। ଏହି ବିଜୟ ସହ ୟୁପି ୪ ପଏଣ୍ଟ ହାସଲ କରିଛି।
୧୪୯ ରନ ଟାର୍ଗେଟର ପିଛା କରି ଉତ୍ତରପ୍ରଦେଶ ଭଲ ଆରମ୍ଭ କରିଥିଲା। ଦୁଇ ଓପନର ଅଭିଷେକ ଗୋସ୍ବାମୀ ଓ କରନ ଶର୍ମା ଆଉଟ ହେବା ପୂର୍ବରୁ ୨୫ ରନ ଲେଖାଏ ସଂଗ୍ରହ କରିଥିଲେ। ଶାନ୍ତନୁ ମିଶ୍ରଙ୍କୁ କ୍ୟାଚ୍ ଦେଇ ଅଭିଷେକ ରାଜେଶ ମହାନ୍ତିଙ୍କ ଦ୍ୱାରା ଆଉଟ ହୋଇଥିଲେ। କରନ ଉଇକେଟକିପର ପ୍ରବୀଣ ଲୋହାଙ୍କ ଦ୍ୱାରା ରନ୍ ଆଉଟ ହୋଇଥିଲେ। ୧୭ ରନକରି ପ୍ରିୟମ ଗର୍ଗ ରାଜେଶଙ୍କ ଦ୍ୱାରା କଟ୍ ଆଣ୍ଡ ବୋଲ୍ଡ ହୋଇଥିଲେ। ଉଇକେଟକିପର ବ୍ୟାଟ୍ସମ୍ୟାନ ଉପେନ୍ଦ୍ର ଯାଦବ ୩୨ ରନକରି କାର୍ତ୍ତିକ ବିଶ୍ୱାଳଙ୍କ ଦ୍ୱାରା ରନ୍ ଆଉଟ ହୋଇଥିଲେ। ସମୀର ଚୌଧୁରୀ ୨୯ ଓ ଆକାଶଦୀପ ନାଥ ୧୬ ରନକରି ଅପରାଜିତ ରହିବା ସହ ଦଳକୁ ଜିତାଇଥିଲେ। ବୋଲିଂରେ ଓଡ଼ିଶା ତରଫରୁ ରାଜେଶ ୨ ଉଇକେଟ ଅକ୍ତିଆର କରିଥିଲେ।
ପ୍ରଥମେ ବ୍ୟାଟିଂ କରିଥିବା ଓଡ଼ିଶା ତରଫରୁ ୮ ଜଣ ବ୍ୟାଟ୍ସମ୍ୟାନ ଦୁଇଅଙ୍କ ଛୁଇଁ ପାରି ନ ଥିଲେ। ଶୁଭ୍ରାଂଶୁ ସେନାପତି ୪୯ ରନକରି ଅପରାଜିତ ରହିଥିବା ବେଳେ ରାକେଶ ପଟ୍ଟନାୟକ ୪୬ ରନକରି ଶାନୁ ସଇନିଙ୍କ ଦ୍ୱାରା ଦୁର୍ଭାଗ୍ୟଜନକ ଭାବେ ରନ୍ ଆଉଟ ହୋଇଥିଲେ। ଓପନର ତଥା ଅଧିନାୟକ ଶାନ୍ତନୁ ମିଶ୍ର ୨୪ ରନ କରି ଶିବମ ଶର୍ମାଙ୍କ ଦ୍ୱାରା ବୋଲ୍ଡ ହୋଇଥିଲେ। ଅନ୍ୟମାନଙ୍କ ମଧ୍ୟରେ ସନ୍ଦୀପ ପଟ୍ଟନାୟକ ୩, କାର୍ତ୍ତିକ ବିଶ୍ୱାଳ ୪, ଅଙ୍କିତ ଯାଦବ ୨, ପ୍ରବୀଣ ଲୁହା ୭, ପ୍ରୟାସ ସିଂ ୩, ରାଜେଶ ମହାନ୍ତି ୫, ସୌରଭ କାନୋଜା ୧ ରନ କରି ଆଉଟ ହୋଇଥିବା ବେଳେ ତାରିଣୀ ସ ଖାତା ଖୋଲିପାରି ନ ଥିଲେ। ବୋଲିଂରେ ଉତ୍ତରପ୍ରଦେଶ ତରଫରୁ ଶିବମ ଶର୍ମା ୨୨ ରନ ବ୍ୟୟ କରି ସର୍ବାଧିକ ୬, ଆକ୍ୱିବ ଖାଁ ଓ ଶିବମ ମାଭି ଗୋଟିଏ ଲେଖାଏ ଉଇକେଟ ଅକ୍ତିଆର କରିଥିଲେ।
ସଂକ୍ଷିପ୍ତ ସ୍କୋର:
ଓଡ଼ିଶା ୪୦.୧ ଓଭରରେ ୧୪୮ ଅଲଆଉଟ୍
(ଶୁଭ୍ରାଂଶୁ- ୪୯, ରାକେଶ- ୪୬, ଶାନ୍ତନୁ- ୨୪, ଶିବମ ଶର୍ମା- ୬/ ୨୨)।
ଉତ୍ତର ପ୍ରଦେଶ ୨୧.୪ ଓଭରରେ ୧୫୦/୪
(ଉପେନ୍ଦ୍ର ଯାଦବ- ୩୨, ସମୀର ଚୌଧୁରୀ- ୨୯*, କରଣ ଶର୍ମା- ୨୫, ଅଭିଷେକ ଗୋସ୍ବାମୀ- ୨୫, ପ୍ରିୟମ ଗର୍ଗ-୧୭, ଆକାଶଦୀପ ନାଥ- ୧୬*, ରାଜେଶ ମହାନ୍ତି- ୨/୩୭ )।
