ଦିଗପହଣ୍ଡି,୨୮।୧୨(ଡି.ଏନ୍.ଏ.): ଗଞ୍ଜାମ ଜିଲା ଦିଗପହଣ୍ଡି ସହର ରାଜପୁର ରୋଡ଼ରେ ଥିବା ଗ୍ରାମ୍ୟ ଉନ୍ନୟନ ବିଭାଗର ସହକାରୀ ଯନ୍ତ୍ରୀଙ୍କ କାର୍ଯ୍ୟାଳୟରେ ମଙ୍ଗଳବାର ସକାଳେ ଭିଜିଲାନ୍ସ ଟିମ ଚଢ଼ାଉ କରଛି। କନିଷ୍ଠ ଯନ୍ତ୍ରୀ ଇଂ. ବଂଶୀଧର ସେଠୀଙ୍କ ପ୍ରକୋଷ୍ଠରୁ ବହୁ ସଂଖ୍ୟକ ନଥିପତ୍ର ଜବତ ହୋଇଛି। ଆୟବର୍ହିଭୂତ ସମ୍ପତ୍ତିଠୁଳ ଅଭିଯୋଗରେ ଏହି ଚଢାଉ କରାଯାଇଥିବା ସୂଚନା ମିଳିଛି। ଜଣେ ମହିଳା ଭିଜିଲାନ୍ସ ଡିଏସପି୍ଙ୍କ ନେତୃତ୍ୱରେ ବିଭାଗୀୟ କର୍ମଚାରୀମାନେ ଏହି ଚଢ଼ାଉରେ ସାମିଲ ଥିଲେ। ପ୍ରାପ୍ତ ସୂଚନାନୁସାରେ ବ୍ରହ୍ମପୁର ଗ୍ରାମ୍ୟ ଉନ୍ନୟନ ବିଭାଗ ଡିଭିଜନ – ୧ କାର୍ଯ୍ୟାଳୟ ଅଧିନରେ ଥିବା ଦିଗପହଣ୍ଡି ଗ୍ରାମ୍ୟ ଉନ୍ନୟନ ସହକାରୀ ଯନ୍ତ୍ରୀଙ୍କ କାର୍ଯ୍ୟାଳୟ ରେ ଇଂ. ବଂଶୀଧର ଗତ ପ୍ରାୟ ୩ ବର୍ଷ ହେଲା କନିଷ୍ଠଯନ୍ତ୍ରୀ ଭାବେ ଅବସ୍ଥାପିତ ଅଛନ୍ତି। ମଙ୍ଗଳବାର ଭୋରରୁ କଟକ ଏବଂ ବ୍ରହ୍ମପୁର ଭିଜିଲାନ୍ସ ବିଭାଗର ୨ ଡିଏସ୍ପି ଏବଂ ୬ ଇନ୍ସପେକ୍ଟରଙ୍କ ନେତୃରେ ଗଞ୍ଜାମ ଜିଲା ପୋଲସରା ଥାନା ଅଧୀନ ଚିରିକିପଡ଼ା ଶାସନସ୍ଥିତ କନିଷ୍ଠ ଯନ୍ତ୍ରୀଙ୍କ ପୈତୃକ ବାସଭବନ, ସେ ରହୁଥିବା ବ୍ରହ୍ମପୁର ଶକ୍ତିନଗର – ୨ ୟ ଲେନ୍ ସ୍ଥିତ ବାସଭବନ, ତାଙ୍କ ନାଁ ରେ ଥିବା ବ୍ରହ୍ମପୁର ଲୋଚାପଡ଼ା ଅଞ୍ଚଳରେ ଥିବା ବହୁ ମୂଲ୍ୟର ଅଟ୍ଟାଳିକା ଏବଂ ସେ ଚାକିରି କରୁଥିବା ଦିଗପହଣ୍ଡିସ୍ଥିତ ଗ୍ରାମ୍ୟ ଉନ୍ନୟନ ସହକାରୀ ଯନ୍ତ୍ରୀଙ୍କ କାର୍ଯ୍ୟାଳୟ ଉପରେ ଏକକାଳୀନ ଚଢ଼ାଉ କରାଯାଇଥିଲା। ତାଙ୍କ ବ୍ରହ୍ମପୁରସ୍ଥିତ ବାସ ଭବନରୁ ପ୍ରାୟ ୧୦ଟି ଯାଗାରେ ଥିବା ମୂଲ୍ୟବାନ ଘରବାରି ପ୍ଲଟର କାଗଜପତ୍ର, ବହୁ ପରିମାଣର ସୁନା ଗହଣା ସମେତ ପ୍ରାୟ ୪ କୋଟିରୁ ଊର୍ଦ୍ଧ୍ୱ ଟଙ୍କାର ଆୟବର୍ହିଭୁତ ସ୍ଥାବର ଅସ୍ଥାବର ସମ୍ପତ୍ତି ଭିଜିଲାନ୍ସ ଟିମ୍ ଜବତ କରି ତଦନ୍ତ ଚଳାଇଥିବା ଅସମର୍ଥିତ ସୂତ୍ରରୁ ଜଣାପଡିଛି।
