ପୁରୀ ଅଫିସ,୧।୧୧: ନୂତନ ଏସ୍ଓପି ଅନୁଯାୟୀ ସୋମବାରଠାରୁ ପୁରୀ ସହରବାସୀ ଶ୍ରୀମନ୍ଦିରର ପଶ୍ଚିମ ଦ୍ୱାର ଦେଇ ପ୍ରବେଶକରି ମହାପ୍ରଭୁଙ୍କୁ ଦର୍ଶନ କରିପାରିବେ। ଏଥିପାଇଁ କୋଭିଡ୍ କଟକଣା ପାଳନ ସହ ଆବଶ୍ୟକ ପରିଚୟପତ୍ର ଓ କୋଭିଡ୍ ନେଗେଟିଭ୍ ରିପୋର୍ଟ କିମ୍ବା ଦୁଇଡୋଜ୍ ଟିକା ନେଇଥିବାର ପ୍ରମାଣପତ୍ର ଦେଖାଇବାକୁ ପଡ଼ିବ। ସୂଚନାଯୋଗ୍ୟ, ପୂର୍ବରୁ ପୁରୀ ସହରବାସୀ କେବଳ ସିଂହଦ୍ୱାର ଦେଇ ଦର୍ଶନ ସୁଯୋଗ ପାଉଥିଲେ।
ଏ ନେଇ ଜିଲା ପ୍ରଶାସନ ପକ୍ଷରୁ ପଶ୍ଚିମଦ୍ୱାର ନିକଟରେ ସ୍ବତନ୍ତ୍ର ବ୍ୟବସ୍ଥା କରାଯାଇଛି। ମେଟାଲ ଡିଟେକ୍ଟର ସମେତ ସାନିଟାଇଜର ଓ ଥର୍ମାଲ ସ୍କ୍ରିନିଂ ଭଳି ବ୍ୟବସ୍ଥା ହୋଇଛି। ଏହାଦ୍ୱାରା ପୁରୀ ସହରର ଅଧିକାଂଶ ଲୋକ ସରଳ ଦର୍ଶନ ବ୍ୟବସ୍ଥାର ସୁଯୋଗ ପାଇବେ ବୋଲି ଜିଲାପାଳ ସମର୍ଥ ବର୍ମା କହିଛନ୍ତି। ନିତିଦିନିଆ ଦର୍ଶନ କରୁଥିବା ପୁରୀର ସାହି ବାସିନ୍ଦାମାନେ ସିଂହଦ୍ୱାରରେ ଘଣ୍ଟା ଘଣ୍ଟା ଧରି ଧାଡ଼ିରେ ଅପେକ୍ଷା କରି ରହୁଥିଲେ। ଏବେ ଏହି ସମସ୍ୟା ଦୂର ହୋଇପାରିବ। ତେବେ ପଶ୍ଚିମଦ୍ୱାର ଦେଇ ପ୍ରବେଶ କରୁଥିବା ଲୋକେ ପଶ୍ଚିମଦ୍ୱାରରେ ପ୍ରସ୍ଥାନ କରିପାରିବେ ନାହିଁ, ସେମାନଙ୍କୁ ମଧ୍ୟ ଉତ୍ତରଦ୍ୱାର ଦେଇ ବାହାରିବାକୁ ପଡ଼ିବ ବୋଲି ଜିଲାପାଳ କହିଛନ୍ତି। ଅନ୍ୟପକ୍ଷରେ ଏଭଳି ଏସ୍ଓପିକୁ ନେଇ ପୁରୀ ସହରବାସୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ପଶ୍ଚିମଦ୍ୱାରରେ ପ୍ରସ୍ଥାନ ହୋଇପାରିଲେ ଦର୍ଶନ ବ୍ୟବସ୍ଥା ସରଳ ହେବା ସହ ଗହଳି କମିପାରନ୍ତା ବୋଲି ସହର ବାସିନ୍ଦା ଚିରଞ୍ଜୀବୀ ବିଶ୍ୱାଳ କହିଛନ୍ତି। ଚାରିଦ୍ୱାରରେ ପ୍ରବେଶ ଓ ପ୍ରସ୍ଥାନ ଅନୁମତି ପାଇଁ ପୁରୀ ଓକିଲ ସଂଘ ଏବଂ ଶ୍ରୀଜଗନ୍ନାଥ ସେନା ସମେତ ବିଭିନ୍ନ ମହଲରେ ଦାବି ହେଉଛି।
