କୋଲକାତା, ୨୨।୮: ସ୍ବାଧୀନତା ଦିବସରେ ତ୍ରିରଙ୍ଗାକୁ ଅସମ୍ମାନ। ଏଭଳି ଏକ ଘଟଣାକ୍ରମରେ ପଶ୍ଚିମବଙ୍ଗ ମାଲଦା ଜିଲାର ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି। ଏଥିରେ ଶାସକ ତୃଣମୂଳ କଂଗ୍ରେସର କିଛି ସ୍ଥାନୀୟ ନେତା ମିଶି ତ୍ରିରଙ୍ଗାର କେକ୍ କାଟିବା ସହ ଖାଇଥିବା ଦେଖାଯାଉଛି। ଭିଡିଓକୁ ନେଇ ଉଭୟ ଭାଜପା ଏବଂ କଂଗ୍ରେସ ସମାଲୋଚନା କରିବା ସହ ଜାତୀୟ ପତାକାକୁ ଅସମ୍ମାନ କରାଯାଇଥିବା ଅଭିଯୋଗ କରିଛନ୍ତି।
ଅଗଷ୍ଟ ୧୫ରେ ଦେଶ ୭୪ତମ ସ୍ବାଧୀନତା ଦିବସ ପାଳନ କରିଥିଲା। ଏହି ଅବସରରେ ଜିଲାର ରାତୁଆ ଅଞ୍ଚଳରେ ଏକ କାର୍ଯ୍ୟକ୍ରମର ଆୟୋଜନ କରାଯାଇଥିଲା। ଭିଡିଓଟି ଉକ୍ତ ଦିନର ହୋଇଥିବା ବେଳେ ଶୁକ୍ରବାର ସୋସିଆଲ ମିଡିଆକୁ ଆସିଥିଲା।
ଭିଡିଓରେ ବରିଷ୍ଠ ଟିଏମ୍ସି ନେତା ସେହନାଜ କ୍ୱାଦ୍ରିଙ୍କ ସମେତ ମୌସମ ନୁର, ସେଖ୍ ୟାସିନ୍, କ୍ରିଷ୍ଣା ଦାସ ପ୍ରମୁଖଙ୍କୁ ଦେଖିବାକୁ ମିଳୁଛି। ଏହାକୁ ନେଇ ମାଲଦା କଂଗ୍ରେସ ମୁଖ୍ୟ ମୁସ୍ତକ ଆଲାମ କହିଛନ୍ତି, ଟିଏମ୍ସିର ନେତାମାନେ ଜାତୀୟ ପତାକାକୁ ସମ୍ମାନ ଜଣାନ୍ତି ନାହିଁ ତାହା ଭିଡିଓରୁ ସ୍ପଷ୍ଟ ହୋଇଛି। ଆମ ତ୍ରିରଙ୍ଗା ଆମର ଗର୍ବ। ଆମର ସୈନ୍ୟମାନେ ଭାରତମାତାର ସୁରକ୍ଷା ପାଇଁ ବଳିଦାନ ଦେଇଛନ୍ତିି। ହେଲେ ଏଠାରେ ଶାସକ ଦଳର କିଛି ନେତା ସେମାନଙ୍କ ବଳିଦାନକୁ ଭୁଲି ଯାଇଥିବା ସେ କହିଛନ୍ତି।
ସେହିଭଳି ମାଲଦା(ଦକ୍ଷିଣ)ରୁ ଭାଜପା ଏମ୍ପି ଥିବା ଖାଗେନ ମୁର୍ମୁ ଘଟଣାକୁ ନେଇ ଦୁଃଖପ୍ରକାଶ କରିଛନ୍ତି। ଜଣେ ଭାରତୀୟ ଭାବେ ଜାତୀୟ ପତାକାକୁ ଏଭଳି ଅସମ୍ମାନ କରିବା ଠିକ୍ ନୁହେଁ ବୋଲି ସେ କହିଛନ୍ତି।
