ରସୁଲପୁର,୫ା୭(ରଂଜିତ ରାଉତ):ଦୀର୍ଘଦିନର ଅପେକ୍ଷା ପରେ ଶୁକ୍ରବାର ପୂର୍ବାହ୍ନରେ ବରୀ ବିଜେଡି ବିଧାୟକ ବିଶ୍ୱରଞ୍ଜନ ମଲ୍ଲିକ ରସୁଲପୁର ବ୍ଲକକୁ ସମୀକ୍ଷା କରିବାକୁ ଆସି ଫେରିଯାଇଛନ୍ତି। ବିଡିଓ ଅବନିକାନ୍ତ ସାହୁ ରାତିଅଧିଆ ଛୁଟିରେ ରହିବାରୁ ବିଧାୟକ ସମୀକ୍ଷା ବୈଠକୁ ବାତିଲ କରିଦେଇଛନ୍ତି। ସମୀକ୍ଷା ବୈଠକ ସମ୍ପର୍କରେ ୬ଦିନ ପର୍ବୂରୁ ବିଡିଓଙ୍କୁ ଅବଗତ କରାଯାଇଥିଲା। ମାତ୍ର କାହାକୁ ନ ଜଣାଇ ବିଡିଓ ଛୁଟିରେ ଚାଲିଯିବା ଘଟଣା ସାଧାରଣରେ ସନ୍ଦେହ ସୃଷ୍ଟି କରିଛି। ଏହି ଘଟଣାର ତଦନ୍ତ କରାଯାଇ ବିଡିଓଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବାକୁ ବିଧାୟକ ଦାବି କରିଛନ୍ତି। ସମୀକ୍ଷା ବୈଠକରେ ଯୋଗଦେବା ପୂର୍ବରୁ ବିଧାୟକ ବ୍ଲକ ପରିସରରେ ପହଞ୍ଚି ସେଠାରେ ଥିବା ବିଭିନ୍ନ ପ୍ରତିମୂର୍ତ୍ତିରେ ପୁଷ୍ପମାଲ୍ୟଅର୍ପଣ କରିଥିଲେ। ଏହି ସମୟରେ ବିଧାୟକଙ୍କ ସମର୍ଥକ ତଥା ବିଜେଡି ନେତାମାନେ ଜୟ ନବୀନ, ଜୟ ବିଜେଡି ସ୍ଲୋଗାନ ଦେଇଥିଲେ। ବ୍ଲକ ପରିସରରେ ଉପସ୍ଥିତ ଥିବା ଭାଜପା ସମର୍ଥକମାନେ ଜୟ ଶ୍ରୀରାମ ନାରାବାଜୀ କରିଥିଲେ। ଏହି ଭଳି ହୋହଲ୍ଲା ଭିତରେ ବ୍ଲକ କାର୍ଯ୍ୟାଳୟ ପରିସରରେ କମ୍ପି ଉଠିଥିଲା।
ବ୍ଲକ ପ୍ରଶାସନ ପକ୍ଷରୁ ଆୟୋଜିତ ସ୍ବାଗତ ଓ ସମୀକ୍ଷା ବୈଠକରେ ଯାଜପୁର ଉପଜିଲାପାଳ ଅଂଶୁମାନ ଶତପଥୀ ଅଧ୍ୟକ୍ଷତା କରିଥିଲେ। ମୁଖ୍ୟଅତିଥି ଭାବେ ବିଧାୟକ ମଲ୍ଲିକ ଯୋଗଦେଇ ବିଡିଓଙ୍କ ଅନୁପସ୍ଥିତିକୁ ନେଇ ଅସନ୍ତୋଷ ପ୍ରକାଶ କରିବା ସହ ବିଡିଓଙ୍କ ବିନା ସମୀକ୍ଷା କରାଯାଇ ପାରିବନାହିଁ। ବିଡିଓଙ୍କ ସହ ଯୋଗାଯୋଗ କରି ଆଉ ଏକ ତାରିଖ ସ୍ଥିର କରାଯାଉ, ଉକ୍ତ ଦିନ ବିଭିନ୍ନ ଉନ୍ନୟନ କାର୍ଯ୍ୟକୁ ସମୀକ୍ଷା କରାଯିବ ବୋଲି ସୂଚନା ଦେଇଥିଲେ। ତୁରନ୍ତ ବିଡିଓ ଛୁଟି ନେବା ପଛର ଅସଲ କାରଣ ସମ୍ପର୍କରେ ଜାଣିବା ସହ ତାଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ନିଆଯିବା ପାଇଁ ଯାଜପୁର ଉପଜିଲାପାଳଙ୍କୁ କହିଥିଲେ। ବ୍ଲକର ପ୍ରଶାସନିକ ଅଧିକାରୀ ଓ ଅଧସ୍ତନ କର୍ମଚାରୀ ରାଜନୀତିରୁ ଊର୍ଦ୍ଧ୍ୱରେ ରହି କାର୍ଯ୍ୟ କରିବା ସହ ସୀମା ଉଲ୍ଲଂଘନ ନ କରିବାକୁ କହିଥିଲେ। ବ୍ଲକର ସମସ୍ତ ଜନ ପ୍ରତିନିଧି, ଜନସାଧାରଣମାନଙ୍କୁ ଗଣତାନ୍ତ୍ରିକ ଅଧିକାର ପ୍ରଦାନ ଦିଗରେ ବ୍ଲକ ପ୍ରଶାସନ ଧ୍ୟାନ ଦେଉ ବୋଲି ସେ ଦାବି କରିଥିଲେ। ଏସବୁ ଦିଗରେ ବ୍ୟତୀକ୍ରମ ଘଟିଲେ ବିଜେଡି ବିରୋଧୀ ଦଳର ଭୂମିକା ନିର୍ବାହ କରିବାକୁ ପଛଘୁଞ୍ଚା ଦେବ ନାହିଁ ବୋଲି ବିଧାୟକ ବକ୍ତବ୍ୟ ଛଳରେ ଚେତାବନୀ ଦେଇଥିଲେ। ବିଧାୟକଙ୍କ ବକ୍ତବ୍ୟରେ ଜନପ୍ରତିନିଧି ଓ ଦଳୀୟ ଛାମୁଆ କର୍ମୀ ଉତ୍ସାହିତ ହୋଇ ଉଠିଥିବା ଦେଖାଯାଇଥିଲା। ସମ୍ମାନିତ ଅତିଥି ଭାବେ ବ୍ଲକ୍ ଅଧ୍ୟକ୍ଷ ଅରୁଣ ରାଉତ ଯୋଗଦେଇ ବ୍ଲକ ପ୍ରଶାସନ ଆଗକୁ ଶୃଙ୍ଖଳିତ ହୋଇ କାର୍ଯ୍ୟ କରିବାକୁ ପଡିବ ବୋଲି କହିଥିଲେ। ପରିବର୍ତ୍ତିତ ରାଜନୈତିକ ପରିସ୍ଥିତି ସହ ଖାପ୍ଖୁଆଇବା ସହ ଦଳମତ ନିର୍ବିଶେଷରେ କାର୍ଯ୍ୟକ୍ରମ କରାଯିବା ଉପରେ ଗୁରୁତ୍ୱ ଦେଇଥିଲେ।
ଯାଜପୁର ଉପଜିଲାପାଳ ଶତପଥୀ ବିଧାୟକଙ୍କ ଦାବିକୁ ସ୍ବୀକାର କରିବା ସହ ବିଡିଓ ତାଙ୍କର ପାରିବାରିକ କାରଣରୁ ଛୁଟିରେ ଯାଇଛନ୍ତି ବୋଲି ସଫେଇ ଦେଇଥିଲେ। ବିଡିଓ ଅଚାନକ ଛୁଟି ନେବା କାରଣକୁ ତଦନ୍ତ ପରିସରଭୂକ୍ତ କରାଯିବ। ଏ ଦିଗରେ କୌଣସି ଅନିୟମିତତା ହୋଇଥିବା ଜଣାପଡିଲେ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ଉପଜିଲାପାଳ ପ୍ରତିଶ୍ରୁତି ଦେଇଥିଲେ। ଏହାଛଡ଼ା ଆଗକୁ ଏଭଳି ଘଟଣାର ପୁନରାବୃତ୍ତି ଯେମିତି ନ ଘଟିବ ସେଥିପ୍ରତି ଜିଲା ପ୍ରଶାସନ ଧ୍ୟାନ ଦେବ ବୋଲି ସେ ମତ ରଖିଥିଲେ। ଏବିଡିଓ ଦିବ୍ୟକାନ୍ତି ମିଶ୍ର ପ୍ରାରମ୍ଭିକ ସୂଚନା ପ୍ରଦାନ କରିଥିବା ବେଳେ ବ୍ଲକ ସହକାରୀ ନିର୍ବାହୀ ଯନ୍ତ୍ରୀ ସୋନାଲି ଧଳ, ବିତ୍ତୀୟ ଅଧିକାରୀ ପ୍ରୀତିପିୟୁଷ ଦାସ ପ୍ରମୁଖ ମଞ୍ଚରେ ଉପସ୍ଥିତ ଥିଲେ। ବୈଠକ ପ୍ରାରମ୍ଭରେ ବ୍ଲକ କର୍ମଚାରୀମାନେ ପରିଚୟ ପ୍ରଦାନ କରିଥିଲେ। ବିଧାୟକ ବୈଠକକୁ ଯୋଗଦେବାକୁ ଆସି କୁଆଖିଆଠାରେ ପହଞ୍ଚିଥିଲେ। ସେଠାରୁ କର୍ମୀମାନଙ୍କ ସହ ଏକ ପଦଯାତ୍ରାରେ ଆସି ବ୍ଲକ ପରିସରରେ ପହଞ୍ଚିଥିଲେ। ବ୍ଲକ ପ୍ରଶାସନ ପକ୍ଷରୁ ବିଧାୟକଙ୍କୁ ଉତ୍ତରୀୟ ଓ ପୁଷ୍ପଗୁଚ୍ଛ ଦେଇ ସମ୍ମାନିତ କରାଯାଇଥିଲା। ବ୍ଲକ୍ ଉପାଧ୍ୟକ୍ଷା ଜୟନ୍ତି ଦାଶ ଧନ୍ୟବାଦ ଦେଇଥିଲେ।
