ପାରାଦୀପ,୨୮।୮(ସ୍ବ.ପ୍ର.): ପାରାଦୀପ ଆଦର୍ଶଥାନା ଅଞ୍ଚଳରେ ଆଶାକର୍ମୀଙ୍କୁ ଗଣବଳାତ୍କାର ଘଟଣାରେ ଶନିବାର ପୋଲିସ ମାମଲା (ନଂ.୨୭୫/୨୨)ରୁଜୁ କରିଛି। ପୀଡ଼ିତାଙ୍କ ଡାକ୍ତରୀମାଇନା କରାଯାଇ କୁଜଙ୍ଗ ପ୍ରଥମଶ୍ରେଣୀ ବିଚାର ବିଭାଗୀୟ ମାଜିଷ୍ଟ୍ରେଟଙ୍କ ପାଖରେ ବୟାନ ରେକର୍ଡ କରାଯାଇଛି। ଏତଦ୍ବ୍ୟତୀତ ସନ୍ଧାନୀ କୁକୁର ଓ ସାଇଣ୍ଟିଫିକ ଟିମ୍ ଜରିଆରେ ଘଟଣାସ୍ଥଳରେ ତଦନ୍ତ କରାଯାଇଛି। ଏହି ଘଟଣାକୁ ୨୪ ଘଣ୍ଟା ବିତି ଯାଇଥିଲେ ମଧ୍ୟ ଏପର୍ଯ୍ୟନ୍ତ କୌଣସି ଅଭିଯୁକ୍ତଙ୍କୁ ପୋଲିସ ଗିରଫ କରିନାହିଁ। ଏ ସମ୍ପର୍କରେ ଥାନାଧିକାରୀ ଶୁଭଲକ୍ଷ୍ମୀ ପୂଜାରୀ କୁହନ୍ତି, ଅଭିଯୁକ୍ତଙ୍କ ସମ୍ପର୍କରେ ସୂଚନା ମିଳିଛି। ଖୁବଶୀଘ୍ର ସେମାନଙ୍କୁ ଗିରଫ କରାଯିବ।
ସୂଚନାଯୋଗ୍ୟ, ଏହି ଥାନା ଅଞ୍ଚଳର ଜଣେ ଆଶାକର୍ମୀ ଖରାବେଳେ ନୂଆବଜାରରେ ରହୁଥିବା ଜଣେ ଏଏନ୍ଏମ୍ କର୍ମୀଙ୍କୁ ଦେଖା କରି ସାଇକେଲ୍ରେ ଫେରୁଥିଲେ। ଏହି ସମୟରେ ନୂଆବଜାର ହୋଟେଲ ଛକ ନିକଟରୁ ୪ ଜଣ ଯୁବକ ତାଙ୍କୁ ବଳପୂର୍ବକ ଏକ ନାଲି ରଙ୍ଗର କାରରେ ଉଠେଇ ନେଇଥିଲେ। ସେମାନେ ସମ୍ପୃକ୍ତା ମହିଳାଙ୍କ ପାଟିରେ କପଡା ଦେଇ ନେହେରୁବଙ୍ଗଳା ନେଇଯାଇଥିଲେ। ଏଥିସହ ପୀଡିତାଙ୍କ ସାଇକେଲକୁ ହୋଟେଲ ଛକ ପାଖରେ ଥିବା ବଣୁଆ ଘାସ ଭିତରକୁ ଫୋପାଡ଼ି ଦେଇଥିଲେ। ଅଭିଯୁକ୍ତମାନେ ସମ୍ପୃକ୍ତା ମହିଳାଙ୍କୁ ନେହେରୁବଙ୍ଗଳା ମହାନଦୀ ମୁହାଣ ପାଖ ପଥରବନ୍ଧ ଅଞ୍ଚଳର ଏକ ନିକାଞ୍ଚନ ଜାଗାକୁ ନେଇ ବଳାତ୍କାର କରିଥିଲେ। ସାରେ ପୁଣି କାରରେ ଆଣି ନୂଆବଜାର ହୋଟେଲ ଛକ ନିକଟରେ ଛାଡି ପଳାଇଥିଲେ ବୋଲି ପୀଡ଼ିତା ଗଣମାଧ୍ୟମ ପ୍ରତିନିଧିମାନଙ୍କୁ କହିଛନ୍ତି। ସମ୍ପୃକ୍ତ ମହିଳା ବର୍ଷେ ହେବ ଆଶାକର୍ମୀ ଭାବେ କାମ କରୁଛନ୍ତି। ଏବେ ସେ ବାପଘରେ ରହୁଛନ୍ତି। ଛାଡ଼ପତ୍ର ମାମଲା ଏବେ କୋର୍ଟରେ ବିଚାରାଧୀନ ରହିଛି।
