ପଟ୍ଟାଙ୍ଗି,୯।୭(ଶରତ କୁମାର ଧଳ): କୋରାପୁଟ ଜିଲା ପଟ୍ଟାଙ୍ଗି ବ୍ଲକ ସଦର ମହକୁମା ଠାରୁ ଅଳ୍ପ କିଛି ଦୂରରେ ଜାତୀୟ ରାଜପଥ ବିଭାଗ ପକ୍ଷରୁ ନୂତନ କରି ନିର୍ମାଣ ହୋଇଥିବା କଲଭେଟରେ ଦୁଇଟି ଟ୍ରକ ଅଟକି ଥିବାରୁ ୨୬ନଂ ରାଜପଥ ଦୀର୍ଘ ସମୟ ଧରି ଅବରୋଧ ହୋଇଥିଲା । ସୂଚନା ଅନୁଯାଇ ପଟ୍ଟାଙ୍ଗି ଥାନା ନିକଟସ୍ଥ ରାଜପଥ ଉପରେ ରହିଥିବା ଏକ କଲଭେଟ ଅନେକ ପୁରୁଣା ହୋଇଥିବାରୁ ବିଭାଗ ପକ୍ଷରୁ କଲଭେଟଟିକୁ ଭାଙ୍ଗି ନୂତନ ଭାବେ ନିର୍ମାଣ କରାଯାଇଥିଲା କିନ୍ତୁ ନିର୍ମାଣ ପରେ ବିଭାଗ ପକ୍ଷରୁ କଲଭେଟ ସ୍ଥଳେ ପିଚୁ କାର୍ଯ୍ୟ କରାନଯାଇ ମାଟି ପକାଇ ଦିଆଯାଇଥିଲା । ଯାହା ଫଳରେ କି ଗତ ଲଗାଣ ବର୍ଷା ଏବଂ ଯାତାୟାତ କରୁଥିବା ଯାନବାହନ ପ୍ରଭାବରେ ମାଟିଗୁଡିକ ଉଡ଼ିଯିବା ଦ୍ୱାରା ବଡ ବଡ ଧରଣର ଖାଲଖମା ହୋଇ ପଡିରହିଥିଲେ ମଧ୍ୟ ବିଭାଗ ପକ୍ଷରୁ କୌଣସି ସ୍ଥାୟୀ ପଦକ୍ଷେପ ନିଆଯାଇନଥିଲା । ଫଳରେ ଗୁରୁବାର ପଡୋଶୀ ଆନ୍ଧ୍ର ରାଜ୍ୟରୁ କୋରାପୁଟ ଅଭିମୁଖେ ଆସୁଥିବା ଦୁଇଟି ଟ୍ରକ କଲଭେଟର ଖାଲଖମାରେ ପଡି ଯାନ୍ତ୍ରିକ ତ୍ରୁଟି ହେବା ଦ୍ୱାରା ଟ୍ରକ ଦୁଇଟି ଅଟକି ରହିଯିବାରୁ ଜାତୀୟ ରାଜପଥ ଦୀର୍ଘ ସମୟ ଧରି ଅବରୋଧ ହୋଇ ପଡିଥିଲା । ଖବରପାଇ ସ୍ଥାନୀୟ ପୋଲିସ ଘଟଣାସ୍ଥଳେ ପହଞ୍ଚି ଜେସିପି ଗାଡ଼ି ଦ୍ୱାରା ଟ୍ରକ ଦୁଇଟିକୁ ହଟାଇବା ପରେ ଘଟଣାସ୍ଥଳ ଦେଇ ଯାନବାହନ ଚଳାଚଳ ସ୍ବାଭାବିକ ହୋଇଥିଲା ।
