ବାସ୍ତୁଶାସ୍ତ୍ର ଅନୁଯାୟୀ, ଏମିତି କିଛି ବିଶେଷ ଉପାୟ ରହିଛି; ଯାହାକୁ ଆପଣାଇଲେ ଘରେ ସୁଖସମୃଦ୍ଧି ବୃଦ୍ଧି ହେବା ସହ ସମ୍ପର୍କରେ ନିବିଡ଼ତା ଆସିଥାଏ। ତା’ସହିତ ଅନେକ ବାଧାବିଘ୍ନରୁ ମଧ୍ୟ ସୁରକ୍ଷା ମିଳିଥାଏ…
* ପ୍ରତିଦିନ ତୁଳସୀ ଚଉରାରେ ଜଳପ୍ରଦାନ କରିବା ସହ ସନ୍ଧ୍ୟାବେଳେ ଚଉରା ମୂଳରେ ଦୀପ ଜାଳିଲେ ମାତା ଲକ୍ଷ୍ମୀ ପ୍ରସନ୍ନ ହୋଇଥାନ୍ତି। ଏହି କାର୍ଯ୍ୟ ନିଷ୍ଠାର ସହ କଲେ ଜୀବନରେ ଧନ ଓ ସୁଖଶାନ୍ତିର ଅଭାବ କେବେ ବି ଦେଖାଯାଏ ନାହିଁ।
* ଘରର ଉତ୍ତର-ପୂର୍ବ କୋଣରେ କୁବେର ଯନ୍ତ୍ର ସ୍ଥାପନା କରିବା ମଙ୍ଗଳଦାୟକ ହୋଇଥାଏ। ହେଲେ କେବଳ କୁବେର ଯନ୍ତ୍ର ସ୍ଥାପନା କରିଦେଲେ ତ ହେବନି ବୁଝିବିଚାରି ଧନକୁ ଠିକ୍ ବାଟରେ ଖର୍ଚ୍ଚ କଲେ ହିଁ ପ୍ରକୃତ ସୁଖ ମିଳେ ବୋଲି ବିଶ୍ୱାସ ରହିଛି।
* ଆର୍ଥିକ ସ୍ଥିତିକୁ ଦୃଢ଼ କରିବା ପାଇଁ ପ୍ରତିଦିନ ଘରର ଉତ୍ତର-ପୂର୍ବ କୋଣରେ ଗଙ୍ଗାଜଳ ଛିଞ୍ଚତ୍ବା ଶୁଭଙ୍କର ହୋଇଥାଏ। ମାନ୍ୟତା ରହିଛି, ଏପରି କଲେ ଘରେ ସକାରାତ୍ମକ ଊର୍ଜା ବି ବଢ଼ିଥାଏ।
* ସେହିପରି ଧନସମ୍ପତ୍ତି ବୃଦ୍ଧି କରିବା ପାଇଁ ଘରର ଦକ୍ଷିଣ-ପଶ୍ଚିମ କୋଣରେ ଆଲମାରି ହେଉ ଅଥବା ଟ୍ରେଜେରିକୁ ଏମିତି ରଖିବେ, ଯେମିତି ଏହାର ମୁହଁ ଉତ୍ତର ଦିଗ ଆଡକୁ ରହୁଥିବ। ଏହି ଉପାୟ ବି ମଣିଷ ଜୀବନରେ ଅନେକ ସକାରାତ୍ମକ ପ୍ରଭାବ ପକାଇଥାଏ।
* ଘରର ଉତ୍ତର-ପୂର୍ବ ଦିଗରେ ଭାରି ଆସବାବପତ୍ର କିମ୍ବା ଚପଲ ଷ୍ଟାଣ୍ଡ ରଖିବା ଆଦୌ ଠିକ୍ ନୁହେଁ। ଏହାଦ୍ୱାରା ବି ଘରେ ନକାରାତ୍ମକ ଊର୍ଜା ସୃଷ୍ଟି ହୋଇଥାଏ ବୋଲି ବିଶ୍ୱାସ ରହିଛି।
