ନୂଆଦିଲ୍ଲୀ,୨୫।୫: ଆଗକୁ ୨୦୨୪ ଲୋକସଭା ନିର୍ବାଚନ ଥିବାବେଳେ ଅନ୍ୟ ରାଜ୍ୟଗୁଡିକର ବିଧାନସଭା ନିର୍ବାଚନ ମଧ୍ୟ ଆସୁଛି। ତେବେ ଏହି ସମୟରେ ବିରୋଧୀ ଏକଜୁଟ ହେଉଥିବା ବେଳେ ମଧ୍ୟପ୍ରଦେଶ ଭାଜପାରେ ଅନ୍ତକନ୍ଦଳ ପଦାରେ ପଡିଛି। ମଧ୍ୟପ୍ରଦେଶ କଂଗ୍ରେସ ଟ୍ବିଟରରେ ଏକ ଭିଡିଓ ସେୟାର କରିଛି ଯେଉଁଥିରେ ଭାଜପା ନେତା ଜ୍ୟୋତିରାଦିତ୍ୟ ସିନ୍ଧିଆଙ୍କୁ ମଧ୍ୟପ୍ରଦେଶ ଗୁନାର ଭାଜପା ସାଂସଦ କେ.ପି ଯାଦବ ସମାଲୋଚନା କରିଛନ୍ତି। ମଧ୍ୟପ୍ରଦେଶରୁ ଦିଲ୍ଲୀ କଂଗ୍ରେସ ନେତାମାନେ ଏହି ଭିଡିଓକୁ ସେୟାର କରି ସିନ୍ଧିଆଙ୍କୁ କଟାକ୍ଷ କରିଛନ୍ତି।
ଭିଡିଓରେ ଯାଦବ କହୁଛନ୍ତି ଯେ, ଭିଡ଼ ଭିତରେ କିଛି ମୂର୍ଖ ଏମିତି ଅଛନ୍ତି ଯେଉଁମାନେ କେଉଁଠାରେ କଣ କୁହାଯାଏ ଜାଣି ନାହାନ୍ତି? ମୁଁ ଏହା ପୂର୍ବରୁ ଖୋଲାଖୋଲି ଭାବେ କହିଥିଲି ଯେ, ଯେଉଁ ବ୍ୟକ୍ତି କେଉଁ ଦଳରେ ଅଛନ୍ତି ବୋଲି ଜାଣନ୍ତି ନାହିଁ , କେନ୍ଦ୍ର ତଥା ରାଜ୍ୟରେ ଭାଜପା ସରକାର ଅଛି ସେ କଥା ମଧ୍ୟ ଜାଣନ୍ତି ନାହିଁ, ପୁଣି ଏହି ରାଜ୍ୟରେ ସେ ଭାଜପା ସାଂସଦ ହୋଇ ମଞ୍ଚ ଉପରେ ଜନତାଙ୍କୁ ସମ୍ବୋଧନ କରୁଛନ୍ତି ଯେ, ସେ ଭୂଲ କରିଛନ୍ତି।
ସେ ଭିଡିଓରେ ଆହୁରି କହିଛନ୍ତି, ତାଙ୍କ ବୁଦ୍ଧିମତାକୁ ମୁଁ ପ୍ରଶଂସା କରୁଛି। ତାଙ୍କର ଏପରି ସାହସ କିପରି ହେଲା। ଯେଉଁ ଥାଳିରେ ଖାଉଛନ୍ତି ସେହି ଥାଳିରେ ଛିଦ୍ର କରୁଛନ୍ତି। ମଧ୍ୟପ୍ରଦେଶ ଭାଜପାର ସାଂସଦ ଅଛନ୍ତି, ସେଠାକାର ଲୋକଙ୍କୁ ନିଜର ଭୂଲ ହୋଇଯାଇଛି ବୋଲି କହୁଛନ୍ତି। ଯଦି ସେ ଏତେ ଅସୁବିଧାରେ ଅଛନ୍ତି ତେବେ ମୁଁ ଭାବୁଛି ସେ ଯେଉଁଠାରେ ଥିଲେ ସେଠାକୁ ଫେରିଯିବା ଉଚିତ। ଯଦି ସେ ଏତେ ଲୋକପ୍ରିୟ ହୋଇଥାନ୍ତେ ସେ ସେଠାରେ ରହି ସଂଘର୍ଷ କରିଥାନ୍ତେ ଏବଂ ନିର୍ବାଚନରେ ମୋ ସହ ପ୍ରତିଦ୍ୱନ୍ଦ୍ୱିତା କରି ଜିତିଥାନ୍ତେ, ତେବେ ତାଙ୍କ କଥାରେ ଓଜନ ଅଛି ବୋଲି ମୁଁ ବିଶ୍ୱାସ କରିଥାନ୍ତି।
ସୂଚନା ମୁତାବକ, ନିକଟରେ ଗୁନାରେ ଏକ କାର୍ଯ୍ୟକ୍ରମକୁ ସମ୍ବୋଧିତ କରି ସିନ୍ଧିଆ କହିଥିଲେ ଯେ, ଯଦି ମୁଁ କୌଣସି ଭୂଲ କରିଛି ତେବେ ମୋତେ କ୍ଷମା କର। ଯାହାକୁ ନେଇ କେ.ପି ଯାଦବ ସିନ୍ଧିଆଙ୍କୁ ଟାର୍ଗେଟ କରିଛନ୍ତି। ୨୦୧୯ ଲୋକସଭା ନିର୍ବାଚନରେ ଭାଜପା ସାଂସଦ ଯାଦବ ଗୁନା ନିର୍ବାଚନମଣ୍ଡଳୀରୁ ଟିକେଟ୍ ପାଇଥିଲେ। ତାଙ୍କ ବିପକ୍ଷରେ କଂଗ୍ରେସରୁ ସିନ୍ଧିଆ ନିର୍ବାଚନ ଲଢିଥିଲେ। ତେବେ ଏହି ନିର୍ବାଚନରେ ସିନ୍ଧିଆ ଯାଦବଙ୍କ ଠାରୁ ହାରି ଯାଇଥିଲେ।
गद्दारी का नतीजा – न घर के रहे न घाट के। https://t.co/LJWSPwPVf6
— Jairam Ramesh (@Jairam_Ramesh) May 24, 2023
ତେବେ ଏହି ଭିଡିଓ ସେୟାର କରି କଂଗ୍ରେସ ସିନ୍ଧିଆଙ୍କୁ ଟାର୍ଗେଟ କରିଛି। ମଧ୍ୟପ୍ରଦେଶ କଂଗ୍ରେସର ଅଫିସିଆଲ ଟ୍ବିଟର ହ୍ୟାଣ୍ଡେଲରେ ଏହି ଭିଡିଓ ସେୟାର କରାଯାଇ ଲେଖାଯାଇଛି ଯେ, ଭାଜପା ସାଂସଦ କେ.ପି ଯାଦବ ସିନ୍ଧିଆଙ୍କୁ ମୂର୍ଖ ବୋଲି କହୁଛନ୍ତି, ଏବେ ଏହାକୁ କଣ କୁହାଯିବ?
ସେହିପରି କଂଗ୍ରେସର ବରିଷ୍ଠ ନେତା ଜୟରାମ ରମେଶ ଭିଡିଓକୁ ଟ୍ବିଟ୍ କରି କହିଛନ୍ତି, ବିଶ୍ୱାସଘାତକତାର ଫଳାଫଳ, ନା ଏ ଘରର ହେବ ନା ସେ ଘରର ହେବ।
ଦିଗ୍ବିଜୟ ସିଂ କହିଛନ୍ତି, କେ.ପି ଯାଦବଙ୍କ କଥାରେ ମୁଁ ଏକମତ। ସିନ୍ଧିଆ ଯେଉଁ ଥାଳିରେ ଖାଆନ୍ତି, ସେହି ଥାଳିରେ ଛିଦ୍ର କରନ୍ତି।
କଂଗ୍ରେସର ପୋଷ୍ଟରେ ବହୁ ୟୁଜର୍ସ ମଧ୍ୟ ପ୍ରତିକ୍ରିୟା ରଖିଛନ୍ତି।
@ସାଇଡଜପ୍ସ ନାମକ ୟୁଜର୍ସ ଲେଖିଛନ୍ତି, ସିନ୍ଧିଆଜୀ ଏଭଳି ଅପମାନିତ ହେବା ଅପେକ୍ଷା ମନ୍ତ୍ରୀ ପଦ ଛାଡି ଲୋକଙ୍କ ପାଇଁ ଲଢନ୍ତୁ। ଆଉ ଜଣେ ୟୁଜର୍ସ ଲେଖିଛନ୍ତି, ବିଚାରା ନା ଏ ଘରର ହେଲା ନା ସେ ଘରର। ବିଶ୍ୱାସଘାତକତାରୁ ଏହା ଭୋଗିବାକୁ ପଡୁଛି।
ରବି କାଲରା ନାମକ ୟୁଜର୍ସ ଲେଖିଛନ୍ତି, ଏଭଳି ଲେକଙ୍କୁ କେଉଁଠି ବି ସମ୍ମାନ ମିଳିବ ନାହିଁ। ଯିଏ ନିଜ ପରିବାର, ସମାଜ ଏବଂ ଜନତାଙ୍କ ପ୍ରତି ବିଶ୍ୱାସଘାତକତା କରିଛି, ସେପରି ଲୋକ ଏଭଳି ନିନ୍ଦାର ପାତ୍ର।
