ଭୁବନେଶ୍ୱର,୨୩।୧୦(ବ୍ୟୁରୋ)-କରୋନା ମହାମାରୀରେ କବଳିତ ସାରା ବିଶ୍ୱ ଏବେ ବି ଟିକା ଅପେକ୍ଷାରେ। ଖୁବ୍ଶୀଘ୍ର ଟିକା ମିଳିବ ବୋଲି ଶୁଣାଯାଉଥିଲେ ମଧ୍ୟ ଏଯାଏ କିଛି ବି ସ୍ପଷ୍ଟ ସୂଚନା ମିଳିପାରୁନି। ଏପରିସ୍ଥିତିରେ କୋଭିଡ୍-୧୯ ବିରୋଧରେ ଟିକାକରଣ ପାଇଁ ଓଡ଼ିଶା ସରକାର ପ୍ରକ୍ରିୟା ଆରମ୍ଭ କରିଥିବାରୁ ନୂଆ ଆଶା ସଞ୍ଚାର ହୋଇଛି। ସ୍ବାସ୍ଥ୍ୟ କର୍ମୀଙ୍କୁ ପ୍ରଥମେ ଟିକା ଦେବା ପାଇଁ ସରକାର ଯୋଜନା କରୁଛନ୍ତି। ଏହି ପରିପ୍ରେକ୍ଷୀରେ ସ୍ବାସ୍ଥ୍ୟ ସେବା କର୍ମୀ ବା ହେଲ୍ଥ କେୟାର ଓ୍ବାର୍କର୍ସଙ୍କ ଡାଟାବେସ୍ ପ୍ରସ୍ତୁତ କରିବା ପାଇଁ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ଅତିରିକ୍ତ ମୁଖ୍ୟ ଶାସନ ସଚିବ ପ୍ରଦୀପ୍ତ କୁମାର ମହାପାତ୍ର ନିର୍ଦ୍ଦେଶ ଦେଇଛନ୍ତି। ଏ ନେଇ ଶୁକ୍ରବାର ସଚିବ ଭାରତୀୟ ମେଡିକାଲ୍ ଆସୋସିଏଶନ ଓଡ଼ିଶା ରାଜ୍ୟ ଶାଖାର ସଭାପତି, ଆୟୁଷ ଆସୋସିଏଶନ ସଭାପତି, ନର୍ସିଂ ଆସୋସିଏଶନ ସଭାପତି, ପାରାମେଡିକ୍ ୱାର୍କର୍ସ ଆସୋସିଏଶନ ଓ ଘରୋଇ ହସ୍ପିଟାଲ ମାଲିକ ସଂଘ ସଭାପତିଙ୍କୁ ଚିଠି ଲେଖିଛନ୍ତି। ଅକ୍ଟୋବର ୨୯ ସୁଦ୍ଧା ଏହି ଡାଟାବେସ୍ ପ୍ରସ୍ତୁତ କରିବା ପାଇଁ ନିର୍ଦ୍ଦେଶ ରହିଛି।
