ଉତ୍ତର ପ୍ରଦେଶର ଫିରୋଜାବାଦ ଅଞ୍ଚଳର ଜଣେ ଯୁବକଙ୍କ ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଏହି ଭିଡିଓରେ ଯୁବକଜଣଙ୍କ ଚଳନ୍ତା କାରର ଛାତ ଉପରେ ଷ୍ଟଣ୍ଟ କରୁଥିବା ଦେଖିବାକୁ ମିଳୁଛି। ସେ କାରର ଛାତ ଉପରେ ପୁସ୍ ଅପ୍ କରୁଛନ୍ତି । ଉତ୍ତର ପ୍ରଦେଶ ପୋଲିସ ଏହି ଭିଡିଓକୁ ସୋସିଆଲ ମିଡିଆରେ ଶେୟାର କରିଛି। କ୍ୟାପଶନରେ ଲେଖିଛି, ‘କିଛି ପୁସ୍ଅପ୍ ଆପଣଙ୍କୁ କେବଳ ଆଇନ ଆଖିରେ ତଳକୁ ନେଇଯିବ। ସୁସ୍ଥ ରୁହନ୍ତୁ, ସୁରକ୍ଷିତ ରୁହନ୍ତୁ। ଯୁବକଙ୍କର ଚାଲାଣ କଟାଯାଇଛି ବୋଲି ସେ ଲେଖିଛନ୍ତି।
ପୋଲିସ ସୂଚନାନୁଯାୟୀ, ଟ୍ରାଫିକ ନିୟମ ଉଲ୍ଲଂଘନ କରିବା ଏବଂ ବିପଦପୂର୍ଣ୍ଣ ଷ୍ଟଣ୍ଟ କରିବା ପାଇଁ ଉକ୍ତ ଯୁବକଙ୍କ ବିରୋଧରେ ଫିରୋଜାବାଦ ପୋଲିସ ଦ୍ୱାରା ଆବଶ୍ୟକ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ପରେ ଉକ୍ତ ଯୁବକ ନିଜେ ବାପାଙ୍କ ସହିତ ପୋଲିସ ଷ୍ଟେଶନରେ ପହଞ୍ଚି ଭବିଷ୍ୟତରେ ଏପରି ଭୁଲ କେବେ ନ କରିବାକୁ ପ୍ରତିଶ୍ରୁତି ଦେଇଥିଲେ।
ପୋଲିସ ସେହି ଯୁବକଙ୍କର ଏକ ଭିଡିଓ ମଧ୍ୟ ସେୟାର କରିଛି। ଭିଡିଓରେ ଯୁବକ କହୁଛନ୍ତି, ‘ମୋର ନାମ ଉଜ୍ଜଓ୍ବଲ ଯାଦବ ଏବଂ ମୁଁ ଏହି କାର ସହିତ ଏକ ବିପଦପୂର୍ଣ୍ଣ ଭିଡିଓ ତିଆରି କରିଥିଲି। ଯାହା ପରେ ଫିରୋଜବାଦ ପୋଲିସ ମୋର ଚାଲାଣ କାଟିଛି। ମୁଁ ମୋ ବାପାଙ୍କ ସହ ପୋଲିସ ପାଖକୁ ଆସିଥିଲି। ଭବିଷ୍ୟତରେ ମୁଁ ଆଉ ଏପରି ଭୁଲ କରିବି ନାହିଁ। ’
