ଲକ୍ଷ୍ନୌ, ୩୦।୯: ସାରା ଦେଶରେ କରୋନା ଏହାର କାୟା ମେଲାଇ ସାରିଛି। ଭାରତରେ ବର୍ତ୍ତମାନ ସୁଦ୍ଧା ୬୨ ଲକ୍ଷରୁ ଊର୍ଦ୍ଧ୍ୱ ଲୋକ ଏହି ଭାଇରସ୍ରେ ଆକ୍ରାନ୍ତ ହୋଇସାରିଛନ୍ତି। ଏଭଳି ଏକ ସମୟରେ କରୋନା ଟେଷ୍ଟକୁ ନେଇ ଉତ୍ତର ପ୍ରଦେଶରୁ ଏକ ବଡ଼ ଖବର ସାମ୍ନାକୁ ଆସିଛି। କରୋନା ନମୁନା ପରୀକ୍ଷା କରିବାରେ ଉତ୍ତର ପ୍ରଦେଶ ଏକ ନୂଆ ରେକର୍ଡ ପ୍ରତିଷ୍ଠା କରିଛି। ଦେଶରେ ପ୍ରଥମ ରାଜ୍ୟ ଭାବେ ଉତ୍ତର ପ୍ରଦେଶ ଏକ କୋଟିରୁ ଊର୍ଦ୍ଧ୍ୱ ପରୀକ୍ଷା କରିଛି।
ପ୍ରଦେଶ ସରକାରଙ୍କ ରିପୋର୍ଟ ମୁତାବକ, ବର୍ତ୍ତମାନ ସୁଦ୍ଧା ରାଜ୍ୟରେ ଏକ କୋଟି ୯୮ ହଜାର ୮୯୬ କରୋନା ଟେଷ୍ଟ ହୋଇସାରିଛି। ସେହିଭଳି ଗତ ୨୪ ଘଣ୍ଟା ମଧ୍ୟରେ ଏକ ଲକ୍ଷ ୬୧ ହଜାର ୫୮ ସାମ୍ପୁଲ ଟେଷ୍ଟ ହୋଇଥିଲା। ଯେଉଁଥିରେ ୪,୨୭୧ ଜଣ ଲୋକ ପଜିଟିଭ ଚିହ୍ନଟ ହୋଇଥିଲେ। ଉତ୍ତର ପ୍ରଦେଶରେ ୩୦ ସେପ୍ଟେମ୍ବର ସୁଦ୍ଧା ଏକ କୋଟି ନମୁନା ପରୀକ୍ଷା କରିବା ଲାଗି ଲକ୍ଷ୍ୟ ଧାର୍ଯ୍ୟ କରାଯାଇଥିଲା। ଯାହାକୁ ସରକାର ହାସଲ କରିନେଇଛନ୍ତି।
